ނައިޖީރިއާގެ ޗެސް ޗެމްޕިއަން، ތުންޑޭ އޮނަކޯޔާ ނިއުޔޯކް ސިޓީގެ ޓައިމްސް ސްކެއާގައި 60 ގަޑިއިރު ވަންދެން ހުއްޓާނުލާ ޗެސް ކުޅެ، އެންމެ ދިގު ޗެސް މެރެތަންގެ ގިނިސް ވޯލްޑް ރެކޯޑް މުގުރައިލައިފިއެވެ.
ކުޑަކުދިންނަށް ތައުލީމު ދިނުމަށް ވާކާލާތު ކުރާ 29 އަހަރުގެ އޮނަކޯޔާ އަމާޒަކީ ޗެސް ކުޅެގެން މުޅި އެފްރިކާގެ ކުޑަކުދިންނަށް ތައުލީމު ދިނުމަށް އެއް މިލިއަން ޑޮލަރު ހޯދުމެވެ.
އެ ރެކޯޑު މީގެކުރިން އޮތީ ނޯވޭގެ ހޯލްވާޑް ހޯގް ފްލެޓެބޯ އާއި ސްޖޫރު ފެކިންސްޓާޑް އަތުގައެވެ. އެ ދެމީހުން ވަނީ 56 ގަޑިއިރާއި ނުވަ މިނެޓާއި 37 ސިކުންތު ވަންދެން ކުޅެފައެވެ.
އެކަމާގުޅޭ ގޮތުން ގިނިސް ވޯލްޑް ރެކޯޑް ޖަމިއްޔާއިން އަދި އާންމުކޮށް އެއްޗެއް ބުނެފައެއް ނުވެއެވެ.
އޮނަކޯޔާ ކުޅުނީ އެމެރިކާގެ ޗެސް ޗެމްޕިއަން ޝޯން މާޓިނޭޒްއާ ދެކޮޅަށެވެ.
މެޗްގެ ފުރަތަމަ 20 ގަޑިއިރުގެ ތެރޭގައި ޖުމްލަ 22،000 ޑޮލަރު ވަނީ ހޯދައިފައެވެ.