ދެމެހެއްޓެނިވި ގޮތަަށް އަޅުކަން ކުރެވޭނެ ރަނގަޅު ގޮތްތައް ކިޔައިދިނުމަށް، ކުރިއަށް އޮތް ރަމަޟާން މަހަށް ތައްޔާރުވުމުގެ ގޮތުން، 'މަރުހަބާ ރަމަޟާން' އަދި 'މައިންޑްފުލް ރަމަޟާން' ނަމުގައި ތައްޔާރީ ކޭމްޕްތައް ބާއްވާނެކަން އިސްލާމީ ކަންތައްތަކާ ބެހޭ ވުޒާރާއިން އިއުލާނުކޮށްފިއެވެ.
ކުރިއަށް އޮތް ރަމަޟާން މަސް އިހްޔާކުރުމުހުގެ ގޮތުން ހިންގާނެ ޕްރޮގްރާމްތަކުގެ މައުލޫމާތު ހިއްސާކުރުމަށް، މިއަދު އިސްލާމީ މަރުކަޒުގައި ބޭއްވި ނޫސްވެރިންގެ ބައްދަލުވުމުގައި، އެ ވުޒާރާއިން ބުނީ މި ކޭމްޕްތައް ފެށޭނީ އަންނަ މާޗު މަހުގެ އެެއް ވަނަ ދުވަހު ކަމަށެވެ.
މަރުހަބާ ރަމަޟާންއަކީ އާންމުންނަށް ހުޅުވާލައިގެން ބާއްވާ ދީނީ ދަރުސްތަކެކެވެ. އަދި، މައިންޑްފުލް ރަމަޟާން އަކީ އޮފީސްތަކާއި ޖަމްއިއްޔާ ޖަމާއަތްތަކަށް ހިންގާ އެއް ދުވަހުގެ ވޯކްޝޮޕްތަކެކެވެ.
މީގެ ކުރީގެ ރަމަޟާން މަސްތަކާ އެއްގޮތަށް މި އަހަރުވެސް، ހަފުތާއަކު ދެ ދުވަހު މިނިސްޓްރީގެ ފަރާތުން އިހްޔާ ޕްރޮގްރާމް ބާއްވާނެއެވެ.
އެއީ މާލެ އާއި މިނިސްޓްރީން ކަނޑައަޅާ ސިޓީތަކާއި ރަށްތަކުގައި ރަމަޟާން މަހުގެ ކޮންމެ އާދީއްތަ އަދި ބުރާސްފަތި ދުވަހެއްގެ ރޭ 21:30 އެވެ.
މީގެ ކޮންމެ ފޯރަމެއްގައި، ދީނީ އިލްމުވެރިއެއް ވަކި މައުޟޫއަކަށް ދަރުސް ދެއްވާނެއެވެ. ސްކޫލު ކުދިންނަށް އަމާޒުކޮށްގެން ޚާއްޞަ އިހްޔާ ފޯރަމްތައް ވެސް ބޭއްވުމަށް ހަމަޖެހިފައިވެއެވެ.
ހަމައެއާއެކު، މާލެ އާއި އަތޮޅުތެރޭގައި ދީނީ ކަންކަމަށް ކުޑަކުދިން އަހުލުވެރުކުރުމަށް ކުޑަކުދިންގެ ހަވީރުތަކާއި ޤުރުއާން މުބާރާތްތައް ބޭއްވުމަށް ހަމަޖެހިފައިވެއެވެ.
އަދި، އާއްމުންގެ މެދުގައި ދީނީ ހޭލުންތެރިކަން ފޯރުކޮށްދިނުމުގެ ގޮތުން ރަމަޟާން މަހުގެ ކޮންމެ އަސުރު ނަމާދެއްގެ ޖަމާއަތަށް ފަހު، ދީނީ ދަރުސް ކުރިއަށް ދާނެއެވެ.
އިސްލާމިކް މިނިސްޓްރީން ބާއްވާ ދަރުސްތަކުގައި އެންމެން ޝާމިލްކުރުމުގެ ސިޔާސަތުގެ ދަށުން، އެ ދަރުސްތައް 'ސައިން ލޭންގުއޭޖް' ނުވަތަ އިޝާރާތުން ވެސް ދައްކާނެއެވެ.
މީގެ އިތުރުން، ރަމަޟާން މަހުގައި ތަރާވީސް ނަމާދުގެ ކަންކަން ހަމަޖެއްސުމާއި، ފިތުރު ޒަކާތާއި އީދު ނަމާދުގެ އެންމެހާ ކަންކަން އެ މިނިސްޓްރީން ހަމަޖައްސާނެކަމަށް މިއަދު މައުލޫމާތު ދިނެވެ.
ރަމަޟާން މަހަށް ހަނދު ސާބިތުކުރުމުގެ ޖަލްސާ ފަލަކީ ކޮމިޓީން ބާއްވަނީ މާޗް މަހުގެ 10 ވަނަ ދުވަހު ކަމަށް މިއަދު މިނިސްޓްރީން ވަނީ އިއުލާނުކޮށްފައެވެ.