ކޮވިޑް-19ގެ 10 ކޭސް މިމަހުގެ މިހާތަނަށް ރިޕޯޓުކޮށްފައި ވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭ އިން "ސަން"އާ ހިއްސާކުރި ތަފާސްހިސާބުތައް ދައްކާ ގޮތުގައި މިއަހަރު ކޮވިޑްގެ ކޭސްތައް އެންމެ ގިނަވެފައި ވަނީ، ޖަނަވަރީ މަހުގެއެވެ. އެ މަހު ކޮވިޑުވެ 44 ކޭހެއް ރިޕޯޓުކޮށްފައި ވެއެވެ.
ނަމަވެސް، ފެބްރުއަރީ މަހާއި މާޗް މަހު ކޮވިޑުގެ އަދަދުތައް ވަނީ ދަށް ވެފައެވެެ. މި ދެ މަހު ހުށަހަޅާފައި ވަނީ، ހަތަރު ކޭހާއި ތިން ކޭހެވެ.
ނަމަވެސް، ފާއިތުވެދިޔަ ދެމަހު އަނެއްކާ ވެސް ވަނީ ކޮވިޑުގެ ނަމްބަރުތައް އިތުރުވާން ފަށާފައެވެ. އެގޮތުން، މިދިޔަ މަހު ކޮވިޑު ޖެހިގެން 12 މީހަކު ރިޕޯޓު ކޮށްފައި ވާއިރު، މިމަހުގެ މިހާތަނަށް ރިޕޯޓު ކޮށްފައި ވަނީ، 10 މީހުންނެވެ. މިއަދަދު މިމަހުގެ ނިޔަލަށް އަދި އިތުރުވާނެ ކަމަށް ބެލެވެއެވެ.
މި ދުވަސްވަރަކީ ވިއްސާރަ ދުވަސްވަރަކަށް ވުމުން، މަދިރީގެ ސަބަބުން ޖެހޭ ބަލިތައް ވެސް މިދުވަސްވަރު ވަނީ އާންމު ވެފައެވެ. އެގޮތުން ޑެންގީ އަދި ޗިކުންގުންޔާ ޖެހިގެން ރިޕޯޓު ކުރާ އަދަދު ވޭތުވެދިޔަ ދެމަހު ވަނީ ވަރަށް ބޮޑަށް އިތުރުވެފައެވެ.
ނަމަވެސް، އެޗްޕީއޭގެ ތަފާސްހިސާބުތަކުން ދައްކާ ގޮތުގައި މިދިޔަ މަހު ވަނީ ވައިރަލް ހުމާއި ރޯގާ އަދި އިންފްލުއެންޒާ ޖެހުނު މިންވަރު ދަށްވެފައެވެ.
ކޮވިޑް-19 އަކީ 2019ވަނަ އަހަރުގެ ފަހުކޮޅު ޗައިނާގެ ވޫހާން ސިޓީން ފެނުނު ބައްޔެކެވެ. އެ ބަލީގައި ގިނަ އަދަދެއްގެ ދިވެހީންގެ ފުރާނަ ވެސް ގެއްލުނެވެ.