ތ. ކަނޑޫދޫގައި އިއްޔެ ގައި މައްޗަށް ފާރެއް ވެއްޓި ބޮޑެތި އަނިތާކެއް ލިބުނު 10 އަހަރުގެ ފިރިހެން ކުއްޖާ އިތުރު ފަރުވާއަށް، މިއަދު އެއާ އެމްބިއުލާންސްގައި މާލެ ގެނެސްފިއެވެ.
އެރަށު ކައުންސިލުގެ ނައިބު ރައީސް އިލްޔާސް މަހްމޫދު އިއްޔެ ވިދާޅުވީ، ހަވީރު ކުޅެންއުޅުމަށް ފަހު ހިނގާފައި ދަނިކޮށް އެކުއްޖާ ގައި މައްޗަށް ފާރު ވެއްޓުނީ 5:30 ހާއިރު ކަމަށެވެ.
އެ ރަށު ސިއްހީ މަރުކަޒުގައި ބައެއް ޓެސްޓުތައް ހެދެން ނެތުމުން ކުއްޖާގެ ހަށިގަނޑުގެ އެތެރެއަށް ގެއްލުން ލިބުނުކަން ކަށަވަރު ނުވާ ކަމަށް އޭނާ ވަނީ ވިދާޅުވެފައެވެ.
ނަމަވެސް މޫސުން ތަންނުދިނުމުގެ ސަބަބުން އިތުރު ފަރުވާއަށް އެހެން ތަނަކަށް ނުގެންދެވި އޮތުމަށް ފަހު މިއަދު ހެނދުނު އެ ކުއްޖާ ވަނީ އެއާ އެމްބިއުލާންސްގައި މާލެ ގެނެސްފައެވެ.
އެކަމާ ގުޅިގެން އެ ރަށު ސިއްހީ މަރުކަޒުން ބުނީ އަނިޔާ ލިބުނު ކުޑަކުއްޖާ އައިޖީއެމްއެޗް ހޮސްޕިޓަލަށް ގެންދަން ލަފާދީފައިވާ ކަމަށެވެ.
ތ. ކަނޑޫދޫގައި ގައި މައްޗަށް ފާރެއް ވެއްޓި ބޮޑެތި އަނިތާކެއް ލިބުނު ދިހަ އަހަރުގެ ފިރިހެން ކުއްޖާ އިތުރު ފަރުވާއަށް ސީޕްލޭންގައި މާލެ ގެންދިޔުމުގެ ތެރެއިން-- ފޮޓޯ/ ކަނޑުދޫ ސިއްޙީ މަރުކަޒު
"މިކަމުގައި އެހީތެރިވެދެއްވި ހުރިހާ ފަރާތްތަކަށް ވަރަށް ބޮޑަށް ޝުކުރިއްޔާ.
ޚާއްސަކޮށް ރައީސް ޑރ. މުހައްމަދު މުއިއްޒު އަދި މިނިސްޓާ އޮފް ހެލްތު ޑރ. އަބުދުﷲ ޚަލީލަށާއި ތ. އަތޮޅު ހޮސްޕިޓަލުގެ ވެރިންނަށް ޝުކުރު ދަންނަވަން،" ކަނޑޫދޫ ސިއްޙީ މަރުކަޒުން ފޭސްބުކްގައި ކުރި ޕޯސްޓެއްގައި ބުންޏެވެ.
މި ހާދިސާގައި އެ ކުއްޖާގައި ފަޔަށާއި އަތުގެ އިތުރުން މޫނަށް އެކި ވަރުގެ އަނިޔާތައް ލިބުނު ކަމަށް އިލްޔާސް ވިދާޅުވިއެވެ. އޭނާ ވިދާޅުވީ، މި ހާދިސާގައި، އެންމެ ބޮޑަށް އަނިޔާވީ ފައިގެ ކުޑަހުޅަށް ކަމަށެވެ.
"އުނަގަނޑުން ތިރި ކަމަށް އަޅުގަނޑަށް ބެލެވެނީ ލިބިފައި ހުރި އިންޖަރީތަކަށް ބަލާއިރު،" އިލްޔާސް ވިދާޅުވިއެވެ.
އެއާ އެމްބިއުލާންސްގެ ގޮތުގައި ބޭނުން ކުރާ ސީޕްލޭންގެ ޚިދުމަތް ފަށާފައި ވަނީ މާޗު މަހުގެ 14 ވަނަ ދުވަހުއެވެ. މި ޚިދުމަތް ދެނީ މިނިސްޓްރީއާއި އެންސްޕާ އަދި އައިލެންޑް އޭވިއޭޝަން ގުޅިގެންނެވެ.