ސަރުކާރުގެ 22 ވަޒީރުންނަށް ރުހުން ދިނުމުގެ މައްސަލައާ ގުޅޭގޮތުން މިއަދަށް ތާވަލްކުރި ކޮމިޓީ ބައްދަލުވުން ކޯރަމް ހަމަނުވެގެން ކެންސަލް ކޮށްލައިފިއެވެ.
ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ވަޒީރުންނަށް ރުހުން ދިނުމުގެ މައްސަލައިގައި ކޮމިޓީ ބައްދަލުވުން ތާވަލް ކުރީ މިއަދު 09:00އަށެވެ.
މިދިޔަ ހޯމަ ދުވަހު ވަޒީރުންނަށް ރުހުން ދިނުމުގެ މައްސަލަ މަޖިލިސް ތަޅުމުގައި ވޯޓާ ހަމައަށް ދިޔައެވެ. ނަމަވެސް ތުޅާދޫ ދާއިރާގެ މެންބަރު ހިސާން ހުސައިން ވަނީ ނިޒާމީ ނުކުތާއެއް ނަންގަވައި، ވަޒީރުންނަށް ރުހުންދިނުމާ މެދު ކޮމިޓީން ނިންމިގޮތުގެ ރިޕޯޓު ފުރިހަމަނުވާކަން ފާހަގަކުރައްވައިފައެވެ. އޭނާ ވިދާޅުވި، އެހެންވެ އެ ދުވަހު ވަޒީރުންނަށް ރުހުންދިނުމާ މެދު ވޯޓަށް އެހިދާނެ ކަމަށް ގަބޫލުނުކުރައްވާ ކަމަށެވެ.
ނިޒާމީ ނުކުތާ ބަލައިގަތުމަށްފަހު މަޖިލީހުގެ ރައީސް މުހައްމަދު އަސްލަމް ވިދާޅުވީ، މަޖިލީހުގެ ކޮމިޓީން ރިޕޯޓު އެކުލަވައިލާފައިވަނީ މަޖިލީހުގެ ގަވާއިދުގެ 200 ވަނަ މާއްދާގެ ރ ގައި ބަޔާންކުރާ ކަންކަން ފުރިހަމަނުކޮށް ކަމަށެވެ. އެހެންވެ، އެ މަނިކުފާނު ނިންމެވީ އެ މައްސަލަ އަނބުރާ ކޮމިޓީއަށް ފޮނުވައިލާށެވެ.
މަޖިލީހުގެ ބޮޑު މެޖޯރިޓީއެއް އޮތީ އިދިކޮޅު އެމްޑީޕީއަށެވެ. ސަރުކާރު ހިންގާ ޕީޕީއެމް/ޕީއެންސީ ކޯލިޝަންގައި ތިއްބެވީ އެންމެ ހަތަރު މެންބަރުންނެވެ.
މީގެ އިތުރުން ވަޒީރުންނަށް ރުހުންދޭން ވަކިވަކިން ވޯޓަށް އެހުމަށް ވެސް މަޖިލީހުން ވަނީ ފަސްކޮށްފައެވެ.