އއ. އުކުޅަހު ހިއްކި ސަރަހައްދުގައި އިއްޔެ ސައިކަލު ދުއްވަނިކޮށް ސައިކަލު ކޮންޓްރޯލުން ނެއްޓި، ސީރިއަސް އަނިޔާތަކެއް ލިބުނު ކުޑަ ކުއްޖާގެ ހާލަތު ރަނގަޅުވަމުން އަންނަ ކަމަށް އާއިލާއިން މިއަދު ބުނެފިއެވެ.
މި ހާދިސާއާ ގުޅިގެން އިއްޔެ ފުލުހުން ހިއްސާކުރި މެސެޖެއްގައިވަނީ، މި ހާދިސާގައި އަނިޔާވެފައިވަނީ 17 އަހަރުގެ ފިރިހެން ކުއްޖަކަށް ކަމަށެވެ. އޭނާއަށް އަނިޔާވެ، އެ ރަށު ސިއްހީ މަރުކަޒުގައި ފަރުވާ ދެމުން އަންނަކަމުގެ މައުލޫމާތު ލިބުނީ، އިއްޔެ މެންދުރު 02:30ގައި ކަމަށް ފުލުހުން ބުންޏެވެ.
އަނިޔާވެ ސިއްހީ މަރުކަޒަށް ގެންދިއުމާ އެކު ކުއްޖާ ވަނީ އިތުރު ފަރުވާއަށް އިމަޖެންސީގައި މާލެ ގެންގޮސްފައެވެ. އަދި، ކުއްޖާގެ އެތެރެހައްޓަށް އަނިޔާއެއް ލިބިފައިވޭތޯ ބެލުމަށް އައިޖީއެމްއެޗްގައި ސިޓީ ސްކޭނެއް ހެދިއެވެ.
ކުއްޖާގެ އާއިލާގެ ފަރާތުން "ސަން"އާ ވާހަކަ ދެއްކި މީހަކު ބުނީ، ސީޓީ ސްކޭނުން ދެއްކި ގޮތުގައި ކުއްޖާގެ ބޮލުގެ އެތެރެއަށް އަދި ސިކުނޑިއަށް ގެންލުމެއް ލިބިފައިނުވާ ކަމަށެވެ. ނަމަވެސް، އަތަށާއި ފަޔަށާއި ބޮލަށް ބޭރުފުށުން ފުންކޮށް ގިނަ އަނިޔާތަކެއް ލިބިފައިވާކަން އޭނާ ފާހަގަކުރިއެވެ.
މިހާރު ކުއްޖާއަށް ފަރުވާ ދެމުން އަންނަނީ އައިޖީއެމްއެޗް ވޯޑުގައި ބާއްވައިގެންނެވެ.
ހާދިސާ ހިނގައިދިޔަ ގޮތް ހިއްސާކުރަމުން އޭނާ ބުނީ، ކުއްޖާއަކީ ފަރިތަކަމާ އެކު ސައިކަލު ދުއްވަން އެނގޭ ކުއްޖެއް ކަމަށެވެ. އަދި، ހިއްކި ސަރަހައްދުގައި މި ހާދިސާ ހިނގީ ރަހުމަތްތެރިންތަކަކާ އެކު އުޅެނިކޮށް ކަމަށް އޭނާ ބުންޏެވެ.
"ހިއްކި ސަރަހައްދުގައި އިން ގަލަކަށް އަރާފައި ފުރޮޅައިލީ. އެއީ އެއްކޮށް ހުސްކޮށް އޮންނަ ސަރަހައްދެއް،" އޭނާ ބުންޏެވެ.
ހާދިސާ ހިނގި ވަގުތު ސައިކަލު މަތީ އިނީ އަނިޔާވި ކުއްޖާ އެކަންޏެވެ.
މި ހާދިސާއާ ގުޅިގެން ބަލަންޖެހޭ ކަންކަން ފުލުހުން އަންނަނީ ބަލަމުންނެވެ. ކުޑަކުދިން ސައިކަލު ދުއްވުމުގެ ސަބަބުން މިފަދަ ހާދިސާތައް މަދުން ނަމަވެސް ހިނގާފައިވެއެވެ.