ދިވެހިން ދައްކާ ވާހަކަ ތާނައިން ލިޔެވޭ ސޮފްޓްވެއާއެއް، ޝަރުއީ ދާއިރާއަށް މިއަދު ތައާރަފުކޮށްފިއެވެ.
ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ)އިން މިއަދު ބޭއްވި ރަސްމިއްޔާތެއްގައި 'ކޭލި'ގެ ނަން ދީފައިވާ އެ ސޮފްޓްވެއާ އިފުތިތާހުކޮށްދެއްވީ އުއްތަމަ ފަނޑިޔާރު މުއުތަސިމް އަދުނާނެވެ.
ޑީޖޭއޭއިން ބުނީ، އެ ސޮފްޓްވެއާ ތައާރަފުކުރީ ކޯޓުތަކަށް ހުށަހަޅާ މައްސަލަތައް އެކަށީގެންވާ އަވަސް މިނެއްގައި ހިންގުން މަގުފަހިކޮށްދިނުމުގެ ބޭނުމުގައި ކަމަށެވެ.
'ކޭލި' ސޮފްޓްވެއާ ލޯންޗުކުރުމަށް ބޭއްވި ރަސްމިއްޔާތުގެ ތެރެއިން: އެ ސޮފްޓްވެއާ މެދުވެރިކޮށް، ދިވެހިން ދައްކާ ވާހަކަ ތާނައިން ލިޔެވޭނެ -- ސަން ފޮޓޯ/ އަމަން ލަތީފް
މިއީ އެފަދަ ސޮފްޓްވެއާއެއް ޝަރުއީ ދާއިރާގައި ބޭނުންކުރަން ފަށާ ފުރަތަމަ ފަހަރުކަން ފާހަގަކޮށް ޑީޖޭއޭއިން ބުނީ އެ ސޮފްޓްވެއާ ބޭނުން ކުރަން ފެށުމާއެކު ޝަރީއަތްތަކުގެ ރެކޯޑިންތައް އަކުރުން އަކުރަށް ލިޔުމަށް ހޭދަވާ ވަގުތު އެތައް ގުނައަކަށް ކުޑަކުރެވޭނެ ކަމަށެވެ. އަދި ކޯޓުތަކުގެ ބަޔާންތައް ދުވަހުން ދުވަހަށް ހަލުވިކަމާއެކު ނިންމުމުގެ މަސައްކަތް ކުރެވޭނެ އިންތިޒާމް ހަމަޖެހޭނެ ކަމަށް އެ އިދާރާއިން ބުންޏެވެ.
އެ ސޮފްޓްވެއާ ބޭނުންކުރުމުން، މައްސަލަތައް ނިންމުމަށް ހޭދަވާ ވަގުތު ކުޑަވެ، ހަލުވިކަމާއެކު މައްސަލަތައް ނިންމުމަށް މަގުފަހިވާނެ ކަމަށް ވެސް ޑީޖޭއޭއިން ބުންޏެވެ.
އެ ސޮފްޓްވެއާ ތައްޔާރުކުރުމުގެ މަސައްކަތްތައް ކުރީ އެފަދަ މަސައްކަތްތައް ކުރާ އިންޓެލިއާއިންނެވެ.
'ކޭލި' ސޮފްޓްވެއާ ލޯންޗުކުރުމަށް ބޭއްވި ރަސްމިއްޔާތުގެ ތެރެއިން: އެ ސޮފްޓްވެއާ މެދުވެރިކޮށް، ދިވެހިން ދައްކާ ވާހަކަ ތާނައިން ލިޔެވޭނެ -- ސަން ފޮޓޯ/ އަމަން ލަތީފް
އެ ރަސްމިއްޔާތުގައި އުއްތަމަ ފަނޑިޔާރު ވިދާޅުވީ، 'ކޭލި' ސޮފްޓްވެއާގެ ސަބަބުން ޝަރުއީ ދާއިރާއަށް ގިނަ ފައިދާތަކެއް ވާނެކަމަށާއި ޝަރީއަތްތައް ހިންގައި، ނިންމުމުގައި ފަނޑިޔާރުންނަށް ފަސޭހަވާނެ ކަމަށެވެ.
އެ ސޮފްޓްވެއާގެ ބޭނުންތެރިކަން ފާހަގަކުރައްވައި، ޖުޑީޝަލް ސާވިސް ކޮމިޝަންގެ ރައީސް ހިސާން ޙުސައިން ވިދާޅުވީ، "ކޭލި" ސޮފްޓްވެއާ ބޭނުންކުރަން ފެށުމަކީ ދިވެހި ބަހަށާއި ޝަރުއީ ދާއިރާއަށް އިންގިލާބެއް ގެނުވާނެ ކަމެއް ކަމަށެވެ. އެގޮތުން މީގެ ކުރިން 30 މިނެޓްގެ ބަޔާނެއް ޓައިޕްކުރުމަށް ދެ ގަޑިއިރު ހޭދަވާއިރު މި ސޮފްޓްވެއާ މެދުވެރިކޮށް 30 މިނެޓްގެ ބަޔާނެއް ޓައިޕްކުރުމަށް ހޭދަވާނީ ގިނަވެގެން ތިން މިނެޓް ކަމަށް އޭނާ ވިދާޅުވިއެވެ.