ރާއްޖޭގައި ޚާއްޞަ އެހީއަށް ބޭނުންވާ އެކި އުމުރުފުރައިގެ މީހުންގެ އަދަދު މިހާރު 24،000އަށް އަރާ ކަމަށާއި އެންމެ ގިނަ މީހުން ތިބީ ގއ. އާއި މ. އަތޮޅުގައި ކަމަށް މޯލްޑިވްސް ސްޓެޓިސްޓިކްސް ބިއުރޯގެ ތަފާސްހިސާބުތަކުން ދައްކައިފިއެވެ.
މިއަދު ބައިނަލްއަގްވާމީ ގޮތުން ފާހަގަކުރާ ނުކުޅެދުންތެރިކަން ހުންނަ މީހުންގެ ދުވަހާ ގުޅިގެން ސްޓެޓިސްޓިކްސް ބިއުރޯއިން ވަނީ އެކަމާ ގުޅުންހުރި ތަފާސްހިސާބުތައް، ބޯހިމެނުން 2022ގެ ތަފާސްހިސާބުތަކާ ހަވާލާދީ އާންމުކޮށްފައެވެ.
އެ ތަފާސްހިސާބުން ދައްކާ ގޮތުގައި ރާއްޖޭގައި ޚާއްޞަ އެހީއަށް ބޭނުންވާ 24،401 މީހަކު އެބަތިއްބެވެ. އޭގެތެރޭގައި 13،456 އަންހެނުން ތިބިއިރު 10،945 ފިރިހެނުން އެބަތިއްބެވެ.
އެއީ މާލޭގައި ދިރުއުޅޭ 8،453 މީހުންނާއި އަތޮޅުތެރޭގައި ދިރިއުޅޭ 15،948 މީހުންނެވެ.
ރާއްޖޭގެ އާބާދީގެ ނިސްބަތުން ބަލާއިރު އެއީ 6.9 ޕަސެންޓު މީހުންނެވެ.
ރާއްޖޭގެ އެކި ކަންކޮޅުތަކުގައި ޚާއްޞަ އެހީތެރިކަމަށް ބޭނުންވާ ފަރާތްތައް އެންމެ ގިނައީ 65 އަހަރުން މަތީގެ މީހުންގެއެވެ. އެއަށްފަހު ދެން ބޮޑެތި މީހުންގެ ތެރެއިންނެވެ. ފުރާވަރު އުމުރުގެ ކުދިންނާ އަޅާ ބަލާއިރު ކުޑަކުދިންގެ ތެރޭގައި ޚާއްސަ އެހީއަށް ބޭނުންވާ ކުދިން ގިނައެވެ. ތަފާސްހިސާބުތަކުން ދައްކާ ގޮތުގައި:
- 65 އަހަރުން މަތި - 7،402 މީހުން (36%)
- 36 އަހަރާއި 64 އަހަރާ ދެމެދު - 9،996 މީހުން (7.9%)
- 18 އަހަރާއި 35 އަހަރާ ދެމެދު - 3،602 މީހުން (3.1%)
- 5 އަހަރާއި 17 އަހަރާ ދެމެދު - 3،401 ކުދިން (3.8%)
ސްޓެޓިސްޓިކްސް ބިއުރޯއިން ހާމަކުރި ގޮތުގައި ރާއްޖޭގައި ޚާއްސަ އެހީތެރިކަމަށް ބޭނުންވާ ފަރާތްތައް އެންމެ ގިނައީ މ އަތޮޅާއި، ގއ އަތޮޅުގައެވެ. އެއީ ނިސްބަތުން 9.6 ޕަސެންޓެވެ. ދެން އެންމެ ގިނައީ ގދ އަތޮޅުގައެވެ. އެއީ 9.4 ޕަސެންޓެވެ.
ނުކުޅެދުންތެރިކަން ހުންނަ މީހުންނަށް ދޭ އެލަވަންސް މިދިޔަ ސަރުކާރުގައި ވަނީ 3,000 ރުފިޔާއަށް ބޮޑުކޮށް، ގިނަ އެލަވަންސްތަކެއް ތައާރަފު ކޮށްފައެވެ.
އެ ބަދަލާއެކު އެ އަދަދު އިތުރު ކުރުމަށްޓަކައި ގިންތިތަކެއް ހަދައި، 6،000 ރުފިޔާއާ ހަމައަށް އެ އެލަވަންސްތައް ވަނީ ބޮޑުކޮށްފައެވެ. މި ބަދަލާ އެކު ނުކުޅުދެންތެރިކަން ހުންނަ މީހުންނަށް މަދު ވެގެން 3،000 ލިބޭނެއެވެ.
އިތުރުކުރި އެލަވަންސްތަކުގެ އުސޫލުގައި ވާގޮތުން:
- މާލީ އެލަވަންސް - 3،000 ރުފިޔާ
- އަމިއްލައަށް ނޫޅެވޭ 65 އަހަރުން ދަށުގެ ނުކުޅެދޭ މީހުންނަށް އިތުރު 2،000 ރުފިޔާގެ އެލަވަންސެއް
- އަސާސީ ތަކެތި ގަތުމަށް ދެވޭ 1،000 ރުފިޔާގެ އެލަވަންސެއް - މި ކެޓަގަރީގައި ހިމެނެނީ 65 އަހަރުން ދަށުގެ މީހުން
- އެއް ގޭބިސީއެއްގައި އެކަކަށް ވުރެ ގިނަ ނުކުޅެދޭ މީހުން އުޅޭނަމަ 1،000 ރުފިޔާގެ އެލަވަންސެއް
ދައުލަތުން ފޯރުކޮށްދޭ މާލީ އެހީގެ ގޮތުގައި މިއަހަރުގެ މެދާ ހަމައަށް ދެމުން އައީ، 12 އަހަރު ކުރިން އެ އެލަވަންސް ދޭން ފެށިއިރު ވެސް ކަނޑައެޅި 2000 ރުފިޔާއެވެ.
މިދިޔަ މަހު ވެރިކަމަށް ވަޑައިގެންނެވި ރައީސް ޑރ. މުޙައްމަދު މުއިއްޒުގެ ރިޔާސީ ކެމްޕެއިން ތެރޭގައި އެ މަނިކުފާނު ވަނީ، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސިޔާސަތާ އެއްގޮތަށް، ޚާއްޞަ އެހީއަށް ބޭނުންވާ މީހުންނަށް މި ސަރުކާރުން ވަޒީފާ ދޭނެކަމަށް ކަމަށް ވިދާޅުވެފައެވެ.