ކުވައިތުގެ އަމީރު ޝައިޚް ނަވާފް އަލް އަޙްމަދު އަލް ޞަބާޙް އަވަހާރަވުމާ ގުޅިގެން، ތިން ދުވަސް ވަންދެން ދިވެހި ދިދަ ބައިދަނޑިއަށް ތިރިކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
އެކަން އިއުލާންކުރައްވާފައި ވަނީ، ރައީސުލްޖުމްހޫރިއްޔާގެ އޮފީހުން މިއަދު ނެރުއްވި އިއުލާނެއްގައެވެ.
އެކަމާ ގުޅިގެން ހިތާމަ ފާޅުކުރައްވައި، އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ކުވައިތުގެ އަމީރު އަވަހާރަވުމުގެ ޚަބަރު ލިބުމުން ވަރަށް ހިތާމަކުރައްވާ ކަމަށެވެ.
އަދި ކުވައިތާއި ރާއްޖެއާ ދެމެދު އޮތް ގުޅުން ބަދަހިކޮށް ފުޅާކުރުމަށް ޝައިޚް ނަވާފް ކުރައްވަމުން ގެންދެވި މަސައްކަތްޕުޅުތައް ރާއްޖެއިން އަބަދުވެސް ހަނދާންއާކުރާނެ ކަމަށް ރައީސް ވިދާޅުވިއެވެ.
ރައީސް ވަނީ އަމީރުގެ އާއިލާއަށާއި ކުވައިތުގެ ރައްޔިތުންނަށް ތައުޒިޔާ ވިދާޅުވެފައެވެ.
ޝައިޚް ނަވާފް އަވަހާރަވީއިރު އެމަނިކުފާނުގެ އުމުރުފުޅުން 86 އަހަރެވެ.
އެމަނިކުފާނު ކުވައިތުގެ އަމީރުކަމުގެ ހުވާ ކުރެއްވީ ކުރީގެ އަމީރު ޝައިޚް ޞަބާޙް އަލް އަޙްމަދު އަލް ޞަބާޙް 2020 ވަނަ އަހަރު އަވަހާރަވުމުންނެވެ. އެއަށްފަހު ޝައިޚް ނަވާފް ވަނީ ތިން އަހަރު ވެރިކަން ކުރައްވާފައެވެ.
ބޭރުގެ ނޫސްތަކުން ރިޕޯޓުކޮށްފައިވާ ގޮތުގައި ޝައިޚް ނަވާފް އަވަހާރަވީ އާލާސްކަންފުޅާ އުޅުއްވުމަށް ފަހުގައެވެ.
އެ ގައުމުގައި 40 ދުވަހުގެ ރަސްމީ ހިތާމައިގެ މުއްދަތެއް ފަށައި، ސަރުކާރުގެ އިދާރާތައް ތިން ދުވަހަށް ބަންދުކުރަން ވަނީ ނިންމައިފިއެވެ.