ޓްރީޓޮޕް ހޮސްޕިޓަލުގައި ހިތާނީ ކޭމްޕު މިހާރު ކުރިއަށްދާ ކަމަށާއި އެ ކޭމްޕުގައި ބައިވެރިވުމުގެ ފުރުސަތު ޖެނުއަރީ 10އާ ހަމައަށް އޮންނާނެ ކަމަށް އެ ހޮސްޕިޓަލުން ބުނެފިއެވެ.
ޓްރީޓޮޕުން ބުނީ، ހިތާނު ކުރާ ކުދިންގެ އާއިލާތަކަށް އެންމެ މުހިންމު ވާނީ އެ ކުދިންނަށް ފަރުވާ ކުރާނޭ ސިއްހީ މާހިރުންގެ އެހީތެރިކަން ކަމަށެވެ. އަދި ޓްރީ ޓޮޕް ހޮސްޕިޓަލުގައި ފެންވަރު ރަނގަޅު ޚިދުމަތެއް ދެމުން އަންނަ ކަމަށް އެ ހޮސްޕިޓަލުން ބުންޏެވެ.
މިހާރު ކުރިއަށްދާ ހިތާނީ ކޭމްޕުގައި ހަ ޑޮކްޓަރުން ހަރަކާތްތެރިވަމުން އަންނަ ކަމަށް އެ ހޮސްޕިޓަލުން ބުންޏެވެ. އޭގެ ތެރޭގައި އޮޕަރޭޝަނަށް ޚާއްޞަ ޑޮކްޓަރުންގެ ތެރޭގައި، ޑރ. ހުސެއިން ހަދިޔެވް، ޑރ. އުކަތަމް އަބްދުއްލާޔެވް، ޑރ. މައުމޫން އާސިމް، ޑރ. މުހައްމަދު ޝަރީފް އަދި ޑރ. އަބްދުﷲ އުބައިދު ހިމެނެއެވެ. އަދި ކުޑަކަމުދާ ނިޒާމުގެ ޚާއްޞަ ޑޮކްޓަރު، ޑރ. މެހްމެތު އޮޑާ ވެސް އެ ކޭމްޕުގައި ހިމެނިވަޑައިގަންނަވައެވެ.
އެ ހޮސްޕިޓަލުން ބުނި ގޮތުގައި މި ކޭމްޕުގެ މައިގަނޑު މަގުސަދަކީ، ހިތާނު ކުރާ ކުދިން އެންމެ ފުރަތަމަ ޑޮކްޓަރަށް ދައްކާ ހިސާބުން ފެށިގެން ފޮލޯ އަޕާ ހަމައަށް އެންމެ ފުރިހަމަކަމާއި ފަސޭހަކަމާއެކު ޚިދުމަތްތައް ފޯރުކޮށްދިނުމެވެ.
ޓްރީޓޮޕް ހޮސްޕިޓަލުގެ ހިތާނީ ކޭމްޕުގައި ބައިވެރިވި ކުދިން ވެސް ޚިދުމަތާ މެދު ހިތްހަމަ ޖެހޭކަން ފާޅުކޮށްފައިވާ ކަމަށް އެ ހޮސްޕިޓަލުން ބުންޏެވެ. އަދި އެ ކޭމްޕުގައި އެ ކުދިންނަށް ދިން ހަދިޔާއާމެދު ވަރަށް ބޮޑަށް ހިތްހަމަ ޖެހޭ ކަންވެސް އެ ކޭމްޕުގައި ބައިވެރިވި ބައެއް ކުދިން ފާހަގަކޮށްފައިވާ ކަމަށް ޓްރީޓޮޕް ހޮސްޕިޓަލުން ބުންޏެވެ.
އެ ހޮސްޕިޓަލުގެ ހިތާނީ ޕެކޭޖުގެ އަގަކީ 5000 ރުފިޔާއެވެ. އަދި ކޮޓަރި އަޕްގްރޭޑު ކުރުމަށް، ޕްރައިވެޓް ކޮޓަރިތަކަށް ޚާއްޞަ އަގުތަކެއް ހަމަޖެހިފައިވާކަން ވެސް އެ ހޮސްޕިޓަލުން ވަނީ ފާހަގަކޮށްފައެވެ.
އެ ކޭމްޕުގައި ބައިވެރިވުމަށް 3351610 ނަމްބަރު ފޯނަށް ގުޅުމަށް އެ ހޮސްޕިޓަލުން އެދެއެވެ.