ސީރިއާގައި ކުރިއަށް ގެންދާ ދާޚިލީ ހަނގުރާމައިގައި ބައިވެރިވާން އެ ގައުމަށް ގޮސްތިބި މީހުންގެ ތެރެއިން މިއަދު ގެނެވުނު ފަސް އާއިލާއެއްގެ 21 މީހުންގެ އިތުރަށް ވެސް އެނބުރި ރާއްޖެ އަންނަން ބޭނުންވާ 90 މީހަކު ހަނގުރާމައިގައި އެބަތިބި ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
ސީރިއަށް ގޮސް ހާލުގައި ޖެހިފައިތިބި ފަސް އާއިލާއެއް މިއަދު ހެނދުނު ވަނީ މާލެ ގެނެސްފައެވެ.
އެ މީހުންގެ މައުލޫމާތު ހިއްސާކުރަން ހޯމް މިނިސްޓަރު އަލީ އިހުސާން މިއަދު ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، އެނބުރި ރާއްޖެ އަންނަން ބޭނުންވާ 90 މީހުން މިހާރު ވެސް ސީރިއާގައި އެބަތިބި ކަމަށެވެ. އެ މީހުން އަނބުރާ ގެންނަން، އެއީ ދިވެހީންކަން ކަށަވަރުކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.
މިނިސްޓަރު ވިދާޅުވީ، ސީރިއަށްދާ މީހުން އާންމުކޮށް ދާ ކަމަށް ފާހަގަކުރެވެނީ އާއިލާގެ ކޮންމެ ވެސް އެއް މެންބަރެއްގެ ނުފޫޒުގައި ކަމަށެވެ.
އިހުސާން ވިދާޅުވީ، ރާއްޖެ އަންނަން ބޭނުންވާ މީހުން ހަނގުރާމައަށް ގޮސް ތިބިކަމުގެ މައުލޫމާތު މިނިސްޓްރީއަށް ލިބެނީ އެންމެ ފުރިހަމައަށް ނޫން ކަމަށާއި އެހެންވެ، މައުލޫމާތު ކަށަވަރުކޮށް އެ މީހުންނަކީ ދިވެހީންކަން ޔަގީންކުރުމުގެ މަސައްކަތް ކުރިއަށްދާ ކަމަށެވެ.
"މި ފަހަރު ގެނެވުނު އެއް އާއިލާއަކީ ބޭސްފަރުވާއަށް އިންޑިއާއަށް ގޮސްފައި، ދެން ފިލައިގެން ދިޔަ މީހުން،" އިހުސާން ވިދާޅުވިއެވެ.
މިނިސްޓަރު ވިދާޅުވީ، ސީދާ ރާއްޖެއިން އެ ސަރަހައްދުތަކަށް ނުދެވޭ ކަމަށެވެ. އެހެންވެ، އެ މީހުން އޮޅުވާލައިގެން ގިނަ ފަހަރަށް ރާއްޖެއިން ބޭރަށް ދަނީ ކޮންމެ ވެސް އެހެން ބޭނުމެއްގައި ކަމަށާއި ގޮސްފައި ބޭރު ގައުމުތަކުން ހަނގުރާމައިގެ މައިދާނަށް ދަނީ ކަމަށް އޭނާ ވިދާޅުވިއެވެ.
މިއަދު އަނބުރާ ގައުމަށް ގެނެސްފައިވަނީ ދިވެހީންކަން ކަށަވަރުކުރެވިފައި ތިބި 21 މީހުންނެވެ. އޭގެ ތެރެއިން 15 ކުދިންނަކީ ކުޑަކުދިން ކަމަށާއި ބާކީ ހަ މީހުންގެ ތެރެއިން ފަސް މީހުންނަކީ އަންހެނުން ކަމަށް މިނިސްޓަރު ވިދާޅުވިއެވެ. އަދި، އެ 15 ކުޑަކުދިންނަކީ އެ ފަސް އަންހެނުންގެ ދަރިންނެވެ.
"އޭގެ ތެރޭގައި އުމުރުން ތިން އަހަރުގެ ކުއްޖަކު ވެސް ހިމެނޭ،" އޭނާ ވިދާޅުވިއެވެ.
ހޯމް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެ ތެރެއިން -- ސަން ފޮޓޯ: އިންފިނިޓް މޮމެންޓްސް/ މުހައްމަދު މާވީ
އިހުސާން ވިދާޅުވީ، އެ މީހުންގެ އައިޑެންޓިޓީ ކަށަވަރު ކުރެވުމާ އެކު އެ މީހުން އަނބުރާ ގައުމަށް ގެންނަން ތުރުކީގެ ސަރުކާރާ އެކު މަޝްވަރާ ކުރެވި، ފުލުހުން ފޮނުވައިގެން އެ މީހުންގެ ހާލުއަހުވާލު ބަލާފައިވާ ކަމަށެވެ.
އެ މީހުން ގެންނަން ބޭނުންވާ ފައިސާ ހޯދައި، ހާއްސަ ފްލައިޓެއް އާދިއްތަ ދުވަހު ތުރުކީއަށް ވަނީ ފޮނުވައިފައެވެ. އެ ފްލައިޓުގައި އެ އޮޕަރޭޝަނަށް ބޭނުންވާ 15 ފުލުހުން ދިޔައެވެ. އޭގެ ތެރޭގައި ސިއްހީ، ސެކިއުރިޓީ އަދި ނަފުސާނީ އެހީތެރިކަން ދެވޭނެ ބޭފުޅުން ހިމެނޭ ކަމަށް މިނިސްޓަރު ވިދާޅުވިއެވެ.
އެ 21 މީހުން މިއަދު ފަތިހު މާލެ އައިސްފައިވާ ކަމަށް އިހުސާން ވިދާޅުވިއެވެ. އެ މީހުން ގެންދާނީ ކ. ހިންމަފުށީގައި ހުރި ނެޝަނަލް ރީއިންޓެގްރޭޝަން ސެންޓަރަށެވެ.
އިހުސާން ވިދާޅުވީ، އެ ސެންޓަރަކީ އާންމު ދިރިއުޅުމަށް ބޭނުންވާ ހުރިހާ ވަސީލަތްތަކެއް އެކުލެވިގެންވާ އަދި މި ފަދަ ޕްރޮގްރާމްތައް ހިންގަން ބޭނުންވާ ސަލާމަތާއި ރައްކާތެރިކަން ވެސް އެ ތަނުގައި ފުރިހަމައަށް ހުންނާނެ ކަމަށެވެ. ފުލުހުން ވެސް އެ ތަނުގެ ސެކިއުރިޓީ 24 ގަޑިއިރު ބަލަހައްޓާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވަނީ އެ މީހުންގެ ފަރާތުން ގައުމީ ސަލާމަތަށް އެއްވެސް ނުރައްކަލެއް ނުވާނެކަމުގެ ޔަގީންކަން އަރުވައިފައެވެ.