ވިއެޓްނާމްގެ އާ ރައީސަކަށް އެ ގައުމުގެ ޕަބްލިކް ސެކިއުރިޓީ މިނިސްޓަރުގެ ނަން ވިއެޓްނާމްގެ ވެރިކަންކުރާ ކޮމިއުނިސްޓް ޕާޓީން ހުށަހަޅައިފިއެވެ.
ވިއެޓްނާމްގެ ޕަބްލިކް ސެކިއުރިޓީ މިނިސްޓަރުކަން ކުރައްވަނީ އުމުރުން 66 އަހަރުގެ ތޫ ލަމްއެވެ. 2016 ވަނަ އަހަރުން ފެށިގެން އެ މަގާމު އަދާކުރައްވާ ލަމް ވަނީ ވިއެޓްނާމްގެ އިންސާނީ ހައްގުތަކާ ގުޅޭ ހަރަކާތްތަކުގައި ހަރުކަށި ފިޔަވަޅެއް އަޅުއްވައިފައެވެ.
ވިއެޓްނާމްގެ އާ ރައީސަކު ހޮވަން ނިންމީ ކުރީގެ ރައީސް ވޯ ވެން ތޮއުންގް މިދިޔަ މާޗް މަހު އިސްތިއުފާ ދެއްވުމާ ގުޅިގެންނެވެ.
ތޮއުންގް މަގާމުން އިސްތިއުފާ ދެއްވީ ހިޔާލު ތަފާތުވުންތަކުގެ ސަބަބުން ރައީސްކަމުގެ މަގާމުގައި އަހަރަކާ ކުޑަ ދުވަސްކޮޅަކު ހުންނެވުމަށްފަހުއެވެ.
ތޮއުންގް އަކީ ދެ އަހަރު ތެރޭގައި މަގާމުން ވަކިވެވަޑައިގެންނެވި ދެވަނަ ރައީސްއެވެ.
ވިއެޓްނާމްގެ ގައުމީ މަޖިލީހުގެ އާ ވެރިޔާގެ މަގާމަށް ޓްރާން ތާން މާން، 61، ގެ ނަން ވެސް ހުށަހަޅައިފައިވާ ކަމަށް ދައުލަތުގެ މީޑިއާއިން ބުނެއެވެ.
އެ ޕާޓީތަކުގެ ސެންޓްރަލް ކޮމެޓީން ނަންތައް ބަލައިގަތް ނަމަވެސް ނަންތަކަށް ރަސްމީކޮށް ވޯޓު ދޭނީ އަންނަ ހަފްތާ ބާއްވާ ގައުމީ މަޖިލީހުގެ ޖަލްސާއިންނެވެ.