ރޯދަ މަހަށް ޚާއްޞަކޮށްގެން ކޮންމެ އަހަރަކު ވެސް އެސްޓީއޯއިން ބާއްވާ "ރަމަޒާން ބާޒާރު 2024" ޕްރޮމޯޝަން ތިން ލައްކަ ރުފިޔާގެ އަގުހުރި އިނާމުތަކާއެކު މިރޭ ފަށައިފިއެވެ.
މިރޭ އެސްޓީއޯ ޕީޕަލްސް ޗޮއިސްގައި ބޭއްވި ރަސްމިއްޔާތެއްގައި މި ޕްރޮމޯޝަން ފައްޓަވައިދެއްވީ އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހީމެވެ.
އެ ރަސްމިއްޔާތުގައި އެސްޓީއޯގެ ސޭލްސް އެސޯސިއޭޓް އައިޝަތު ނަޒާހަތު ވިދާޅުވީ މި ޕްރޮމޯޝަންގެ ތެރެއިން އެކުންފުނީގެ އުފެއްދުންތައް ތަޖުރިބާ ކުރުމުގެ ފުރުސަތު ލިބިގެންދާނެއެވެ.
"ވަރަށް ގިނަ ކަންތައްތަކެއް މި ޕްރޮމޯޝަންގެ ތެރެއިން ކުރިއަށް ދާނެ. ކޮންމެ ބުރާސްފަތި ދުވަހެއްގެ ރޭ އަޅުގަނޑުމެންގެ ޕްރޮޑަކްޓްސްތައް އަޖުމަ ބަލާލުމުގެ ފުރުސަތުވެސް ކަސްޓަމަރުންނަށް ލިބިގެންދާނެ." ނަޒާހަތު ވިދާޅުވިއެވެ.
މިއަދުން ފެށިގެން އޭޕްރީލް މަހުގެ 11 ވަނަ ދުވަހުގެ ނިޔަލަށް ކުރިއަށްގެންދާ މި ޕްރޮމޯޝަންގައި 1000 ރުފިޔާގެ ކޮންމެ ވިޔަފާރިއަކަށް ޑިޖިޓަލް ކޫޕަނެއް ލިބޭނެއެވެ.
އެސްޓީއޯ ރަމަޒާން ބަޒާރަކީ ވިޔަފާރިކުރާ ފަރާތްތަކުގެ ތެރޭގައި އެންމެ މަގުބޫލް އެއް ސޭލްއެވެ. އެހެން އަހަރުތަކެކޭވެސް އެއްގޮތަށް މި އަހަރުގެ އެސްޓީއޯ ރަމަޒާން ބަޒާރުގައި ވެސް ގިނަ ޑިސްކައުންޓްތަކެއް އެސްޓީއޯ ޕީޕަލްސް ޗޮއިސް އަދި އެސްޓީއޯ ރީޖަނަލް ފިހާރަތަކުން ކަސްޓަމަރުންނަށް ލިބޭނެ ކަމަށް އެ ކުންފުނިން ބުންޏެވެ.
އެސްޓީއޯއިން ބުނިގޮތުގައި މި ޕްރޮމޯޝަން ކުރިއަށް ގެންދާނީ ތިން ބަޔަކަށް ބަހާލައިގެންނެވެ. އެގޮތުން ފުރަތަމަ ބައިގައި، ރޯދަމަހުގެ ކުރިން ތިން ނަސީބުވެރިން ނަގާނެ ކަމަށް އެސްޓީއޯއިން ބުންޏެވެ.
އެސްޓީއޯއިން ބުނީ އެއްވަނައަށް ދާފަރާތަކަށް 75000 ރުފިޔާގެ ބަދިގެ ސެޓެއް ލިބޭނެ ކަމަށާއި، ދެވަނައަށްދާ ފަރާތަކަށް ހޯމްއެޕިލިއެންސް ޕެކޭޖެއް ލިބޭނެ ކަމަށެވެ. އަދި ތިންވަނައަށް ދާ ފަރާތަކަށް ތިންރޫމް އެޕަޓްމެންޓުގައި ލެވޭ ވަރަށް ނިޕޯންޕެއިންޓުގެ ކުލަ ހަދިޔާކޮށް، އެޕާޓްމަންޓުގައި ކުލަ ލައިދިނުމަށްވެސް ހަމަޖެހިފައިވާ ކަމަށް އެ ކުންފުނިން ބުންޏެވެ.
މި އަހަރުގެ ރަމަޒާން ބާޒާރު އިފްތިތާހުކުރުމަށް ބޭއްވި ރަސްމިއްޔާތުގެ ތެރެއިން --- ސަން ފޮޓޯ/ އިންފިނިޓްސް މޮމެންޓްސް/ މޫސާ ނަދީމް
މި ޕްރޮމޯޝަންގެ ދަށުން 25 ޕަސެންޓާ ހަމައަށް ޑިސްކައުންޓްތައް ލިބޭއިރު ރޯދަ މަހުގެ ކޮންމެ ހަފުތާއެއްގެ ތެރޭގައި ހޮވާ ނަސީބުވެރި ފަރާތަކަށް 2500 ރުފިޔާގެ ގިފްޓު ވައުޗަރެއް ލިބޭނެއެވެ.
ހަމައެއާއެކު، މުޅި ޕްރޮމޯޝަން ނިމުމުން ތިން ނަސީބުވެރި ފަރާތެއް ހޮވާނެ ކަމަށް ވެސް އެސްޓީއޯއިން ބުންޏެވެ.
އެ ގުރުން އެއްވަނަ އިނާމެއްގެ ގޮތުން ދެމީހަކަށް ތުރުކީ ދެކޮޅު ޓިކެޓް ލިބޭއިރު، ދެވަނަ ނަސީބުވެރިޔަކަށް ހޯމްއެޕިލިއެންސް ޕެކޭޖެއް ލިބޭނެއެވެ. އަދި ތިންވަނަ ފަރާތަކަށް 65 އިންޗީގެ ފިލިޕްސް ޓީވީއެއް ދިނުމަށް އެކުންފުނިން ވަނީ ނިންމައިފައެވެ.
އެހެންކަމުން، މުޅި ޕްރޮމޯޝަންގެ ތެރޭގައި ދޭ ހަދިޔާގެ އަގު ތިން ލައްކަ ރުފިޔާއަށް އަރައެވެ.
އެ ޕްރޮމޯޝަން ކުރިއަށްދާއިރު، ހަފުތާ ތެރޭގައި ޑިސްކައުންޓް ނުލިބޭ ބައެއް ތަކެތިން ހަފުތާ ބަންދުގައި ޑިސްކައުންޓު ލިބޭނެ ކަމަށް އެސްޓީއޯއިން ބުންޏެވެ. އަދި އީ ސްޓޯރު މެދުވެރިކޮށް ވެސް ޕްރޮމޯޝަން ޕްރޮޑެކްޓުތައް ލިބޭނެ ކަމަށާއި ފުރިޖާއި ދޮންނަ މެޝިން ފަދަ އައިޓަމްތައް ގަތުމުން ޑެލިވަރީގެ ޚިދުމަތް ލިބޭނެ ކަމަށް އެކުންފުނިން ބުންޏެވެ.