ރައްޔިތުންގެ މަޖިލީހުގެ އިންތިޚާބުގައި އިދިކޮޅު އެމްޑީޕީއަށް ނާކާމިޔާބުވީ ކޮން ސަބަބުތަކަކާހުރެތޯ ބެލުމަށް އެ ޕާޓީގެ މެންބަރުންނާއި އާންމު ރައްޔިތުންގެ މަޝްވަރާ ވެސް ހޯދައިގެން ދިރާސާއެއް ހެދުމަށް ނިންމައިފިއެވެ.
ރޭ އޮތް އެމްޑީޕީގެ ގައުމީ މަޖިލީހުގެ ބައްދަލުވުމަށް ފަހު އެ ޕާޓީން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އެ ޕާޓީގެ ޗެއާޕާސަން ފައްޔާޒު އިސްމާޢީލް ވިދާޅުވީ އެމްޑީޕީގެ ކުރިމަގު ބައްޓަންވާނީ އެ ދިރާސާތަކުގެ މައްޗަށް ކަމަށެވެ.
އެމްޑީޕީގެ ގައުމީ މަޖިލީހުގެ ބައްދަލުވުމުގައި އެ ޕާޓީއަށް ރައްޔިތުންގެ މަޖިލީހުގެ އިންތިޚާބުގައި ނާކާމިޔާބުވީ ސަބަބުތަކާ ގުޅޭ ގޮތުން މެންބަރުން މަޝްވަރާކުރުމަށް ފަހު ނިންމީ އެ ދިރާސާއަށް ފަހު ކުރިޔަށް ދިއުމަށް ކަމަށް އޭނާ ވިދާޅުވިއެވެ.
"ދިވެހިރައްޔިތުންނާއި އެމްޑީޕީގެ މެންބަރުން އެމްޑީޕީ ބައްޓަންކުރަން ކުރިޔަށް އޮތް މުސްތަގުބަލަށް ބޭނުންވަނީ ކޮންކޮން ގޮތްތަކެއްތޯ ފާހަގަކުރުން. މައިގަނޑު ގޮތަކަށް ވަކިވަކި ކަންތައްތަކަކަށްވުރެ ބޮޑަށް އެ ދިރާސާގެ އަލީގައި އަޅުގަނޑުމެން ކުރިޔަށްދާން މި ނިންމީ،" ފައްޔާޒު ވިދާޅުވިއެވެ.
މި ނިމޭ މަޖިލިސް ދައުރުގައި ސުޕަ މެޖޯރިޓީ ހޯދި އެމްޑީޕީއަށް ނިމިދިޔަ ރައްޔިތުންގެ މަޖިލީހުގެ އިންތިޚާބުގައި ލިބިފައިވަނީ 12 ގޮނޑިއެވެ.
މިކަމާ ގުޅިގެން ފައްޔާޒު ވިދާޅުވީ މިއީ އެ ޕާޓީގެ ލީޑަޝިޕް ބަދަލުކުރަންޖެހޭ ވަގުތު ކަމަށް ގަބޫލުނުކުރައްވާ ކަމަށެވެ. އެހެން ނަމަވެސް އެ ޕާޓީ އަލުން ވަރުގަދަކުރުމަށް ފަހު، ލީޑަޝިޕް ބަދަލުކުރަން ޖެހިއްޖެ ނަމަ، އެ ފުރުސަތު ދޭނެ ކަމަށް އޭނާ ވިދާޅުވިއެވެ.
އެމްޑީޕީގެ ކޮންގްރެސް އަންނަ އަހަރު ބޭއްވުމަށް ހަމަޖެހިފައިވާ ކަމަށާއި، ކޮންގްރެސްގައި ވެސް ޕާޓީގެ ލީޑަޝިޕް ބަދަލުކުރުން ފަދަ ކަންކަމާ މެދު މަޝްވަރާކޮށް، އެ ފަދަ ކަމަކަށް ޖާގަ ބޭނުންވާ ކަމުގައިވާ ނަމަ، އެ ޖާގަ އޮންނާނެ ކަމަށް ފައްޔާޒު ވަނީ ވިދާޅުވެފައެވެ.
ފައްޔާޒު އިތުރަށް ވިދާޅުވީ އެމްޑީޕީއަށް މަޖިލީހުގެ މެޖޯރިޓީ ނުލިބުނު ކަމުގައިވީ ނަމަވެސް، މަޖިލީހުގެ ތެރެއިންނާއި އެ ޕާޓީގެ އޮނިގަނޑުގެ ތެރެއިން ސަރުކާރު ޖަވާބުދާރީ ކުރުވުމަށް ކުރަން ޖެހުނު ހުރިހާ މަސައްކަތެއް ކުރަމުން ގެންދާނެ ކަމަށެވެ.
މި ބައްދަލުވުމުގައި ވާހަކަފުޅު ދައްކަވަމުން އެމްޑީޕީގެ ރައީސް އަބްދުﷲ ޝާހިދު ވިދާޅުވީ އެމްޑީޕީއަކީ އިންތިޚާބަކުން ބަލިވުމުން "ދުވެފިލާނެ" ޕާޓީއެއް ނޫން ކަމަށެވެ.
އެ ގޮތުން 2013ވަނަ އަހަރުގެ ރިޔާސީ އިންތިޚާބާއި 2014ވަނަ އަހަރުގެ މަޖިލިސް އިންތިޚާބު އެމްޑީޕީއަށް ނާކާމިޔާބުވުމުން، ދިރާސާއެއްކޮށް، އެ މަގުން ހިނގައިގަނެ، 2018ވަނަ އަހަރުގެ ރިޔާސީ އިންތިޚާބު ކާމިޔާބުކޮށް، ޖެހިގެން އައި އަހަރު މަޖިލިސް އިންތިޚާބު ކާމިޔާބު ކުރި ކަމަށް ޝާހިދު ވިދާޅުވިއެވެ.
"އަޅުގަނޑުމެން މި ގެންދާ ތަރުތީބުން ކަންތައްތައް ގޮސް ނިމޭއިރު، އިރާދަކުރެއްވިއްޔާ އެމްޑީޕީގެ ކުރިމަގު ހަމަ އެހާ އުޖާލާ، އަދި ދިވެހިރާއްޖޭގެ ކުރިމަގު ވެސް އެހާ އުޖާލާ،" ޝާހިދު ވިދާޅުވިއެވެ.
މިދިޔަ މަހު ބޭއްވި މަޖިލިސް އިންތިޚާބުގައި ވެރިކަން ކުރާ ޕީއެންސީންވަނީ 66 ގޮނޑިއާއެކު ސުޕަމެޖޯރިޓީ ހޯދައިފައެވެ.