ފުޓުބޯޅަ ކުޅުންތެރިއެއްގެ ގޮތުގައި ރިޓަޔާކުރުމަށް ވިސްނަމުންދާ ކަމަށް ލޮސް އެންޖެލެސް އެފްސީ (އެލްއޭއެފްސީ)ގެ ތަޖުރިބާކާރު ޑިފެންޑަރު ޖިއޯޖިއޯ ކިއެލީނީ ބުނެފިއެވެ.
އެމެރިކާގެ މޭޖާ ލީގް ސޮކާ (އެމްއެލްއެސް) ކަޕްގެ ފައިނަލުގައި މާދަމާ އެލްއޭއެފްސީއާ އެކު ކޮލަމްބަސްއާ ދެކޮޅަށް ނުކުންނަން ތައްޔާރުވަމުންދާ އިޓަލީ ލެޖެންޑް ކިއެލީނީއާ ނޫސްވެރިން ވަނީ ރިޓަޔާކުރުމާ ގުޅޭގޮތުން ސުވާލުތައް ކުރިމަތިކުރުވައިފައެވެ. އެ ސުވާލުތަކަށް ޖަވާބުދެމުން ކިއެލީނީ ބުނެފައިވާ ގޮތުގައި، ކޮންމެ މެޗަކީ ވެސް އޭނާގެ ފަހު މެޗަށްވުމަކީ އެކަށީގެންވާ ކަމެކެވެ.
"އަހަރެންނަށް އެނގޭ އަހަރެން ބަލަން ޖެހޭނެ ކަންކަން. އަހަރެންގެ ވިސްނުމާއި، ހިތް ނުވަތަ ފައިގެ މަސައްކަތްތައް ބުނަނީ އެކި ގޮތަށް. އަހަރެންނަކަށް ސީދާ ނޭނގޭ ރިޓަޔާކުރާނެ ދުވަހެއް. އެކަމާ އެބަ ވިސްނަން. އަހަރެން ޖެހޭނެ އެކަމާ އާއިލާއާ ވެސް މަޝްވަރާކުރަން،" އޭނާ ބުންޏެވެ.
ކިއެލީނީ ބުނީ ރިޓަޔާކުރުމާ މެދު ވިސްނަމުންދިޔަ ނަމަވެސް، އަންނަ އަހަރުގެ ޖޫން މަހުގެ ނިޔަލަށް އެލްއޭއެފްސީގައި މަޑުކުރާނެކަން ޔަގީންވާ ކަމަށާއި ކުރިއަށް ހުރި މެޗުތަކުގައި ވެގެންދާނެ ގޮތެއް ބަލަން ޖެހޭ ކަމަށެވެ.
އުމުރުން 39 އަހަރުގެ ކިއެލީނީއަކީ އެމްއެލްއެސްގެ އެންމެ އުމުރުން ދޮށީ އެއް ކުޅުންތެރިޔާއެވެ. އޭނާ ވަނީ ކްލަބާއި ގައުމީ ޓީމަށް ޖުމުލަ 700 އަށްވުރެ ގިނަ މެޗު ކުޅެފައެވެ.
އެލްއޭއެފްސީއާ ގުޅުމުގެ ކުރިން ދިގު މުއްދަތަކަށް ޔުވެންޓަސްއަށް ކުޅުނު ކިއެލީނީ ވަނީ އެ ކްލަބާ އެކު ނުވަ ފަހަރު އިޓަލީ ލީގު ކާމިޔާބުކޮށް، ޔޫއެފާ ޗެމްޕިއަންސް ލީގެއް ވެސް ކާމިޔާބުކޮށްފައެވެ. އޭނާ ވަނީ އިޓަލީ ގައުމީ ޓީމާ އެކު 2020ގެ ޔޫރޯ ވެސް ކާމިޔާބުކޮށްފައެވެ.
މިދިޔަ އަހަރު އެލްއޭއެފްސީއާ ގުޅުނު ކިއެލީނީ ވަނީ ފުރަތަމަ އަހަރު ވެސް އެމްއެލްއެސް ކަޕް ކާމިޔާބުކޮށްފައެވެ. މި އަހަރުގެ އެމްއެލްއެސް ކަޕްގެ ފައިނަލަށް އެލްއޭއެފްސީއާ އެކު ކިއެލީނީ ނުކުންނާނީ ރާއްޖޭގަޑިން މާދަމާ ރޭ 2:00 ގައެވެ.