މިދިޔަ ނޮވެމްބަރު މަހާއި ޑިސެމްބަރު މަހާ އަޅައިބަލާއިރު މި މަހު އިންފްލުއެންޒާއަށް ޕޮޒިޓިވްވާ މިންވަރު އިތުރުވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިރޭ ބުނެފިއެވެ.
އެޗްޕީއޭއިން އާންމުކުރި ތަފާސްހިސާބުން ދައްކާ ގޮތުގައި މިދިޔަ ނޮވެމްބަރު މަހާއި ޑިސެމްބަރު މަހު ވެސް 24 މީހުން އިންފްލުއެންޒާއަށް ޕޮޒިޓިވްވިއެވެ. އެއީ ނޮވެމްބަރު މަހު، އިންފްލުއެންޒާ އޭގެ ވައްތަރެއް ކަމަށްވާ އެޗް3އެން2ގެ ނުވަ ކޭސް އާއި އެޗް1އެން1ގެ 10 ކޭސްއެވެ. އަދި އިންފްލުއެންޒާ ބީއަށް ވެސް އެ މަހު ފަސް މީހުން ޕޮޒިޓިވްވިއެވެ.
މިދިޔަ މަހު، އެޗް3އެން2ގެ ހަތް ކޭހަކާއި އެޗް1އެން1ގެ 14 ކޭސް ފެނިފައިވެއެވެ. އަދި އިންފްލުއެންޒާ ބީއަށް ތިން މީހުން ޕޮޒިޓިވްވިއެވެ.
އެއާ އަޅާބަލާއިރު މިމަހުގެ ފުރަތަމަ 15 ދުވަސް ތެރޭ އެކަނިވެސް 19 މީހުން ވަނީ އިންފްލުއެންޒާގެ ވައްތަރުތަކަށް ޕޮޒިޓިވްވެފައެވެ. އޭގެ ތެރޭގައި އެޗް3އެން2ގެ 10 ކޭހަކާއި އެޗް1އެން1ގެ އަށް ކޭސް ހިމެނެއެވެ. އަދި އިންފްލުއެންޒާ ބީއަށް އެކަކު ޕޮޒިޓިވްވެފައިވެއެވެ.
އެޗްޕީއޭއިން ބުނީ އިންފްލުއެންޒާއަކީ އާއްމުކޮށް ފެތުރޭ، ނޭވާލާ ނިޒާމަށް ޖެހޭ ބައްޔެއް ކަމަށާއި މިބަލި ފެތުރުން ބައެއް ދުވަސްވަރު އިތުރުވާ ކަމަށެވެ.
މި ދުވަސްވަރު އިންފްލުއެންޒާ އިތުރުވާ ސަބަބުތަކުގެ ތެރޭގައި އެޗްޕީއޭއިން ފާހަގަކުރީ، މިއީ ސަރަހައްދީ ގައުމުތަކުގައި ވެސް އިންފްލުއެންޒާ އާއި ކޮވިޑް ފަދަ އަރިދަފުސް ރޯގާތައް އިތުރު ދުވަސް ވަރެއް ކަމުގައި ވުމެވެ. އަދި ސްކޫލް ބަންދާ ދިމާކޮށް ދަތުރުފަތުރު ކުރުން އިތުރުވާމާ ގުޅިގެން މިދުވަސްވަރު އިންފްލުއެންޒާ ރާއްޖޭގައި ފެތުރޭ މިންވަރު އިތުރުވާ ކަމަށް އެ އިދާރާއިން ބުންޏެވެ.
އެޗްޕީއޭއިން ބުނި ގޮތުގައި އިންފްލުއެންޒާ އާއި ކޮވިޑް-19އިން ރައްކާތެރިވުމަށް ޓަކައި އެންމެ މުހިންމު ކަމަކީ ވެކްސިން ޖެހުމެވެ.
"ޚާއްޞަކޮށް ކުޑަކުދިން، އުމުރުން ދުވަސްވީ މީހުން އަދި ދިގު މުއްދަތަށް ފަރުވާ ކުރަންޖެހޭ ބަލިތައް ހުންނަ ފަރާތްތަކުން ވެކްސިން ޖެހުމުން ބަލީގައި ބޮޑުވަރުވުމުން ރައްކާތެރިކޮށްދޭ،" އެ އިދާރާއިން ބުންޏެވެ.
އިންފްލުއެންޒާގެ އަލާމާތްތަކުގެ ތެރޭގައި ކަރުގައި ރިއްސުމާއި ކެއްސުމާއި ނޭފަތުން ފެންއައުމާއި ބޮލުގައި ރިއްސުމާއި ގައިގައި ރިއްސުމާއި ހުން އައުމާއި ބޭރަށް ހިންގުން ހިމެނެއެވެ.
ހުން އައިސް، ރޯގާޖެހި ތިން ދުވަހަށް ވުރެ އިތުރުވާނަމަ ޑޮކްޓަރެއްގެ ލަފާ ހޯދުމަށް އެޗްޕީއޭއިން އިލްތިމާސްކުރެއެވެ.
އެތެރެހަށީގެ ޑޮކްޓަރު، ޑރ. މުޙައްމަދު އަލީ އިއްޔެ އެކްސްގައި ކުރެއްވި ޕޯސްޓެއްގައި ވަނީ އެޗްވަންއެންވަން ޖެހިގެން ފާއިތުވި 30 ދުވަހުގެ ތެރޭގައި ޒުވާނަކު މަރުވެފައިވާ ކަމަށާއި އެ ބަލި ޖެހިފައިވާ އިތުރު ތިން ޒުވާނަކަށް ވެންޓިލޭޓަރުގައި ފަރުވާދެމުން އަންނަ ކަމަށް ވިދާޅުވެފައެވެ.
ނަމަވެސް އެ ބަލި ފެތުރި، އާންމު ބަލިމަޑުކަމަށްވުމަކީ ނާދިރު ކަމެއް ކަމަށް ވެސް ޑރ. މުޙައްމަދު އަލީ ވިދާޅުވިއެވެ.
އޭނާ ވިދާޅުވި ގޮތުގައި މި ބަލި ފެތުރުމަށް މަގުފަހިވަނީ ބަލިން ރައްކާތެރިވުމަށް ވެކްސިންތައް ޖެހުން މަދުވުމުންނެވެ. އެހެންވެ، ވީ އެންމެ އަވަހަކަށް އެންމެންވެސް އިންފްލުއެންޒާ ވެކްސިން ޖެހުމަށް ޑރ. މުޙައްމަދު އަލީ ވަނީ އިލްތިމާސްކުރައްވައިފައެވެ.