މިއަދު ފާހަގަކުރާ ގައުމީ އެއްބައިވަންތަކަމުގެ ދުވަހާ ގުޅިގެން ދިވެހިބަހުގެ އެކެޑަމީން 'ދިވެހީންގެ އެއްބައިވަންތަކަމުގެ ދުވަހުގެ ޚާއްސަ ގޮފިކޮޅު' ގެ ނަމުގައި ދުވަހާ ގުޅޭ ލުއިފޮތެއް ތައްޔާރުކޮށް އާއްމުކޮށްފިއެވެ.
މި ފޮތުގައި އަލްއުސްތާޛު އިބްރާހީމް ރަޝީދު މޫސާއާއި، ކޮމާންޑް ސާޖަންޓް މޭޖާ ޢަބްދުﷲ ސަޢީދާއި، ޢަބްދުﷲ ނަޢީމުގެ ޢިލްމީ އަދި ދުވަހާ ގުޅޭ ތާރީޚީ މަޢުލޫމާތު ހިމެނޭ މަޒުމޫނުތަކެއް ހިމަނާފައިވެއެވެ.
މީގެ އިތުރުން ދުވަހާ ގުޅޭގޮތުން އުތީމު އާދަމް ޢަބްދުއްރަޙުމާން ތައްޔާރުކުރައްވާފައިވާ ޅެން 'އެއްބައިވަންތަ މި ދުވަހޭ' ވެސް މި ފޮތުގައި ހިމެނިފައިވެއެވެ.
ދިވެހީންގެ އެއްބައިވަންތަކަމުގެ ދުވަހުގެ ތަހުނިޔާ ދިވެހި އެންމެހާ ލޮބުވެތި ރައްޔިތުންނަށް އަރިސްކުރައްވަމުން، ދިވެހިބަހުގެ އެކެޑަމީގެ ރައީސް ޑރ. އަޝްރަފް ޢަބުދުއްރަޙީމްގެ އިސްބަހުގައި ވިދާޅުވެފައި ވަނީ ދިވެހީންގެ އެއްބައިވަންތަކަމުގެ ދުވަހެއް ފާހަގަކުރަމުންދާއިރު، އިހު ދިވެހީންގެ ހުރި ރީތި ސިފަތައް ދިރުވުމަށް މަސައްކަތްކުރުމަށާއި ދިވެހީންގެ ރީތި ސިފަ ނެތިގެންދިޔަ ނުދީ އެކަން ދެމެހެއްޓުމަށް އެދިވަޑައިގަންނަވާ ކަމަށެވެ.
ޑިސެންބަރުމަހުގެ 26 ވަނަ ދުވަސް ގައުމީ އެއްބައިވަންތަކަމުގެ ދުވަހުގެ ގޮތުގައި ފާހަގަކުރަނީ މީގެ 19 އަހަރު ކުރިން މިއަދު ކުރިމަތިވި ސުނާމީ ކާރިސާއާ ގުޅިގެން، އެ ދުވަހު ދިވެހީންގެ އެއްބަޔަކު އަނެއްބަޔަކަށް ދެއްކި ކުލުނާއި ލޯތްބާއި އަޙުވަންތަކަމާއި ގުޅުވައިގެންނެވެ.
ސުނާމީގެ ކާރިސާގައި ލިބުނު ގެއްލުން ހަނދާން އާ ކުރުމަށް މިއަދު ސަރުކާރު އޮފީސްތަކުން ބޭއްވި ސުކޫތުގައި އެކެޑަމީއިން ވެސް ބައިވެރިވިއެވެ. އެ އެކަޑަމީގެ އިސްވެރިންނާއި މުވައްޒަފުން ވެސް ވަނީ 9:23 ގައި އޮފީހުގެ ކުރިމައްޗަށް ނުކުމެ ސުކޫތު ބާއްވާފައެވެ.