ސްމާޓްފޯނެއް ނިއްވައިނުލާ ނުވަތަ ރީސްޓާޓް ވެސް ނުކޮށް ގިނަ ދުވަސް ކުރުމަކީ ކިހާ ނުރައްކާތެރި ކަމެއްކަން އެނގޭހެއްޔެވެ؟
އެ ކަމާ ބެހޭގޮތުން އެމެރިކާގެ ނޭޝަނަލް ސެކިއުރިޓީ އެޖެންސީގެ (އެންއެސްއޭ)އިން އިލްތިމާސްކުރާ ގޮތަކީ ކޮބައިތޯ ބަލައިލުމަކީ މިފަދަ ޒަމާނެއްގައި ވަރަށް މުހިންމު ކަމެކެވެ. ސައިބާ ސެކިއުރިޓީ ބެސްޓް ޕްރެކްޓިސްތަކާ ބެހޭ ގޮތުން އެންއެސްއޭގެ އޮފިޝަލުން ދެއްވި ބްރީފިންގައި ވިދާޅުވީ ކޮންމެ ހަފުތާއަކު ފޯނުތައް ރީބޫޓްކުރުމަކީ ފޯނަށް ހެކަރުންގެ ފަރާތުން ލިބިދާނެ ހަމަލާތަކުން ރައްކާތެރިކޮށްދޭނެ ކަމެއް ކަމަށެވެ.
ގަވާއިދުން ރީބޫޓް ކުރުމުގެ ސަބަބުން ހެކިންގެ މަސައްކަތްތައް މެދުކަނޑާލައި ޑިވައިސްގެ އޮޕަރޭޓިން ސިސްޓަމާއި އެޕްލިކޭޝަންތައް ކްލީން ސްލޭޓަކަށް ރީސެޓްކުރެއެވެ. މިކަމުގެ ސަބަބުން ހެކަރުންގެ ފުށުން އަންނަ ނުރައްކާތެރި ހަމަލާއެއްގައި ފޯނަށް ލިބޭ މެލްވެއާއެއް ފަދަ އެޕްލިކޭޝަނެއް މެދުވެރިކޮށް ފޯނުގެ ސެކިއުރިޓީ ޑިފެންސް ބައިޕާސްކޮށް ޒާތީ މައުލޫމާތު ވަގަށް ނެގުން ފަދަ ކަންކަން މުޅިންހެން ހުއްޓުވޭނެއެވެ.
އެންއެސްއޭއިން ބުނީ، މި ފަދަ ހަމަލާތައް ގިނަ ފަހަރަށް ފޯންގެ ބެކްގްރައުންޑްގައި ރަންކުރާއިރު، ގިނަ ފަހަރަށް ދެނެނުގަނެވޭ ކަމަށެވެ. އެހެންކަމުން، ސްމާޓްފޯން ނިއްވާލުމުން ޑިވައިސް ހެކިން އެޓޭކްތަކުން މުޅިން ސަލާމަތްކޮށްދޭނެ ކަމަށެވެ.
އެ އެޖެންސީން ބުނީ، ކޮންމެ ދުވަހަކު ވެސް އެއް ފަހަރު ރީސްޓާޓްކޮށްލުމަކީ ރަނގަޅު ކަމެއް ކަމަށެވެ. މަދުވެގެން ހަފުތާއަކު އެއްފަހަރު ރީބޫޓްކުރުމަކީ ކޮންމެހެން ވެސް ކުރަންޖެހޭނެ ކަމެއްކަމުގައި އެ އެޖެންސީން ބުނެއެވެ.
ސައިބާ ސެކިއުރިޓީން ސަލާމަތް ކޮށްދިނުމުގެ އިތުރުން، ޕީރިއޮޑިކް ރީބޫޓްތަކުގެ ސަބަބުން ފޯނުގެ ސޮފްޓްވެއާތައް ވެސް ފަސޭހަކަމާއި ހަރުދަނާކަމާ އެކު އަޕްޑޭޓްވެ، ރަނގަޅަށް ރަންކުރުމަށް މަގުފަހިކޮށްދޭކަން އެންއެސްއޭއިން ވަނީ ފާހަގަކޮށްފައެވެ.
އެންމެ ފަހުން ފޯނު ނިއްވާލިތާ ކިހާ ދުވަހެއް ވެއްޖެތޯ ބެލުމަށް އައިއޯއެސްއާއި އެންޑްރޮއިޑް ފޯނުތަކުން ވެސް "އަޕްޓައިމް" ބަލައިލެވޭނެއެވެ. މި ފީޗާ ކޮންމެ ސްމާޓްފޯނެއްގެ ސެޓިންސް އެޕްލިކޭޝަނުން ލިބެން ހުންނާނެއެވެ.
ފޯނުތައް ރީބޫޓްކުރުމަކީ ސައިބާ ސެކިއުރިޓީ މާހިރުން މީގެ ކުރިން ވެސް ލަފާދޭ ކަމަކަށްވާއިރު، އެންއެސްއޭގެ އެންމެ ފަހުގެ އިރުޝާދުތަކުން އެނގެނީ މިއީ ކޮންމެ މީހަކަށް ވެސް މުހިންމު އަދި އުނދަގުލަކާ ނުލައި މޮބައިލް ސެކިއުރިޓީ ވަރުގަދަ ކުރުމަށް ފަސޭހަ އަދި ހަރުދަނާ މަގެއްކަމެވެ.