ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދުމުގެ ޖަލްސާ ޣިޔާސުއްދީން ސްކޫލުގައި ބާއްވަނީ އެ ޖަލްސާ ބޭއްވުމުގެ ހުއްދަ ބާތިލުކޮށް، އެކަން އަންގާފައި ވަނިކޮށް ކަމަށް ފުލުހުން މިރޭ ބުނެފައިވަނިކޮށް، އެ ޖަލްސާ ރާޅުގަނޑު ސަރަހައްދުގައި ބާއްވަން ނިންމައިފިއެވެ.
ޖަލްސާ ރާޅުގަނޑު ސަރަހައްދަށް ބަދަލުކުރަން ނިންމީ ފުލުހުން ޣިޔާސުއްދީން ސްކޫލަށް އެއްވެސް މީހަކަށް ނުވަދެވޭހެން ބަންދުކުރުމާ ގުޅިގެންނެވެ. އެހެންވެ އެ ޖަލްސާއަށް އިލެކްޝަންސް ކޮމިޝަންގެ މެމްބަރުންނަށް ވެސް ވަދެވޭ ގޮތެއް ނުވިއެވެ.
އެހެންވެ އެ ޕާޓީގެ ލީޑާޝިޕުންވަނީ ޖަލްސާ މިރޭ ދެން ބާއްވާނީ ރާޅުގަނޑު ސަރަހައްދުގައި ކަމަށާއި، އެ ތަނަށް ހުރިހާ މެމްބަރުން ވެސް އެއްވުމަށް އެދިފައެވެ.
ޕީއެންއެފްގެ ޖަލްސާ މިރޭ 9:15ގައި ބާއްވަން ޕާޓީގެ ލީޑަރުންނާއި މެންބަރުން ދިޔުމުން ފުލުހުން ވަނީ ސްކޫލަށް ވަނުމަށް ހުރަސް އަޅައިފައެވެ.
އެކަމާ ގުޅިގެން ފުލުހުންގެ ތަރުޖަމާނު އަހްމަދު ޝިފާން މީޑިއާތަކާ ހިއްސާކުރެއްވި މެސެޖެއްގައި ވިދާޅުވީ ޣިޔާސުއްދީން ސްކޫލުގައި މިރޭ ޖަލްސާ ބާއްވަން އެ ސްކޫލުން ފުރަތަމަ ހުއްދަ ދިން ނަމަވެސް ފަހުން އެ ހުއްދަ ބާތިލުކޮށް އެކަން އެ ޕާޓީއަށް އެންގި ކަމަށެވެ.
އެހެންނަަވެސް، އެ ޕާޓީން ޣިޔާސުއްދީން ސްކޫލުގައި ޖަލްސާ ބާއްވަން މަސައްކަތް ކުރުމުން، އެ ޕާޓީއަށް އެޑިއުކޭޝަން މިނިސްޓްރީ މެދުވެރިކޮށް ފުލުހުންގެ އެހީ ހޯދަން އެދުނީ ކަމަށް ޝިފާން ވިދާޅުވިއެވެ.
އެ މެސެޖާއެކު އޭނާ ވަނީ، ޕީއެންއެފް އުފެއްދުމުގައި އިސްކޮށް އުޅުއްވާ ކުރީގެ ސައިންސް މިނިސްޓަރު މުޙައްމަދު މަލީހު ޖަމާލަށް ފޮނުވާފައިވާ މެއިލްއެއްގެ ސްކްރީންޝޮޓެއް ހިއްސާކުރައްވާފައެވެ.
އެ މެއިލްގައި ވަނީ ލޮޖިސްޓިކްސް މައްސަލަތަކެއްގެ ސަބަބުން، މިރޭ ޖަލްސާ ބާއްވަން ޣިޔާސުއްދީންގެ ހޯލް ދެވެން ނެތް ކަމަށެވެ. އެހެންވެ، އެ ހޯލް ކުއްޔަށް ނެގުމަށް ދައްކާފައިވާ ފައިސާ އަނބުރާ ދޭނެ ކަމަށް ބުނެ، ފައިސާ ފޮނުވަންވީ ގޮތުގެ މައުލޫމާތު ހިއްސާކޮށްދިނުމަށް އެ މެއިލްގައި ވަނީ އެދިފައެވެ.