ރާއްޖެއާއި، އެމެރިކާއިން އިސްކަންދޭ ދާއިރާތަކަށް ޚާއްސަ ސަމާލުކަމެއް ދީގެން ދެ ގައުމުގެ ގުޅުން އިތުރަށް ބަދަހިކޮށް ހަރުދަނާކުރުމަށް ފޮރިން މިނިސްޓަރު މޫސާ ޒަމީރާއި، އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން މަޝްވަރާކުރައްވައިފިއެވެ.
ފޮރިން މިނިސްޓްރީން ބުނި ގޮތުގައި، ފޯން ކޯލަކުން އިއްޔެ ދެ ބޭފުޅުންގެ ދެމެދު ކުރިއަށްދިޔަ މަޝްވަރާތަކުގައި ގިނަ ކަންތައްތަކަކާ ގުޅޭގޮތުން މަޝްވަރާވަނީ ކުރައްވައިފައެވެ.
އެގޮތުން ރާއްޖެއާއި އެމެރިކާއާ ދެމެދު އޮތް އެކުވެރިކަމުގެ ގުޅުމަށް އަލިއަޅުއްވައިލައްވައި ދެ ބޭފުޅުން ވެސް ވާހަކަދެއްކެވިކަމަށާއި އެ ގުޅުން މިހާރަށްވުރެ ވެސް ބަދަހިކުރުމަށް ވާހަކަދެކެވުނުކަމަށް މިނިސްޓްރީން ބުންޏެވެ.
މަޝްވަރާކުރެވުނު ބައެއް ދާއިރާތަކުގެ ތެރޭގައި އަސްކަރީ ދާއިރާއާއި، އިގްތިޞާދީ ތަރައްގީއާއި، މޫސުމީ ބަދަލުތަކާއި، ޑިމޮކްރެޓިކް ހަމަތައް ތަންފީޒުކުރުމާއި، ގާނޫނީ ދާއިރާ ހިމެނެއެވެ.
އަދި ރާއްޖެއާއި އެމެރިކާ އިސްކަންދޭ ކަންކަމުގައި އެމެރިކާ ސަރުކާރުގެ ފަރާތުން ފުރިހަމަ އެއްބާރުލުން ދޭނެކަމުގެ ޔަގީންކަން ވެސް ބްލިންކެން ދެއްވިކަމަށް ފޮރިން މިނިސްޓްރީން ބުނެފައިވެއެވެ.
ހަމައެއާއެކު ދިވެހި ސަރުކާރުން ވެސް އެކަމަށް މަސައްކަތްކުރުމަށް ފުރިހަމައަށް ތައްޔާރުކަމާއި، އެކުގައި މަސައްކަތް ކުރުމަށް ރާއްޖޭގެ ޝައުގު އޮތްކަމަށް މިނިސްޓަރު ޒަމީރު ފާހަގަކުރެއްވިކަމަށް ވެސް ވަނީ ބުނެފައެވެ.
އެ ފޯން ކޯލުގައި މިނިސްޓަރު ވަނީ ރާއްޖެއާއި އެމެރިކާގެ ގުޅުން ދެމެހެއްޓުމަށް އެެމެރިކާގެ ފަރާތުން ދޭ އެހީތެރިކަމަށް ޝުކުރު އަދައިކުރައްވައިފައެވެ.
އެމެރިކާއަކީ ރާއްޖެއާ ގާތް ގުޅުމެއް ބާއްވާ އެއް ގައުމެވެ. ފާއިތުވި އަހަރުތަކުގައި ވެސް އެ ގައުމުގެ ފަރާތުން ގިނަ އެހީތަކެއް ރާއްޖެއަށް ފޯރުކޮށްދީފައިވެއެވެ. އެގޮތުން ކޮވިޑުގެ ހާލަތުގައި، ވެކްސިނާއި އެ ނޫން މުހިންމު ތަކެތި ވެސް ވަނީ ފޯރުކޮށްދީފައެވެ.