ޕީޕަލްސް ނޭޝަނަލް ފްރަންޓް (ޕީއެންއެފް) އުފެއްދުމުގެ ޖަލްސާގައި ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ބައިވެރިވެވަޑައިގަތުމަށް ހުއްދަ ދިނުމަށް ކަރެކްޝަނަލް ސާވިސްގައި އެދިއްޖެއެވެ.
"ސަން" އަދި "އެސްއެސްޓީވީ"އަށް ހުކުރު ދުވަހު ދެއްވި ޚާއްޞަ އިންޓަވިއުއެއްގައި ރައީސް ޑރ. މުހައްމަދު މުއިއްޒުވަނީ، ޔާމީން މިނިވަން ކުރެއްވުމަށްވެ ވަޑައިގަތް ވައުދާ ޚިލާފުވެ ވަޑައިގެންފައި ނޯންނާނެ ކަމަށް ވިދާޅުވެފައެވެ.
ޕީއެންއެފް އުފައްދަން އިސްކޮށް އުޅުއްވާ ކުރީގެ ސައިންސް މިނިސްޓަރު މަލީހް ޖަމާލް މިރޭ "ސަން"އާ ވާހަކަ ދައްކަވަމުން ވިދާޅުވީ ޕީއެންއެފް އުފެއްދުމުގެ ޖަލްސާގައި ޔާމީނަށް ބައިވެރިވެ ވަޑައިގަތުމުގެ ހުއްދައަށް އެދި، އެ މަނިކުފާނުގެ ގާނޫނީ ވަކީލުންގެ ޓީމުން ކަރެކްޝަންސްއަށް ސިޓީއެއް ހުށަހަޅާފައިވާ ކަމަށެވެ. އަދި ޔާމީން މިނިވަން ކުރުމުގެ ވައުދުގެ މަތީގައި ދެމި ހުންނެވިކަމަށް ރައީސް ވިދާޅުވެފައިވާއިރު، އުންމީދު ކުރައްވަނީ ވެސް އެ ގޮތަށް ރައީސް ހުންނެވި ކަމަށް، ކަމަށް މަލީހު ވިދާޅުވިއެވެ.
"ރައީސް ޔާމީންގެ ގާނޫނީ ވަކީލުންގެ ޓީމުން މިއަދު ހެނދުނު ކަރެކްޝަންސްގައި އެދިފަ ވާނީ ޕީއެންއެފް އުފެއްދުމުގެ ޖަލްސާގައި ރައީސް ޔާމީނަށް ބައިވެރިވުމުގެ ހުއްދައަށް. މިހާތަނަށް ކަރެކްޝަންސްގެ ޖަވާބެއް އަދި ލިބިފައެއް ނުވޭ،" މަލީހު ވިދާޅުވިއެވެ.
މަލީހު ވިދާޅުވީ ޕީއެންއެފް އުފެއްދުމުގެ ޖަލްސާ ބާއްވާނެ ތާރީޚެއް އަދި ކަނޑައެޅިފައި ނެތަސް، އެ ތާރީޚު ވަރަށް އަވަހަށް އިއުލާން ކުރާނެ ކަމަށެވެ.
މިދިޔަ ރިޔާސީ އިންތިޚާބުގައި ޕީޕީއެމް، ޕީއެންސީގެ ފަރާތުން ރައީސް މުއިއްޒު ވާދަކުރެއްވީ، ޔާމީންގެ ކެންޑިޑެސީ ސުޕްރީމް ކޯޓުން ބާތިލްކުރުމާއެކު، އިންތިހާބުގައި ވާދަކުރެއްވުމުގެ ފުރުސަތު އެ މަނިކުފާނަށް އެއްކޮށް ގެއްލުމުންނެވެ.
ޔާމީން މިނިވަން ކުރެއްވުމަށް ވެވަޑައިގަތް ވައުދާ ޚިލާފުވެފައިނުވާނެ ކަމަށް ރައީސް މުއިއްޒު ވިދާޅުވެފައިވާއިރު، އެ މަނިކުފާނުގެ އެންމެ ބޮޑު އެއް ރިޔާސީ ވައުދަކީ 11 އަހަރުގެ ޖަލު ހުކުމެއްގައި ހުންނެވި ޔާމީން މިނިވަން ކުރެއްވުމެވެ.
އެހެން ނަމަވެސް ޔާމީނާއި ސަރުކާރާ ދެމެދުގައި މައްސަލަތަކެއް ޖެހި ޔާމީން، ޕްރޮގްރެސިވް ކޮންގްރެސް ކޯލިޝަން ދޫކުރައްވައި، ޕީއެންއެފްގެ ނަމުގައި ޕާޓީއެއް އުފެއްދެވުމުގެ މަސައްކަތް ފެއްޓެވިއެވެ.
އެ ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުގެ ހުއްދަ ދިނީ މިދިޔަ އަހަރުގެ ނޮވެންބަރު 29ގައެވެ.
ކަރެކްޝަންސްއިން ޝަރުތުތަކަކާ އެކު ޔާމީން ގޭންބަންދަށް ބަދަލުކޮށްފައި ހުރި ނަމަވެސް ސިޔާސީ މަސައްކަތްތަކުގައި ބައިވެރިވުމަކީ މަނާކަމެކެވެ. ނަމަވެސް، އެ މަނިކުފާނު ޕީއެންއެފްގެ ޖަލްސާތަކުގައި ބައިވެރިވެ ވަޑައިގެން، ޖަލްސާގައި ވާހަކަ ދައްކަވާ ބޭފުޅުންނާ ސުވާލު ކުރައްވައެވެ.
ކަރެކްޝަނަލް ސާވިސްއިން ޔާމީނަށް ހުއްދަ ދީފައި އޮތީ ކަސްރަތު ކުރުމަށާއި ސިއްހީ ސަބަބުތަކަށާއި މުހިންމު ކަންކަމަށް މީހުންނާ ބައްދަލުކުރުމަށެވެ.
ގޭބަންދުގައި ހުންނަވައިގެން މީގެ ކުރިން ބައެއް ސިޔާސީ ހަރަކާތްތަކުގައި ޔާމީން ބައިވެރިވެ ވަޑައިގަތުމުން ކަރެކްޝަންސްއިން އެ މަނިކުފާނާ އެކު ހަދާފައިވާ އިގްރާރު ބާތިލްކުރާނެ ކަމުގެ އިންޒާރު ވެސް ދިނެއެވެ.
އެހެން ނަމަވެސް އޭގެ ފަހުން ވެސް ޔާމީން ވަނީ ކެމްޕޭން ބައެއް ހަރަކާތްތަކުގައި ބައިވެރިވެ ވަޑައިގެންފައެވެ.
ޔާމީން 11 އަހަރަށް ޖަލަށް ލާން ކްރިމިނަލް ކޯޓުން ޑިސެމްބަރު 25، 2022ގައި ހުކުމްކުރީ، ފަތުރުވެރިކަމަށް އާރަށް ދޫކުރުމުގެ މުއާމަލާތާ ގުޅިގެން ދައުލަތުން އުފުލި ރިޝްވަތު ގަބޫލުކުރުމާއި އެ ފައިސާ ލޯންޑާ ކުރުމުގެ ދެ ދައުވާ ވެސް ސާބިތުވުމުންނެވެ.