މި އަހަރު ނިމޭއިރު ދުނިޔޭގެ ދެބައިކުޅައެއްބައި ގައުމުތަކުގައި ހިމަބިހި ފެތުރުމުގެ ނުރައްކާ ބޮޑު ކަމަށް ދުނިޔޭގެ ސިއްހަތު ޖަމުއިއްޔާ (ޑަބްލިއުއެޗްއޯ)އިން ބުނެފިއެވެ.
ބަލިން ރައްކާތެރިވުމަށް އަވަސް ފިޔަވަޅުތަކެއް އަޅަން ޖެހޭ ކަމަށް އެ ޖަމިއްޔާއިން ބުނެއެވެ.
ގިނަ ސަރަހައްދުތަކުގައި ހިމަބިހީގެ ކޭސްތައް އިތުރުވަމުން އަންނަނީ މައިގަނޑު ގޮތެއްގައި ކޯވިޑު 19 ފެތުރުނު ދުވަސްވަރު ހިމަބިހިން ދިފާއުވުމަށް ޖަހާ ވެކްސިން ނުޖެހުމުން ކަމަށް ޑަބްލިޔުއެޗްއޯއިން ބުނެއެވެ.
"ކަންބޮޑުވާ ކަމަކީ މި އަހަރު، އިމިއުނައިޒޭޝަން ޕްރޮގްރާމްތަކުގައި ވެކްސިން ފުރިހަމު ނުކޮށް ހުރުން. ވެކްސިންތައް އަވަހަށް ފުރިހަމަ ނުކޮށްފިނަމަ، ހިމަބިހި ފެތުރިގެންދާނެ،" ޖެނީވާގައި ބޭއްވި ބައްދަލުވުމެއްގައި ހިމަބިއްސާއި ރުބެއްލާއާ ބެހޭ ޑަބްލިޔުއެޗްއޯގެ ޓެކްނިކަލް އެޑްވައިޒާ ނަތާޝާ ކްރޯކްރޮފްޓް ވިދާޅުވިއެވެ.
އިގުތިސާދީ ދަތިތަކާއި ހަމަނުޖެހުންތައް ފަދަ މައްސަލަތަކަށް ދޭ އަހަންމިއްޔަތުކަން އެފަދަ މައްސަލަތަކަށް ސަރުކާރުތަކުން ނުދޭ ކަމަށްބުނެ، އެ ބަލިން ކުޑަކުދިން ހިމާޔަތްކުރުމަށް އަވަސް ފިޔަވަޅުތަކެއް އެޅުމަށް ވެސް ނަތާޝާ ވަނީ ގޮވައިލައްވައިފައެވެ.
ހިމަބިއްސަކީ ގައިން ގަޔަށް އަރާ ބައްޔެކެވެ. ހިމަބިހި އާންމުކޮށް ޖެހެނީ ފަސް އަހަރުން ދަށުގެ ކުޑަކުދިންނަށެވެ. އެ ބަލިން ދިފާއުވުމަށް ދެ ޑޯޒް ވެކްސިން ޖަހަން ޖެހެއެވެ.
ކުރިން 2000 ވަނަ އަހަރުން ފެށިގެން ހިމަބިހި ޖެހިގެން މަރުވީ މީހުންގެ އަދަދު 50 މިލިއަނަށްވުރެ އިތުރު ކަމަށް ޑަބްލިޔުއެޗްއޯއިން ހާމަކުރެއެވެ. އަދި، މިދިޔަ އަހަރު ހިމަބިހި ޖެހުނު މީހުންގެ އަދަދު 79 އިންސައްތައަށް އިތުރުވެ، 300،000 އަށްވުރެ މަތިވެފައިވާ ކަމަށް ވެސް އެ އިދާރާގެ ހިސާބުތަކުން ދައްކައެވެ.