ކުވައިތުގެ އަމީރު ޝައިޚް ނަވާފް އަލް އަޙްމަދު އަލް ޞަބާޙް މިއަދު އަވަހާރަވުމާ ގުޅިގެން، އެ މަނިކުފާނުގެ ޣައިބަށް ކުރެވޭ ކަށުނަމާދު މާދަމާ ރާއްޖޭގައި ވެސް ކުރަން ނިންމައިފިއެވެ.
އިސްލާމިކް މިނިސްޓްރީން މިރޭ އެކްސްގައި ކުރި ޕޯސްޓެއްގައި ބުނީ، ކުވައިތަކީ ރާއްޖެއާ ވަރަށް ގާތް، އަޚުވަންތަ ގުޅުމެއް އޮންނަ ގައުމެއް ކަމަށެވެ.
އެހެންވެ، އެ ގައުމުގެ އަމީރު އަވަހާރަވުމުން އެ މަނިކުފާނުގެ މައްޗަށް ކުރެވޭ ކަށުނަމާދު މާދަމާ ރޭ އިޝާ ނަމާދަށް ފަހު އިސްލާމީ މަރުކަޒުގައި ކުރާނެ ކަމަށް އެ ޕޯސްޓުގައިވެއެވެ.
"ވީހާ ވެސް ގިނަ ބަޔަކު ނަމާދުގައި ބައިވެރިވެލެއްވުން އެދެން،" މިނިސްޓްރީން ބުންޏެވެ.
ކުވެއިތުގެ އަމީރު ޝައިޚް ނަވާފް އަލް އަޙްމަދު އަލް ޞަބާޙް--
މީގެ ކުރިން ރައީސް ޑރ. މުޙައްމަދު މުއިއްޒު ވަނީ، އަމީރު އަވަހާރަވުމުގެ ހިތާމައިގައި ދިވެހި ދިދަ ތިން ދުވަސް ވަންދެން ބައިދަނޑިއަށް ތިރިކުރުމަށް ނިންމަވައިފައެވެ.
ޝައިޚް ނަވާފް އަވަހާރަވީއިރު އެމަނިކުފާނުގެ އުމުރުފުޅުން 86 އަހަރެވެ.
ކުވައިތުގެ ސަރުކާރުން އިއުލާންކޮށްފައިވާ ގޮތުގައި ޝައިޚް ނަވާފުގެ ޖަނާޒާ އޮންނާނީ މާދަމާ ހެނދުނު، ހަމައެކަނި އެ މަނިކުފާނުގެ އާއިލާގެ މެންބަރުންނަށް ބައިވެރިވެވޭ ގޮތަށެވެ.
އެމަނިކުފާނު ކުވައިތުގެ އަމީރުކަމުގެ ހުވާ ކުރެއްވީ ކުރީގެ އަމީރު ޝައިޚް ޞަބާޙް އަލް އަޙްމަދު އަލް ޞަބާޙް 2020 ވަނަ އަހަރު އަވަހާރަވުމުންނެވެ. އެއަށްފަހު ޝައިޚް ނަވާފް ވަނީ ތިން އަހަރު ވެރިކަން ކުރައްވާފައެވެ.
ބޭރުގެ ނޫސްތަކުން ރިޕޯޓުކޮށްފައިވާ ގޮތުގައި ޝައިޚް ނަވާފް އަވަހާރަވީ އާލާސްކަންފުޅާ އުޅުއްވުމަށް ފަހުގައެވެ.
އެ ގައުމުގައި 40 ދުވަހުގެ ރަސްމީ ހިތާމައިގެ މުއްދަތެއް ފަށައި، ސަރުކާރުގެ އިދާރާތައް ތިން ދުވަހަށް ބަންދުކުރަން ވަނީ ނިންމައިފިއެވެ.