މާލޭގެ ބޮޑުތަކުރުފާނު މަގުގައި މިއަދު ދެ ސައިކަލު އެކްސިޑެންޓުވެ، އެކަކަށް ބޮޑެތި އަނިޔާތަކެއް ލިބިއްޖެއެވެ.
ފުލުހުން "ސަން"އަށް ބުނީ އެ ހާދިސާ ހިނގީ ވިލާ ކޮލެޖު ކައިރީ ކަމަށާއި އެކްސިޑެންޓުގެ ރިޕޯޓް ލިބުނީ 17:53 ހާއިރު ކަމަށެވެ.
ފުލުހުން ބުނީ އެ އެކްސިޑެންޓުގައި އަނިޔާވި މީހާއަށް އައިޖީއެމްއެޗުގައި ފަރުވާ ދެމުން އަންނަ ކަމަށާއި އެ މީހާއަށް ބޮޑެތި އަނިޔާތައް ވެފައިވާ ކަމަށް ހޮސްޕިޓަލުން މައުލޫމާތު ދީފައިވާ ކަމަށެވެ.
ފުލުހުން އަންނަނީ އެ އެކްސިޑެންޓު ހިނގި ސަރަހައްދުގައި ހަރަކާތްތެރިވަމުންނެވެ.
މަގުމަތީގެ ނުރައްކާތެރި އެކްސިޑެންޓުތައް އިތުރުވަމުން އަންނައިރު، އެފަދަ ހާދިސާތަކުގައި ސީރިއަސް އަނިޔާތައް ލިބި، ފުރާނައަށް ނުރައްކާވުން ވެސް ވަނީ އިތުރުވެފައެވެ.
މިމަހުގެ ފަހެއްގައި ހުޅުމާލޭގައި ދެ ސައިކަލު އެކްސިޑެންޓުވުމުން ސީރިއަސް އަނިޔާތަކެއްވި ޒުވާނަކު ރޭ ވަނީ ނިޔާވެފައެވެ.