ރައްޔިތުންގެ މަޖިލީހުގެ މެންބަރުކަމަށް ކުރިމަތިލުމުގެ ވިސްނުން ދެން އިތުރަށް ނުގެންގުޅުއްވާ ކަމަށް އައްޑޫމީދޫ ދާއިރާގެ އެމްޑީޕީ މެންބަރު ރޮޒައިނާ އާދަމް ވިދާޅުވެއްޖެއެވެ.
ރޮޒޭނާ މިފަދައިން ވިދާޅުވީ 19 ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި މެންބަރުންނަށް ވާހަކަދެއްކެވުމަށް ދިން އެންމެ ފަހު ފުރުސަތުގައެވެ.
އެ ފުރުސަތުގައި ވާހަކަދައްކަވަމުން ރޮޒޭނާ ވިދާޅުވީ، 15 އަހަރަށް ފަހު އޭނާ މަޖިލީހުން ވަކިވާއިރު އިތުރަށް މެންބަރު ކަމަށް ކުރިމަތިލުމުގެ ވިސްނުން އޭނާގެ ނެތްކަމަށެވެ.
"އަޅުގަނޑުގެ ވިސްނުމެއް ނެތް ދެން ކުރިއަށް އޮތް ތަނުގައި ރައްޔިތުންގެ މަޖިލީހަކަށް ކުރިމަތިލުމުގެ. އެހެންވީމާ މިއަދަކީ މަޖިލީހުގެ ތަޅުމުގައި އަޅުގަނޑު މެންބަރެއްގެ ހައިސިއްޔަތުން ވާހަކަ ދައްކާ އެންމެ ފަހު ދުވަސް." ރޮޒައިނާ ވިދާޅުވިއެވެ.
"ހަމަގައިމުވެސް އަޅުގަނޑުގެ ގޮނޑި ނީލަމުގައި އިން އެންމެ ދުވަހެއްވެސް ނާންނާނެ، 15 އަހަރު ދުވަސް ނިންމާފަ އަޅުގަނޑު މިތަނުން ދާއިރު"
ރޮޒޭނާ ވިދާޅުވީ، 15 އަހަރަށް ފަހު އޭނާ މަޖިލީހުން އެ ވަކިވަނީ ވަރަށް ބޮޑު ހިތްހަމަޖެހުމާއިއެކު ކަމަށެވެ. އެގޮތުން އޭނާ ވަނީ އައްޑޫ މީދޫ ދާއިރާގެ ރައްޔިތުންނަށް ޝުކުރު އަދާކުރައްވާފައެވެ. އަދި ރައްޔިތުން ހަވާލުކުރި މަސައްކަތް އަމާނާތްތެރި ކަމާއެކު ކުރެވިއްޖެ ކަމަށް އުންމީދު ކުރާ ކަމަށްވެސް ވިދާޅުވިއެވެ.
ރޮޒޭނާއަކީ 19 ވަނަ މަޖިލީހުގައި ހިމެނޭ މަދު އަންހެން މެންބަރުންގެ ތެރެއިން ފާހަގަކޮށްލެވޭ މެންބަރެކެވެ. އާއްމުގޮތެއްގައި އަންހެނުންގެ ކުރިއެރުމަށާއި އަންހެނުންގެ ހައްގުތަކާ އެއްކޮޅަށް ވަކާލާތު ކުރައްވާ މެންބަރެކެވެ.
ރޮޒޭނާ ވަނީ އަންހެނުންގެ ހައްގުތައް ރައްކާތެރިކުރުމަށް މަޖިލީހަށް ގަރާރާއި ބިލުތައް ހުށަހަޅާފައެވެ.
މި ފަހަރުގެ މަޖިލީހުގެ އިންތިޚާބުގައި ވާދަ ކުރުމަށް އެމްޑީޕީގެ ޓިކެޓް ހޯދުމަށް ރޮޒައިނާ ވާދަ ކުރެއްވިއެވެ. ޕާޓީގެ އެ ޕްރައިމަރީން ރޮޒައިނާއަށް ކުރިމަތިވީ ނާކާމިޔާބީއާއެވެ.