ދެހާހާ ގާތްކުރާ އަދަދެއްގެ ގިނަ ފަތުރުވެރިންނާއެކު މި އަހަރުގެ ފުރަތަމަ ކްރޫޒްލައިނާ އިންޑިއާއިން މިއަދު ރާއްޖެ އަތުވެއްޖެއެވެ.
ރާއްޖެއަށް ކްރޫޒްލައިނާތައް ގެންނަ ކުންފުނިތައް ތަމުސީލުކުރާ މޯލްޑިވްސް އެސޯސިއޭޝަން އޮފް ޔޮޓް އޭޖެންޓްސް (މާޔާ)ގެ ރައީސް މުހައްމަދު ނަޝީދު "ސަން"އަށް ވިދާޅުވީ، ިމިހާރު މާލެ ކައިރި އޮތީ، އިޓަލީގެ ކްރޫޒް ލައިނާއެއް ކަމަށްވާ "ކޮސްޓާ ސެރީނާ" ކަމަށެވެ.
އެ ކްރޫޒް ލައިނާ އިންޑިއާގެ ކޮޗީއިން ފުރައިގެން، ރާއްޖެ އައީ މިއަދު ހެނދުނު 6:00 ޖެހިއިރެވެ.
"ކޮސްޓާ ސެރީނާ" އިން 1،985 ފަތުރުވެރިން އައިސްފައިވާއިރު 90 ޕަސެންޓް ފަތުރުވެރިން ނިސްބަތްވަނީ އިންޑިއާއަށް ކަމަށް ނަޝީދު ވިދާޅުވިއެވެ.
މި ކްރޫޒްލައިނާއަކީ މި އަހަރު ރާއްޖެ ޒިޔާރަތްކުރާނެ އެންމެ ބޮޑު ކްރޫޒްލައިނާ ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ، މި ކްރޫޒްލައިނާ އިން އައި ފަތުރުވެރިން މިއަދު މާލެ ފައިބައި އުޅުނު ކަމަށެވެ. އެގޮތުން ގިނަ ފަތުރުވެރިން ދަތުރު ޓުއާ ހަދައިލުމަށް ކައިރި ރަށްރަށަށް ދިޔަ ކަމަށް ވެސް އޭނާ ފާހަގަކުރިއެވެ.
"އޭގެން ބައެއް ޕެސެންޖަރުން މާފުއްޓަށް ގޮސް ކްރޮސްރޯޑަށް ގޮސް، އެކަހަލަ ކުރު ޑޭ ޓުއާތައް ހަދައި އެބަ. ހުޅުމާލެގައާއި މާލެ ޝޮޕްތަކަށް ވެސް ޕެސެންޖަރުން ދޭ އެބަ،" ނަޝީދު ވިދާޅުވިއެވެ.
ކްރޫޒްލައިނާއިން އައި ފަތުރުވެރިން މާލެގަ ---ސަން ފޮޓޯ: އިންފިނިޓް މޮމަންޓްސް/ މުހައްމަދު ނަދީމް
"ކޮސްޓާ ސެރީނާ" މާލެގައި މަޑުކުރުމަށް ހަމަޖެހިފައިވަނީ މިއަދު އެކަނި ކަމަށް ނަޝީދު ފާހަގަކުރިއެވެ. އަނެއްކާ ފުރާނީ ވެސް އިންޑިއާއަށެވެ.
މި އަހަރަށް ޓޫރިޒަމް މިނިސްޓްރީން އަންދާޒާކޮށްފައިވާ ގޮތުގައި 2.01 މިލިއަން ފަތުރުވެރިން ރާއްޖެ އަންނާނެއެވެ.
އިންޑިއާގެ ގިނަ އަދަދެއްގެ ފަތުރުވެރިންނާއެކު ކްރޫޒް ލައިނާއެއް ރާއްޖެ އައިސްފައި މިވަނީ، އެ ގައުމުގެ ބޮޑުވަޒީރު ނަރެންދުރަ މޯދީ، އިންޑިއާގެ ފަތުރުވެރިކަން ޕްރޮމޯޓުކޮށް، ކުރެއްވި ޕޯސްޓަކާއެކު ބައެއް ނައިބު ވަޒީރުން ހިމެނޭހެން ގިނަ ބަޔަކު މޯދީއާއި އިންޑިއާއަށް ވަރަށް ބޮޑަށް ކުޑައިމީސްވާ ގޮތަށް ވާހަކަދައްކައިފައި ވަނިކޮށެވެ.
އެ މައްސަލަ ގޯސްވެ، އިންޑިއާގެ ބޮޑެތި މީޑިއާތަކާއި ބޮލީވުޑުގެ ފިލްމީތަރިން ވެސް އަންނަނީ ފަތުރުވެރިކަމަށް ރާއްޖެ ދަތުރުނުކުރާން ހިތްވަރުދެމުންނެވެ.