ހޮސްޕިޓަލަކުން އެމަޖެންސީ ކޭސްއެއްގެ މައުލޫމާތު ލިބުމާއެކު ގައުމީ އެއާލައިން މޯލްޑިވިއަންގެ އެންމެ އިސްކަމަކަށް ވާންޖެހޭނީ ބަލި މީހާ އުފުލަން ކަމަށް ކަނޑައަޅައި، އެ އެއާލައިންގެ އުސޫލަށް ބަދަލު ގެނެސްފައިވާ ކަމަށް ޓްރާންސްޕޯޓް މިނިސްޓަރު މުޙައްމަދު އަމީން މިއަދު ވިދާޅުވެއްޖެއެވެ.
ގއ. ވިލިނގިލީ ކުއްޖަކު އިތުރު ފަރުވާއަށް މާލެ ގެނައުން ލަސްވި ކަމަށް ބުނެފައިވަނިކޮށް، އެ ކުއްޖާ މިއަދު ނިޔާވުމާ ގުޅިގެން އަމީން އެކްސްގައި ކުރެއްވި ޕޯސްޓެއްގައިވާ ވިދާޅުވީ މިސަރުކާރުން އެންމެ އިސްކަމެއް ދީގެން ކުރިޔަށްގެންދާ އެއް ކަމަކީ އެއާ އެމްބިއުލާންސްގެ ޚިދުމަތް ތައާރަފު ކުރުން ކަމަށެވެ.
އެ ޚިދުމަތް އަންނަ މާޗު މަހުގެ އެކެއްގައި ފަށަން ރާވާފައިވާކަން އޭނާ ފާހަގަކުރެއްވިއެވެ.
އޭނާ އިތުރަށް ވިދާޅުވީ، މިއަދުން ފެށިގެން މޯލްޑިވިއަންގެ އުސޫލަށް ބަދަލުގެނެސް، އެމަޖެންސީ ކޭސްއެއް ލިބިއްޖެ ނަމަ، ފްލައިޓް ޝެޑިއުލުން އެންމެ އިސްކަމެއް ދީގެން އެމަޖެންސީގައި ބަލި މީހާ އުފުލަންޖެހޭ ގޮތަށް މިހާރު ހަމަޖައްސާފައިވާ ކަމަށެވެ.
އެއާ އެމްބިއުލާންސްގެ ޚިދުމަތް ތައާރަފުކުރުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އަދި، ސަރުކާރުގެ ހަފުތާ 14 މަގުޗާޓުގައި ހިމަނުއްވާފައިވާ މުހިންމު މަސައްކަތެކެވެ.
މިއަދު ނިޔާވި ކުއްޖާއަށް ވިލިނގިލިން ފަރުވާ ނުލިބި ލަސްވެގެން ކަމަށް ބުނެ، އެ ރަށު ރައްޔިތުން އެއްވެ، އެ ރަށު ހޮސްޕިޓަލުގެ ނަން ބޯޑު ބަދަލުކޮށް، ހޮސްޕިޓަލް ކުރިމަތީގައި މުޒާހަރާކުރިއެވެ.
މިދިޔަ ބުރާސްފަތި ދުވަހު އެކުއްޖާ މާލެ ގެނެސްފައިވާއިރު، އައިޖީއެމްއެޗްއިން މިއަދު ބުނި ގޮތުގައި، އެ ކުއްޖާ ނިޔާވެފައިވަނީ މިއަދުގެ 11:10ގައެވެ. އެކަމާ ގުޅޭ އިތުރު ތަފުސީލެއް އެ ހޮސްޕިޓަލުން ނުދެއެވެ.
އެ މައްސަލަ ރައްޔިތުންގެ މަޖިލީހަށް ހުށަހަޅާނެ ކަމަށް ވިދާޅުވެ، ވިލިނގިލީ ދާއިރާގެ އެމްޑީޕީ މެންބަރު ސައުދު ހުސައިން ވަނީ މި މައްސަލައާ އިންޑިއާ އައުޓް ހަރަކާތާ ގުޅުވައި ވާހަކަދައްކަވައިފައެވެ.
ޓްރާންސްޕޯޓު މިނިސްޓަރު މުހައްމަދު އަމީން: އޭނާ ވިދާޅުވީ މޯލްޑިވިއަންއަށް ހޮސްޕިޓަލަކުން އެމަޖެންސީ ކޭސްއެއް ލިބިއްޖެ ނަމަ، ފްލައިޓް ޝެޑިއުލުން އެންމެ އިސްކަމެއް ދޭން ޖެހޭނީ ބަލި މީހާ އުފުލަން ކަމަށް -- ސަން ފޮޓޯ: އިންފިނިޓް މޮމަންޓްސް/ މުހައްމަދު ނަދީމް
ސައުދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، އައްޑޫގައި އިހި ނަގަން އުޅެނިކޮށް މިދިޔަ މަހު ގެއްލުނު މުހައްމަދު ނައީޝްގެ މައްސަލަ ވެސް ގުޅިފައިވަނީ އިންޑިއާ އައުޓް ހަރަކާތާ ކަމަށެވެ.
އިންޑިއާއިން ހަދިޔާކުރި ޑޯނިއާ މަތިންދާބޯޓުތައް ނައީޝް ހޯދުމުގެ މަސައްކަތަށް ބޭނުންނުކުރި މައްސަލައަށް އިޝާރާތް ކުރައްވައި ސައުދު ވިދާޅުވީ، އެ ދެ ކުދިން ވެސް ވެފައި ވަނީ އިންޑިއާ އައުޓް ހަރަކާތުން ހިންގި "ދޮގާއި އޮޅުވާލުމުގެ ޝިކާރައަކަށް" ކަމަށެވެ. އަދި އެ ހަރަކާތުގެ ސަބަބުން ދިވެހި ރައްޔިތުންނަށް ކޮންމެ ފަދަ ނިކަމެތި ހާލަތެއް ދިމާވިޔަސް ވަރިހަމަކޮށް، ރައްޔިތުންނަށް އިހުމާލު ވަމުންދާ މަންޒަރު ފެންނަ ކަމަށް އޭނާ ވިދާޅުވިއެވެ.
މިދިޔަ މަހުގެ 21ގައި، އައްޑޫ ސިޓީ ގަމު, ދެކުނު ފަރާތަށް އިހި ނަގަން ގޮސް އުޅެނިކޮށް ގެއްލުނު ނައީޝް ހޯދުމުގެ މަސައްކަތް މިހާތަނަށް ކާމިޔާބެއްނުވެއެވެ.
އިންޑިއާ އައުޓް ހަރަކާތަކީ ރާއްޖޭގައި ތިބި އިންޑިއާގެ ސިފައިން ބޭލުމަށް، މިދިޔަ ދައުރުގައި އިދިކޮޅުގައި އޮތް ޕީޕީއެމް، ޕީއެންސީން ފެށި ހަރަކާތެކެވެ. އެ ކޯލިޝަން ތެރެއިން ވެރިކަމަށް ވަޑައިގެންނެވި ރައީސް މުއިއްޒުގެ އެންމެ ބޮޑު އެއް ވައުދުފުޅަކީ އިންޑިއާ ސިފައިން ބޭލުމެވެ.
އެ މަނިކުފާނު ވެރިކަމާ ހަވާލުވެވަޑައިގަތުމާއެކު އެ މަސައްކަތް ފައްޓަވައި، މާޗު 15ގެ ކުރިން ސިފައިން ބޭލުމަށް ރައީސް ވަނީ އިންޑިއާގައި އެދިވަޑައިގެންފައެވެ.