އިންސްޓާގްރާމް އާއި ތްރެޑްސްގައި އެއް އެއްޕްލިކޭޝަނުން އަނެއް އެޕްލިކޭޝަނަށް އޮޓޯއިން ޕޯސްޓް ޝެއާކުރެވޭ ފީޗާއެއް ނުވަތަ ކްރޮސް ޕޯސްޓިން ފީޗާއެއް ޓެސްޓްކުރަން ފަށައިފިއެވެ.
އިންސްޓަގްރާމުން ޓެސްޓްކުރަމުން އަންނަ މި ފީޗާގެ ސަބަބުން، އިންސްޓަގްރާމްގައި ޕޯސްޓްކުރާ ފޮޓޯ ނުވަތަ ޓެކްސްޓް ޕޯސްޓްތައް ސީދާ ތްރެޑްސް އެޕްލިކޭޝަނަށް ކްރޮސް ޕޯސްޓް ކުރުމުގެ އިތުރުން ތްރެޑްސްގައި ޕޯސްޓްކުރާ ފޮޓޯތައް އިންސްޓަގްރާމަށް ޝެއާ ކުރެވޭނެ ކަމަށް ވެސް ރިޕޯޓްތައް ބުނެއެވެ.
ޓެކްކްރަންޗް އިން ބުނި ގޮތުގައި ބައެއް އިންސްޓަގްރާމް އެކައުންޓްތަކަށް މިހާރު ޓޯގަލް އޮޕްޝަނެއްގެ ގޮތުގައި މިފީޗާ ފެންނަން ހުންނާނެއެވެ.
މިފިޗާގެ ފުރަތަމަ މަރުޙަލާގައި ޓެސްޓް ކުރަމުންދަނީ ހަމައެކަނި ފޮޓޯތަކަށެވެ. ވީޑިއޯ ޕޯސްޓްތައް ނުވަތަ އިންސްޓަގްރާމްގެ ރީލްސްތައް ތްރެޑްސްއަށް ޝެއާ ކުރުމަކީ ކްރޮސް ޕޯސްޓިން އޮޕްޝަން މެދުވެރިކޮށް މިވަގުތަށް ސަޕޯޓް ކުރާ ކަމެއް ނޫނެވެ.
އިންސްޓަގްރާމް ޕޯސްޓުގެ ކެޕްޝަންތައް ވެސް ތްރެޑްސް ޕޯސްޓަށް ޓެކްސްޓްގެ ގޮތުގައި ޓްރާންސްފާ ކުރި ނަމަވެސް، ކޮންމެ ހޭޝްޓެގެއް އޮޓޮމެޓިކުން ނައްތާލާނެއެވެ.
ކްރޮސް ޕޯސްޓިން ފީޗާގެ ސަބަބުން އިންސްޓަގްރާމް ޔޫޒަރުންނަށް މެޓާގެ އެހެނިހެން ޕްލެޓްފޯމްތަކުގައި އެމީހުންގެ ޚިޔާލާއި ވިސްނުން ފަސޭހަކަމާއެކު ހިއްސާކުރެވޭނެއެވެ. އެގޮތުން އިންސްޓަގްރާމާއި ތްރެޑްސްގެ އޯޑިއަންސަށް އެއްފަހަރާ ފޮޓޯތައް ދެއްކުމުގެ ހިތްހަމަޖެހުން ލިބިގެންދާނެއެވެ.
މެޓާއިން މީގެ ކުރިން ވެސް ވަނީ އިންސްޓަގްރާމާއި ފޭސްބުކްއާ ދެމެދު އެފަދަ ކްރޮސް ޕޯސްޓިން ގާބިލްކަން ޓެސްޓްކޮށްފައެވެ.
މެޓާގެ އަމާޒަކީ އެ ކުންފުނީގެ އެޕްލިކޭޝަންތަކުގެ މެދުގައި އިންޓަގްރޭޝަން އަދި ޝެއާ ފްލޯ ރަނގަޅު ކުރުމެވެ.