ތަރައްޤީވެ ކުރިއަރަމުންނަ އާދަޔާ ޚިލާފު ޓެކްނޮލޮޖީ އާޓިފިޝަލް އިންޓެލިޖެންސް (އޭއައި)ގެ ސަބަބުން ގިނަބައެއްގެ ވަޒީފާ ގެއްލިދާނެތީ ކަންބޮޑުވާކަމަށް ދުނިޔޭގެ ޓެކްނޮލޮޖީގެ މާހިރު އަދި މަހުޖަނު ބިލްގޭޓްސް ވިދާޅުވެއްޖެއެވެ.
ބިލް ގޭޓްސް މިހެން ވިދާޅުވީ އޯޕަންއޭއައިގެ ސީއީއޯ ސޭމް އޮލްޓްމަންއާއެކު ބޭއްވި ޕޮޑްކާސްޓް ޑިސްކަޝަން އެއްގައެވެ.
މައިކްރޮސޮފްޓްގެ ކޯ ފައުންޑަރު ބިލް ގޭޓްސް ވަނީ ޗެޓްޖީޕީޓީ ފަދަ އޭއައި މޮޑެލްތަކުގެ ފާހަގަކޮށްލެވޭ ފުރިހަމަކަމާ މެދު ހައިރާންކަން ފާޅުކުރައްވާފައެވެ. ޝޭކްސްފިއާގެ ލިޔުންތައް ފަދަ މައުލޫމާތުތައް މި މޮޑެލްތަކުން ޕްރޮސެސްކުރާ ގޮތް ފުރިހަމައަށް ދެނެގަނެވިފައި ނުވާ ކަމަށް އޭނާ އިއުތިރާފުވި ނަމަވެސް، ގޭޓްސް ވަނީ އޭއައި ޓެކްނޮލޮޖީއަށް ލިބުނު ބޮޑެތި ކުރިއެރުންތައް ގަބޫލުކުރައްވައި، ކުރިން މި ޓެކްނޮލޮޖީއާ މެދު "ވަރަށް ޝައްކުއުފެދުނު" ކަމަށް ވިދާޅުވެފައެވެ.
"ޗެޓްޖީޕީޓީ އެހާ ރަނގަޅުވާނެ ކަމަކަށް އުއްމީދެއް ނުކުރަން،" ގޭޓްސް ވިދާޅުވިއެވެ.
ގޭޓްސް އޭނާގެ ޕޮޑްކާސްޓް ސިލްސިލާ "އަންކޮންފިއުޒް މީ ވިތު ބިލް ގޭޓްސް"ގެ ދާދި ފަހުން ގެނެސްދިން ބައިގައި، އާޓިފިޝަލް އިންޓެލިޖެންސްގެ މިހާރުގެ ހާލަތާއި މުސްތަގުބަލުގެ ކަންކަމާ ބެހޭ ގޮތުން އޯޕަންއޭއައިގެ ސީއީއޯ ސޭމް އޮލްޓްމަންއާ ވާހަކަ ދެއްކެވިއެވެ.
އޯލްޓްމަން ވަނީ އޭއައި އެންކޯޑިން އާއި އޮޕަރޭޝަންތަކުގެ ތެރޭގައި ހުރި ގޮންޖެހުންތައް ދެނެގަތުމުގެ މަގްސަދުގައި އިންޓަޕްރެޓޭބިލިޓީ ރިސާޗަށް ދޭ އަހަންމިއްޔަތުގެ މައްޗަށް އަލިއަޅުއްވާލައްވާފައެވެ.
އިންސާނާގެ ސިކުނޑީގެ މަސައްކަތްދެނެގަތުމާއި، އޭއައި މެކޭނިޒަމްތައް ދެނެގަތުމާ ދެމެދު އެއްގޮތްކަންތައް ފާހަގަކުރައްވަމުން އޮލްޓްމަން ވަނީ އޭއައި ޓެކްނޮލޮޖީގެ ކުރިއެރުމާއި އެޕްލިކޭޝަނަށް އިތުރު ކުރިއެރުމެއް ލިބިގެންދާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ.
ޖީޕީޓީ-1ގެ ކުރިއެރުމާ ބެހޭ ގޮތުން ވާހަކަ ދައްކަމުން އޮލްޓްމަން ވިދާޅުވީ އޯޕަންއޭއައި އިން ޖީޕީޓީ-1 އުފެއްދި އިރު، އެ ކުންފުނިން މަސައްކަތް ކުރި ގޮތާއި އެ މަސައްކަތް ކުރީ ކީއްވެކަން މީހުންނަށް މާ ބޮޑަކަށް ނޭނގޭނެ ކަމަށެވެ.
ގޭޓްސް ވަނީ ދުނިޔޭގެ އެކި ކަންކޮޅުތަކުގައި ހުރި ބޮޑެތި ގޮންޖެހުންތަކުން އަރައިގަތުމަށާއި، އިޖުތިމާއީ މައްސަލަތައް ހައްލުކުރުމަށާއި، ސިއްހީ ދާއިރާއާއި ތައުލީމަށް އިންގިލާބީ ބަދަލުތަކެއް ގެނައުމުގެ ފުރުސަތު އޭއައިއަށް އޮތްކަން ފާހަގަކުރައްވާފައެވެ. އެހެންނަމަވެސް، އާޓިފިޝަލް އިންޓެލިޖެންސްގެ ސަބަބުން ކުރިމަތިވާ ނޭދެވޭ އަސަރުތަކާއި، ޚާއްޞަކޮށް، ފުޅާ ދާއިރާއެއްގައި ވަޒީފާ ގެއްލުމާ ބެހޭގޮތުން ވެސް އޭނާ ވަނީ ކަންބޮޑުވުން ފާޅުކުރައްވާފައެވެ.
"ގިނަބައެއްގެ ވަޒީފާ ވެސް ގެއްލޭނެ އެއީ އަޅުގަނޑު ވަރަށް ކަންބޮޑުވާކަމެއް،" ގޭޓްސް ވިދާޅުވިއެވެ.