ރާއްޖޭގެ ފިލްމް އިންޑަސްޓަރީން މަޝްހޫރުވި ފިލްމީތަރި އަދި ނެށުންތެރިޔާ ސުނީތާ ޢަލީގެ "ސުނީ ސްޕެޝަލް" ފިހާރަ ރޭގެ ވަގުތެއްގައި ފަޅާލައިފިއެވެ.
ސުނީތާ "ސަން"އަށް މައުލޫމާތު ދެމުން ބުނީ، ޗާންދަނީ މަގުގައި ހުންނަ އެ ފިހާރައިގެ ދޮރުގައި ހަރުކޮށްފައި ހުންނަ ދެ ތަޅު ހަލާކުކޮށްލައިގެން ވައްކަންކޮށްފައިވާކަން އެނގުނީ ނުވައެއް ހާއިރު ފިހާރަ ހުޅުވަން ދިޔައިރު ކަމަށެވެ.
ސުނީތާ ބުނީ، ފިހާރައިން ވަގަށް ނަގާފައިވަނީ ލާރި ވަތްގަނޑުގައި ހުރި ފައިސާއާއި ތެޔޮފުޅިތަކެއް ކަމަށެވެ. ނަމަވެސް، އިއްޔެގެ ސޭލްސް ނުހަދައި ހުރުމުން، ފައިސާ ހުރި މިންވަރެއް ކަށަވަރުނުވާ ކަމަށް އޭނާ ބުންޏެވެ.
ސުނީތާ މި ގެއްލުމާ ކުރިމަތިލާން ޖެހުނީ އޭނާގެ އުފަންދުވަހުއެވެ. ނަމަވެސް، އެފަދަ ކަމެއްގެ ސަބަބުން އޭނާގެ ހިތްވަރު އެލުވާނުލާނެ ކަމަށް ސުނީތާ ބުންޏެވެ.
"އެއީ ގިފްޓެއް އުފަންދުވަހު ލިބުނު، އަނެއްކާ ވެސް އާ ހިތްވަރެއް އެކަހަލަ ކަމެއް ކުރީމާ. އިތުރަށް ކުރިއަށްދާނީ އިރާދަކުރެއްވިއްޔާ،" ސުނީތާ ބުންޏެވެ.
އޭނާ ބުނީ، އެ މައްސަލަ ފުލުހަށް ރިޕޯޓުކޮށްފައިވާ ކަމަށެވެ.
ސުނީތާ "ސުނީ ސްޕެޝަލް"ގެ ނަމުގައި އޯޑަރަށް ލޮނުމިރުހާއި ކާށިތެޔޮ ވިއްކަން ފެށީ 2020 ވަނަ އަހަރުގެ ލޮކްޑައުންގެ ތެރޭގައެވެ. އެއަށް ފަހު ލުއިކާނާ ވެސް ވިއްކާ ގޮތަށް، އޭނާ ފިހާރަ ހުޅުވީ މިދިޔަ އަހަރުގެ ކުރީކޮޅެވެ.