ކުވައިތު (16 ޑިސެންބަރު 2023) : ކުވައިތުގެ އަމީރު ޝައިޚް ނުއްވާފުލްއަހްމަދު އައްސަބާޙް އަވަހާރަ ވެއްޖެކަން ދާދި ދެންމެއަކު އެ ގައުމުން އިއުލާނުކޮށްފިއެވެ.
ކުވައިތުގެ އަމީރުގެ ދީވާނުން ދާދި ދެންމެއަކު ނެރުނު ބަޔާނެއްގައި ބުނެފައިވަނީ އުމުރުފުޅުން 86 އަހަރުގައި އެ ގައުމުގެ އަމީރު ޝައިޚް ނުއްވާފުލްއަހްމަދު އަވަހާރަވެއްޖެ ކަމުގައެވެ. ކުވައިތުގެ އަމީރު އަވަހާރަވި ބައްޔެއް ނުވަތަ ސަބަބެއް އެ ބަޔާނުގައި ހާމަކޮށްފައެއް ނުވެއެވެ.
ކުވައިތުގެ އަމީރުވަނީ މިދިޔަ ނޮވެންބަރުމަހު ކުރިމަތިވެވަޑައިގެންނެވި ކުއްލި އާލާސްކަންފުޅަކާ ގުޅިގެން ހޮސްޕިޓަލުގައި އެނދުމަތިކޮށްފައެވެ. ނަމަވެސް ފަރުވާއަށްފަހު ހޮސްޕިޓަލުން ނުކުމެވަޑައިގެންނެވިއެވެ. އޭރުވެސް އަމީރަށް ކުރިމަތިވެވަޑައިގެންނެވި އާލާސްކަންފުޅާބެހޭ މައުލޫމާތު އެގައުމުން ހާމަކޮށްފައެއް ނުވެއެވެ.
ކުވައިތުގެ ވަަލީއުލްއަޙްދު ޝައިޚް މިޝްޢަލް އަލްއަޙްމަދު އަލްޖާބިރުއްސަބާޙް
ކުވައިތުގެ އަމީރުކަމުގެ މަގާމަށް ޝައިޚް ނުއްވާފުލްއަޙްމަދު އިސްކޮށްފައިވަނީ 2020 ވަނަ އަހަރުގެ ސެޕްޓެމްބަރު މަހުގެ 29 ވަނަ ދުވަހުއެވެ. އެއީ އޭރު އަމީރުކަމުގައި ހުންނެވި ޝައިޚް ސަބާހުލްއަހްމަދު ކުއްލި ގޮތަކަށް އަވަހާރަވުމާ ގުޅިގެންނެވެ.
ޝައިޚް ސަބާހުލްއަހްމަދުގެ އަމީރުކަމުގައި ޝައިޚް ނުއްވާފުލްއަޙްމަދު ހުންނެވީ ވަލީއުލްއަހްދުގެ މަގާމުގައެވެ. ޝައިޚް ނުއްވާފުލްއަހްމަދަކީ ކުވައިތުގެ 16 ވަނަ އަމީރެވެ. ކުވައިތުގެ ފުރަތަމަ އަމީރަކީ ޝައިޚް ސަބާހު ބިން ޖާބިރު އެވެ. އޭނާ ރަސްކަން (އަމީރުކަން) ކުރައްވާފައިވަނީ 1752 ން 1762 އަށެވެ.
ކުވައިތުގެ އަމީރު އަވަހާރަވުމާ ގުޅިގެން އެ ގައުމުގައިވަނީ ހަތް ދުވަހުގެ ގައުމީ ހިތާމަ އިއުލާނުކޮށްފައެވެ. ގައުމީ ހިތާމައިގެ މި މުއްދަތުގައި ކުވައިތުގެ ގައުމީ ދިދަ ހުންނާނީ ބައިދަނޑިއަށް ތިރިކޮށްފައެވެ. ކުވައިތުގެ އަމީރުކަމަށް ދެން އިސްކުރާނީ އެގައުމުގެ މިހާރުގެ ވަލީއުލްއަހްދު ޝައިޚް މިޝްޢަލް އަލްއަހްމަދު އަލްޖާބިރު އައްސަބާހުއެވެ.