މިއަހަރުގެ ރެހެންދި އެވޯޑް ޖުލައި މަހުގައި ދިނުމަށް ނިންމާފައި ވާކަމަށް, ސޯޝަލް މިނިސްޓްރީގެ ދަށުން ހިންގާ ޖެންޑާ އެފެއާޒް ޑިޕާޓްމެންޓުން ބުނެފިއެވެ.
މިއަދު އެ މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި އެ ޑިޕާޓްމެންޓުގެ ސޯޝަލް ސާވިސް ކޯޑިނޭޓަރު މަރިޔަމް ރާޔާ އަހްމަދު ވިދާޅުވީ މި އަހަރަކީ މި އެވޯޑަށް 10 އަހަރު ފުރޭ އަހަރު ކަމަށާއި މި އަހަރުގެ އެވޯޑު ޖުލައި މަހުގެ ތެރޭގައި ދޭނެ ކަމަށެވެ.
ރެހެންދި އެވޯޑަކީ ގައުމީ ޚިދުމަތުގައި އެކިއެކި ދާއިރާއިން އަންހެނުން ކުރާ މަސައްކަތްތަކާއި ރާއްޖޭގެ ގައުމީ ތަރައްގީއަށާއި މުޖުތަމަޢު ބިނާކުރުމަށް އަންހެނުން އަދާކުރާ ދައުރުގެ އަގު ގައުމީ ފެންވަރެއްގައި ވަޒަންކުރުމުގެގޮތުން 2014 ވަނަ އަހަރުން ފެށިގެން ދެމުން އަންނަ އެވޯޑެކެވެ.
"މި އަހަރަކީ އެވޯޑަށް 10 އަހަރު ފުރޭ އަހަރަށް ވެފައި ޖުލައި މަހުގެ ތެރޭގައި މި އެވޯޑް ލިބޭ ފަރާތްތަކަށް އެވޯޑް ދިނުމުގެ ކަންކަން ކުރިއަށް ގެންދާނަން،" ރާޔާ ވިދާޅުވިއެވެ.
މި އެވޯޑުގެ މަގުސަދަކީ އަންހެނުންގެ ހައްގުތައް ރައްކާތެރިކުރުމާއި މުޖްތަމައުގެ އެކި ކަންކަމަށް އަންހެނުން ނުކުތުމަށް ހިތްވަރުދީ، އަންހެނުން ބާރުވެރިކުރުމާއި ކުރިއެރުވުމަށް ވަކި ފަރުދުންނާއި މުއައްސަސާތަކާއި ޖަމިއްޔާތަކާއި ޖަމާތްތަކުން ކުރަމުންދާ މަސައްކަތްތަކުގެ އަގުވަޒަންކުރުމެވެ.
ރެހެންދި އެވޯޑަށް ކުރިމަތިލުމުގެ ފުރުސަތު މިއަހަރު ހުޅުވާލީ ފެބުރުއަރީ މަހުގެ އަށް ވަނަ ދުވަހުން ފެށިގެން އޭޕްރިލް މަހުގެ 18ވަނަ ދުވަހުގެ ނިޔަލަށެވެ.
މި އެވޯޑު މިފަހަރު ޚާއްޞަ ކޮށްފައިވަނީ ވަކިވަކި ފަރުދުންނާއި ޖަމިއްޔާ ޖަމާތްތަކާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކަށެވެ.