މިއަދު ފާހަގަ ކުރާ ހުރަވީ ދުވަހުގެ ތަހުނިޔާއާއެކު ދިވެހި ބަހުގެ އެކެޑަމީން ދޮންބަންޑާރައިންގެ ނަދުރުފުޅު ހަނދާން އާކޮށްދީފިއެވެ.
އެކަޑަމީން އެކްސްގައި ކުރި ޕޯސްޓެއްގައި ބުނެފައި ވަނީ، ހުރަވީ ދުވަސް ނިސްބަތް ވަނީ، އަލްޣާޒީ ހަސަން ޢިއްޒުއްދީނުލް ހުރަވީއަށް ކަމަށެވެ.
މި ދުވަސް ފާހަގަ ކުރަނީ، އެ ހިތްވަރުފުޅު ގަދަ، ޙިކުމަތްތެރި ބަތަލު ގެނެސްދެއްވި މިނިވަންކަމާ ގައުމިއްޔަތު ދެމެހެއްޓުމުގެ ހިތްވަރާއި ޖޯޝް ދިވެހިންގެ ހިތްތަކުގައި ދިރުވާ ދެމެހެއްޓުމަށް ކަމަށް އެކަޑެމީން ބުންޏެވެ.
އެއަށް ފަހު ކުރެއްވި އިތުރު ޕޯސްޓެއްގައި އެކަޑެމީން ވަނީ ދޮންބަންޑާރައިންގެ ނަދުރުފުޅު ހަނދާން އާކޮށް ދެއްވައިފައެވެ.
ހުރަވީ ދުވަސް ފާހަގަ ކުރަނީ ކޮންމެ އަހަރެއްގެ ޖުމާދަލްއާޚިރާ މަހުގެ ތިން ވަނަ ދުވަހުއެވެ.
ދޮންބަންޑާރައިން ހޮޅީންގެ ކިބައިން ރާއްޖެ މިނިވަންކުރެއްވީ، 1166 ވަނަ އަހަރުގެ ޖުމާދަލްއާޚިރާ މަހުގެ ތިންވަނައަށް ވީ އާދީއްތަ ވިލޭރޭގައެވެ. ހުރަވީ ދުވަހުގެ ގޮތުގައި މިދުވަސް ފާހަގަކުރަނީ، ދިވެހި ޤައުމުގެ އެންމެހައި ރައްޔިތުން ޤައުމީ އަބްޠާލުންގެ ޒިކުރާ ދިރުވުމުގެ ހިތްވަރު ލިބިގަތުމަށާއި، އެއަބްޠާލުން ގެނެސްދެއްވި މިނިވަންކަމާއި، ޤައުމިއްޔަތު ދެމެހެއްޓުމުގެ ޢަޒުމާއި ޖޯޝް ދިވެހި ހިތްތަކުގައި ދިރުވައި ދެމެހެއްޓުމުގެ ގޮތުންނެވެ.
ހުރަވީ ދުވަސް ނިޞްބަތްވާ ބަޠަލަކީ އަލްޣާޒީ ހަސަން ޢިއްޒުއްދީން އެއްވަނަ އަށެވެ. މިދުވަހަށް ހުރަވީ ދުވަސް ކިޔުއްވާފައިވަނީި އެމަނިކުފާނަކީ މާލެއަތޮޅު ހުރަޔަށް ނިސްބަތްވާ ބޭފުޅަކަށްވާތީއެވެ.