މާލޭ މޭޔަރު ކަމަށް ބޭފުޅަކު އިންތިޚާބުކުރަން ބާއްވާ ބައި އިލެކްޝަން މާދަމާ އޮންނައިރު، މާދަމާ ހެނދުނު ވެސް ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާ (މެޓު) އޮފީހުން މިއަދު ލަފާކޮށްފިއެވެ.
މެޓު އޮފީހުން ބުނީ މާލެއަށް މާދަމާގެ ހެނދުނު 10:00 އާ ހަމައަށް ގުގުރުމާ އެކު ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށެވެ. ނަމަވެސް މާދަމާގެ މެންދުރު ފަހު، ވާރޭ ވެހޭނެކަމަށް ލަފާނުކުރެވޭ ކަމަށް ވެސް މެޓު އޮފީހުން ބުންޏެވެ.
މެޓު އޮފީހުގެ އޮފިޝަލަކު ވިދާޅުވީ ވާރޭ ނުވެހުނު ނަމަވެސް މާދަމާ ވެސް އަދި ވައިގަދަވާނެ ކަމަށެވެ. އެގޮތުން އިރުމައްޗާއި އިރު ދެކުނުން ގަޑިއަކު 15 މޭލާއި، 25 މޭލާ ދެމެދުގެ ބާރުމިނަކަށް ވައި ޖެހޭނެ ކަމަށް އެ އޮފީހުން ލަފާ ކުރެއެވެ. އަދި، ވިއްސާރަވެހޭ ގަޑިތަކުގައި 40 މޭލަށް ވައި ގަދަވާނެ ކަމަށް ވެސް ވަނީ ލަފާކޮށްފައެވެ.
ވާރޭ ނުވެހުނު ނަމަވެސް މެދުރާއްޖެ ތެރެއަށް ހޯމަ ދުވަހާ ހަމައަށް ވައި ގަދަވާނެ ކަމަށް ވަނީ ލަފާކޮށްފައެވެ. އަދި، ދެކުނުގެ ރަށްތަކަށް އަންގާރަ ދުވަހާ ޖެހެންދެން ވައިގަދަވާނެ ކަމަށް ވަނީ ލަފާކޮށްފައެވެ.
މީގެ އިތުރުން، މެޓު އޮފީހުން ބުނީ މާލެ ސަރަހައްދަށް ބަލާއިރު ކަނޑުތައް އާދައިގެ ވަރަކަށް ގަދަވާނެ ކަމަށެވެ. އަދި، ރާޅުގެ އުސްމިން ފަސް ފޫޓާއި އަށް ފުޓާއި ދެމެދުގެ އުސްމިނަކަށް އުޅޭނެ ކަމަށް ވެސް އެ އޮފީހުނަ ވަނީ ލަފާކޮށްފައެވެ.
ވިއްސާރަ ދުވަސްތަކަކަށް ފަހު ކުޑަކޮށް މޫސުން ރަނގަޅު ވެލާފައި އަނެއްކާ ވެސް މޫސުން ގޯސްވެ، ބޯކޮށް ވާރޭވެހި މިއަދު މާލޭގެ މަގުތަކުގައި ވެސް ވަނީ ފެންބޮޑުވެފައެވެ. ރާއްޖޭގެ އެކި ކަންކޮޅުތަކަށް ވިއްސާރަ ކުރާއިރު، ކ އަތޮޅުން ފެށިގެން ދ. އަތޮޅާ ހަމައަށް މިއަދުގެ އިރުއޮއްސެންދެން ވަނީ ރީނދޫ ސަމާލެއް ވެސް ނެރެފައެވެ.
މާލޭ މޭޔަރު އިންތިޚާބު މާދަމާ އޮންނައިރު، އެ މަގާމަށް ފަސް ކެންޑިޑޭޓަކު ވާދަކުރައްވައެވެ. އެއީ، ޕީއެންސީގެ ކެންޑިޑޭޓު އައިޝަތު އާޒިމާ ޝުކޫރުގެ އިތުރުން އެމްޑީޕީގެ ކެންޑިޑޭޓް އާދަމް އާޒިމާއި ދަ ޑިމޮކްރެޓްސްގެ ކެންޑިޑޭޓް ސައިފް ފާތިހާއި ކުރީގެ ރައީސް އަބްދުﷲ ޔާމީން އުފައްދަވާ ޕީޕަލްސް ނެޝަނަލް ފްރޮންޓްގައި އިސްކޮށް ހަރަކާތްތެރިވާ ކުރީގެ ފުލުސް ކޮމިޝަނަރު ހުސައިން ވަހީދުގެ އިތުރުން އަމިއްލަ ގޮތުން ވާދަ ކުރައްވާ ޝުއައިބު އަލީ (ފުރަހަނި ޝުއައިބު) އެވެ.