މިދިޔަ ފަސް އަހަރުތެރޭ 700 މިލިއަން ރުފިޔާގެ ތަރައްގީ ހޯރަފުށީ ދާއިރާއަށް ގެނެވުނު ކަމަށް އެ ދާއިރާގެ މެންބަރު އަދި މަޖިލީހުގެ ނައިބު ރައީސް އަހުމަދު ސަލީމް މިއަދު ވިދާޅުވެއްޖެއެވެ.
ނަވާރަ ވަނަ ރައްޔިތުންގެ މަޖިލީހުގެ އެންމެ ފަހު ޖަލްސާގައި މެންބަރުންނަށް ވާހަކަ ދެއްކެވުމަށް ދިން ފަހު ފުރުސަތުގައި މަޖިލީހުގައި އޭނާ ކުރެއްވި މަސައްކަތްތަކާ ގުޅޭގޮތުން ސަލީމް ވަނީ ވާހަކަދައްކަވާފައެވެ.
ސަލީމް ވިދާޅުވީ މިދިޔަ ފަސް އަހަރުތެރޭ ހޯރަފުށީ ދާއިރާ ތަމްސީލުކުރަން ލިބި އަދި ދައުރު ނިމިގެންދާއިރު މަޖިލީހުގެ ނައިބުރައީސް ކަމުގެ މަގާމުގައި ހުރެވުނީތީ އުފާކުރައްވާ ކަމަށެވެ.
ސަލީމް ވަނީ މަޖިލީހުގައި މުޅިން އަލަށް އުފެދުނު ކްލައިމެޓް އެންޑް އެންވަޔަރަމަންޓް ކޮމިޓީގެ ކޮމިޓީގެ މުގައްރިރުކަން ފަސް އަހަރު ކުރައްވާފައެވެ.
އެ ކޮމިޓީގައި ވެސް ގިނަ މަސައްކަތްތަކެއް ކުރައްވާފައިވާކަން ފާހަގަކުރައްވާ ސަލީމް ވިދާޅުވީ، ޕާލިމެންޓްރީ ގްރޫޕްގެ މަސައްކަތަކީ މަޖިލީހުގެ މަސައްކަތްތަކުގެ ތެރެއިން އެންމެ ޚާއްސަކަމެއް ދެވުނު މަސައްކަތް ކަމަށެވެ. އެކަމާ ގުޅިގެން ބައެއް ފަހަރަށް ވަރަށް އުނދަގޫ ނިންމުންތައް ނިންމަން ޖެހުނުކަން ސަލީމް ފާހަގަކުރެއްވިއެވެ.
ސަލީމް ވިދާޅުވީ މެންބަރެއްގެ މައްޗަށް ކުރަން ލާޒިމުވާ ހުރިހާކަމެއް ވެސް ކުރީ ކުރެވުނު އެންމެ ފުރިހަމަކޮށް، ތެދުވެރިކަމާއި އިޚުލާސްތެރިކަމާއެކު ކަމަށެވެ.
"ހަމަ ޔަގީނުން ވެސް ހާޒިރީއަށް ފަރުވާބަހައްޓަން އަޅުގަނޑު މަސައްކަތްކުރިން. ޔަގީނުން ވެސް ފަސް އަހަރު ތެރޭގައި އަމިއްލަ ކަމަކަށް އަޅުގަނޑު ޗުއްޓީއެއް ނުނަގަން. މަޖިލީހުގަ ނެތް ނަމަ އަޅުގަނޑު ހުންނާނީ ދާއިރާގެ މަސައްކަތުގެ ތެރޭގަ. ފަސް އަހަރު ތެރޭގަ ރައްޔިތުންނާ ގުޅޭ މަސައްކަތްތައް ކުރުމަށް 46 ފަހަރު އަޅުގަނޑު ދާއިރާއަށް ޒިޔާރާތްކުރިން،" ސަލީމް ވިދާޅުވިއެވެ.
މަޖިލީހުގެ ޖަލްސާއެއްގެ ރިޔާސަތުގައި ހޯރަފުށި ދާއިރާގެ މެންބަރު އަހުމަދު ސަލީމް -- ފޮޓޯ/ މަޖިލިސް
ރައްޔިތުންނަށް މުހިންމު ބިލުތަކާއި ގަރާރުތަކާއި މައްސަލަތައް މަޖިލިސް ތަޅުމަށް ގެނެސް އޭގެ މަސައްކަތްތައް ކުރުމަށް ވެސް އޭނާ މަސައްކަތްކުރި ކަމަށް ސަލީމް ވިދާޅުވިއެވެ.
"އަޅުގަނޑު އަންދާޒާކުރެވުނު ގޮތުގައި މި ފަސް އަހަރުތެރޭ ސަރުކާރުން 700 މިލިއަން ރުފިޔާގެ ތަރައްގީގެ އިންވެސްޓްމަންޓްތައް މި ދާއިރާގެ ތިން ރަށަށް ވަނީ ކޮށްފަ،" ސަލީމް ވިދާޅުވިއެވެ.
"އިއްޒަތްތެރި ރައީސް މިއިން ޒަމާނަކު ރަށްރަށަށް ނާންނަ ކުރިއެރުން މި ދެންނެވި މުއްދަތުގެ ތެރޭ އައިސްފަ ހުރީ. އެކަމަށްޓަކައި ރައީސް އިބްރާހީމް މުޙައްމަދު ޞާލިޙަށް ފަށްފަށުން ޝުކުރުއަދާކުރަން،"
ވޭތުވެދިޔަ ފަސް އަހަރުތެރޭ ހޯރަފުށި ދާއިރާއަކީ ބޮޑެތި ތަރައްޤީގެ ޕްރޮޖެކްޓުތައް ހިންގާފައިވާ އެއް ދާއިރާއެވެ.
އެގޮތުން ހޯރަފުށީގައި އަޅާފައިވާ އެއާޕޯޓު ފާހަގަކޮށްލެވެއެވެ. ރަށުގައި އެޅި އެއާޕޯޓާއެކު އެތައް ބައެއްގެ ތަކުލީފަށް ނިމުމެއް އައި ކަމަށް ސަލީމް ވިދާޅުވިއެވެ.
ހަމަ އެގޮތުން އެ ދާއިރާގައި ހިމެނޭ ތިން ރަށް ކަމަށްވާ އުލިގަމާއި ހޯރަފުއްޓާ ތުރާކުނުގައި ބާވެ ބޭނުންނުކުރެވޭ ފެންވަރުގެ އެތައް އިމާރާތެއް އާ ކުރުމުގެ މަސައްކަތާއި، ކުޅިވަރުކުޅެވޭނެ ތަންތަނާއި އައުޓް ޑޯ ޖިމްތައް ވަނީ ގާއިމުކޮށްފައެވެ.
އަދި ސަލީމް ވަނީ އިހަވަންދިއްޕޮޅުގައި ޓްރާންޝިޕްމަންޓް ބަނދަރެއް ގާއިމުކުރަަން ވެސް ހުށަހަޅާފައެވެ. އެ މަސައްކަތް ވެސް މަޖިލީހުން މިހާރު ވަނީ ފާސްކޮށްފައެވެ.