ފަލަސްތީނުގެ ރައްޔިތުންނަށް އިންސާފު ހޯދައިދޭން އިސްލާމީ އުންމަތުގެ ލީޑަރުންނަށް ދިވެހިރާއްޖޭގެ ފަރާތުން އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސަޢީދު ގޮވާލައްވައިފިއެވެ.
މިނިސްޓަރު މި ގޮތަށް ގޮވާލައްވާފައިވަނީ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ން އިންތިޒާމުކޮށްގެން ގެމްބިޔާގެ ވެރިރަށް ބަންޖުލްގައި ފަށާފައިވާ، އިސްލާމީ ޤައުމުތަކުގެ އެންމެ އިސްވެރިންގެ 15 ވަނަ ސަމިޓު (އިސްލާމިކް ސަމިޓު)ގައި ރައީސް ޑރ. މުޙައްމަދު މުޢިއްޒުގެ ޚާއްސަ މަންދޫބުގެ ހައިސިއްޔަތުން ވާހަކަދަައްކަވަމުންނެވެ.
މިނިސްޓަރުގެ ވާހަކަފުޅުގައި، ފަލަސްތީނުގައި ކުރެވެމުންދާ ހަނގުރާމަ ހުއްޓާލުމަށާއި، އެކަށީގެންވާ ގޮތެއްގައި އެ ގައުމުގެ ރައްޔިތުންނަށް ވީ އެންމެ އަވަހަކަށް އިންސާނީ އެހީތެރިކަން ފޯރުކޮށްދޭނެކަމުގެ ޔަގީންކަން އިސްލާމީ ގައުމުތަކުން ދިނުމަށް ގޮވާލެއްވިއެވެ. އަދި، ފަލަސްތީނުގެ ރައްޔިތުންނަށް ދެމެހެއްޓެނިވި ސުލްހަ ގެނެސްދިނުމަށްޓަކައި، އދ. ގެ ސަމާލަތީ މަޖިލީހުން އެކަށީގެންވާ ފިޔަވަޅު އަޅާފައިނުވާކަން ޝަހީމްގެ ވާހަކައިގައި ފާހަގަކުރެއްވިއެވެ.
އެ ގޮތުން މި ސަމިޓުގައި ރައީސް މުޢިއްޒުގެ ޚާއްސަ މަންދޫބުގެ ހައިސިއްޔަތުން މިނިސްޓަރު އެދިވަޑައިގަތީ ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ލާއިންސާނީ ޖަރީމާތަކަށް އިސްރާއީލު ޖަވާބުދާރީ ކުރުވުމަށް އިސްލާމީ ޤައުމުތަކުން އިތުރު މަސައްކަތްތަކެއް ކުރުމަށެވެ.
މި ސަމިޓުގައި ޝަހީމްވަނީ މިޔަންމާގައި ރޮހިންޔާ ނަސްލު ނައްތާލުމަށް ހިންގަމުންދާ ލާއިންސާނީ އަމަލުތަކުގެ މައްސަލަ ވެސް ފާހަގަކުރައްވާފައެވެ.
މި ކަމާ ގުޅިގެން މިނިސްޓަރު ވިދާޅުވީ އިންޓަނޭޝަނަލް ކޯޓް އޮފް ޖަސްޓިސްގައި މިޔަންމާއާ ދެކޮޅަށް ގެމްބިއާއިން ހުށަހަޅާފައިވާ މައްސަލައިގައި އެ ގައުމުން ކުރަމުންދާ މަސައްކަތްތަކުގައި ގާތުން މަސައްކަތްކުރުމަށް ރާއްޖެއިން ޝައުޤުވެރިވާ ކަމަށެވެ.
މީގެ އިތުރުން، އޭނާ ވަނީ އިސްލާމްދީނާއި ދެކޮޅަށް ހިންގަމުންދާ އެކިއެކި ހަރަކާތްތައް ހުއްޓުވުމަށް ވެސް ގޮވާލައްވާފައެވެ. އެ ގޮތުން އިސްލާމްދީނުގައި ބާރުއަޅާ، ސުލްޙަވެރިކަމާއި އެކުވެރިކަމާ އެކު، އެއްބަޔަކު އަނެއް ބަޔަކަށް އިޙުތިރާމުކުރުމާއި، ކެތްތެރިކަން އިސްކުރުންފަދަ، ކަންކަމުގެ މައުލޫމާތު ފެތުރުމުގެ މުހިންމުކަމުގެ މައްޗަށް ވެސް މިނިސްޓަރު އަލިއަޅުއްވާލެއްވިއެވެ.
ކޮންމެ ތިން އަހަރަކުން އެއް ފަހަރު ބާއްވާ އިސްލާމިކް ސަމިޓަކީ އިސްލާމީ އުއްމަތަށް ކުރިމަތިވާ އެކިއެކި ކަންތައްތަކާ ގުޅޭގޮތުން އިސްލާމީ ގައުމުތަކުގެ އިސްވެރީންގެ މެދުގައި މަޝްވަރާކޮށް، ސިޔާސަތުތައް ކަނޑައެޅުމާ އެކު، އުންމަތާ ގުޅޭ އިރުޝާދު ދިނުމަށް ބާއްވާ ސަމިޓެކެވެ.
އިއްޔެ ފެށި މި ސަމިޓު ކުރިއަށްދާނީ މިއަދުގެ ނިޔަލަށެވެ. މި އަހަރުގެ އިސްލާމިކް ސަމިޓުގެ ޝިޢާރެއްގެ ގޮތުގައި ކަނޑައަޅާފައިވަނީ "ދެމެއްޓެނިވި ތަރައްގީއަށްޓަކައި މަޝްވަރާ މެދުވެރިކޮށް އެއްބައިވަންތަކަން އިތުރުކުރުން" މިއެވެ.
މި އަހަރު ފެށި 14 ވަނަ އިސްލާމިކް ސަމިޓުގެ ރިޔާސަތު ބެލެހެއްޓި ސަޢޫދީ ޢަރަބިއްޔާއިން ވަނީ ސަމިޓުގެ ރިޔާސަތު ބެލެހެއްޓުން ގެމްބިއާއާ ހަވާލުކޮށްފައެވެ. މި ސަމިޓުގައި ތިން ލިޔުމަކަށް ގޮތެއް ނިންމުމަށް ހިމަނާފައިވެއެވެ. އޭގެ ތެރޭގައި، ފަލަސްތީނާއި އަލްޤުދުސް އަޝް-ޝަރީފްގެ މައްސަލައިގެ ޤަރާރަށް ގޮތެއް ނިންމުން ހިމެނެއެވެ.
ރާއްޖެ އޯއައިސީގެ މެންބަރު ޤައުމަކަށްވީ 1976 ވަނަ އަހަރުގައެވެ. އަދި، 57 މެންބަރު ޤައުމު ހިމެނޭ އޯއައިސީގައި ބައިވެރިވީއްސުރެ ރާއްޖެއިން އަންނަނީ ހަރަކާތްތެރި މެންބަރެއްގެ ދައުރު އަދާކުރަމުންނެވެ.