ކޮންމެ ރޯދަމަހަކަށްވެސް ޚާއްސަކޮށްގެން ޕީއެސްއެމްއިން ގެންނަ "އިހުސާސް" ޕްރޮގްރާމުގެ މިއަހަރުގެ ސީޒަންގައި ޚާއްސަ އެހީއަށް ބޭނުންވާ ކުއްޖެއް ނިކަމެތިކޮށް, ސުވާލުކުރި ކަމަށް ބުނެ އާންމުންގެ ފާޑުކިޔުންތައް އަމާޒުވަމުން ދާތީ އެ ޕްރޮގްރާމްގެ ބާކީ އެޕިސޯޑުތައް ޕީއެސްއެމްގެ ކޮންޓެންޓް ކޮމިޓީން އިތުރަށް ބެލުމަށްފަހު ދެއްކުމަށް ނިންމައިފިއެވެ.
މިއަހަރުގެ ޝޯގެ ފުރަތަމަ އެޕިސޯޑްގައި މެހެމާނުންގެ ގޮތުގައި ޝޯގައި ތިބި ޚާއްސަ އެހީއަށް ބޭނުންވާ ކުއްޖާއާއި އޭނާގެ މަންމައަށް ޕްރެޒެންޓަރު އަދި ސޯޝަލް އެންޑް ފެމިލީ ޑިވެލޮޕްމެންޓް މިނިސްޓްރީގެ ނައިބު ވަޒީރު އާމިނަތު ނަމްޒާ ސުވާލުކުރީ ކުއްޖާ އިތުރަށް ނިކަމެތިކޮށް، އާއިލާ ރޮއްވަލާއިގޮތަށް ކަމަށްބުނެ އާންމުންގެ ތެރޭގައި ދަނީ ފާޑުކިޔަމުންނެވެ.
މިކަމާ ގުޅިގެން ޕީއެސްއެމްގެ މެނޭޖިން ޑިރެކްޓަރު، ޒީނާ ޒާހިރު "ސަން"އަށް ވިދާޅުވީ ބުދަ ދުވަހު ޝޯ އޮންއެއާ ކުރި ފަހުން، އެ ޕްރޮގްރާމްގައި އިތުރަށް ރަނގަޅު ކުރަން ހުރި ކަންކަމާ ގުޅޭ ގޮތުން އެޗްއޯޑީ މީޓިންއެއްގައި މަޝްވަރާ ކުރިކަމަށެވެ.
"ބުރާސްފަތި ދުވަހުގެ ހެނދުނު އިތުރަށް ރަނގަޅު ކުރަން ހުރި ކަންކަމާ ގުޅޭ ގޮތުން އަދި ސެންސިޓިވް ކަންކަމާ ގުޅޭ ގޮތުން އެޗްއޯޑީ މީޓިންގައި އަޅުގަނޑު މަޝްވަރާ ކުރިން. އޭގެ ފަހުން އާންމުންގެ ކަންބޮޑުވުންވެސް ފާޅުކުރަން ފެށީ،" ޒީނާ ވިދާޅުވިއެވެ.
ޒީނާ ވިދާޅުވީ އެ ޕްރޮގްރާމަކީ ދުވަސްތަކެއް ކުރިން ރިކޯޑް ކޮށްފައި ހުރި ޕްރޮގްރާމަކަށް ވުމުން ޕްރޮގްރާމް ނުގެންނަގޮތަށް ނިންމާފައިނުވާކަމަށެވެ.