ޔަހޫދީ އިސްރާއީލުގެ ފައުޖުތަކުން ފަލަސްތީނުގެ ޣައްޒާގައި ހިންގަމުންދާ ލާއިންސާނީ އަމަލުތަކުގައި ޣައްޒާގެ އާންމުން ބަނޑުހައިހޫނުކަމުގެ ތެރެއަށް ހުށަހެޅުމަކީ އިސްރާއީލުން ގަސްދުގައި ކުރަމުން އަންނަ ކަމެއް ކަމަށް ހިޔުމަން ރައިޓްސް ވޮޗްއިން ބުނެފިއެވެ.
އެ ޖަމާއަތުން ނެރުނު ރިޕޯޓެއްގައިވާ ގޮތުން އިސްރާއީލުންދަނީ ޣައްޒާގައި ހަނގުރާމައިގެ އުކުޅެއްގެ ގޮތުގައި އާންމުން ބަނޑުހައިހޫނުކަމުގެ ތެރެއަށް ދޫކޮށްލަމުންނެވެ.
ޢިސްރާއީލުގެ ބާރުތަކުން ގަސްދުގައި ޣައްޒާއަށް ފެނާއި ކާނާ އާއި ތެޔޮ ފޯރުކޮށްދިނުން ހުއްޓުވާކަމަށާއި، ޣައްޒާގައި ދަނޑުވެރިކަން ކުރާ ސަރަހައްދުތައްވެއް ސުންނާފަތިކުރާ ކަމަށް އެ ޖަމާޢަތުން ބުނެއެވެ. އަދި ޣައްޒާގެ އާންމުން ދިރިތިބުމަށް ކޮންމެހެން ބޭނުންވާ ތަކެތިން އެމީހުން މަޙްރޫމުކުރަމުން އަންނަ ކަމަށްވެސް ހިޔުމަން ރައިޓްސް ވޮޗުން ތުހުމަތުކުރެއެވެ.
ޣައްޒާގެ އާބާދީއަށް ކުރިމަތިވެފައިވާ އެ ނުރައްކާތެރި ހަނގުރާމައާ ދެކޮޅަށް ދުނިޔޭގެ ލީޑަރުން ބަސް ބުނަންޖެހޭ ކަމަށްވެސް އެ ޖަމާއަތުން ވަނީ ބުނެފައެވެ.
ހިޔުމަން ރައިޓްސް ވޮޗުން ވަނީ ނޮވެމްބަރު 24 އާއި ޑިސެމްބަރު ހަތަރަކާ ދެމެދު ޣައްޒާގެ ގެދޮރު ގެއްލިފައިވާ ފަލަސްޠީނުގެ 11 މީހުންނާ އިންޓަވިއުކޮށްފައެވެ. އެމީހުން ބުނެފައިވާ ގޮތުގައި އަސާސީ ބޭނުންތަކަށް ބޭނުންކުރާނެ އެންމެ ޒަރޫރީ ތަކެތި ހޯދުމުގައިވެސް ކުރިމަތިލާން ޖެހިފައި ވަނީ އިންތިހާ ދައްޗާއެވެ. ކާނެ ބޯނެ އެއްޗެއް ނެތް ކަމަށާއި ކަރަންޓާއި އިންޓަނެޓްވެސް ނެތް ކަމަށް އެމީހުން ބުނެއެވެ. އަދި އެކަމުން ސަލާމަތްވާނެ މަގެއްވެސް ނެތް ކަމަށް ޣައްޒާގެ އާންމުން ބުނެއެވެ.
އދ.ގެ ކާނާއާ ބެހޭ ޕްރޮގްރާމުން މި މަހުގެ ހަ ވަނަ ދުވަހު ރިޕޯޓްކޮށްފައިވާ ގޮތުގައި ޣައްޒާގެ އުތުރުގެ 10 ގޭބިސީގެ ތެރެއިން ނުވަ ގޭބިސީގެ މީހުންނާއި ދެކުނުން ތިން ގޭބިސީގެ ތެރެއިން ދެ ގޭބިސީގެ މީހުން މަދުވެގެން އެއްދުވަހާއި އެއްރޭ އެއްވެސް ކަހަލަ ކާއެއްޗެއް ނުލިބި ހޭދަކުރެއެވެ.
އިސްރާއީލުން ޣައްޒާގައި ހިންގަމުންދާ ލާއިންސާނީ ރަޙުމުކުޑަ ޖަރީމާތަކުގައި މިހާތަނަށް 19000އަށް ވުރެ ގިނަ މީހުން ވަނީ ޝަހީދުކޮށްފައެވެ.