މިއަދު ކ. ހުރާއަށް ވަޑައިގަތް ވެރިކަން ކުރާ ޕީޕީއެމް/ޕީއެންސީގެ ވަފުދަށް އެ ރަށުން 'ޔާމީންގެ ހުސް ގޮނޑި'ން މަރުހަބާ ކިޔައިފިއެވެ.
ނިމުނު ރިޔާސީ އިންތިޚާބު ތެރޭގައި ޖަލުގައި ހުންނެވި ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ހާއްސަކޮށްފައި ކެމްޕޭން ހަރަކާތްތަކުގައި ޕީޕީއެމުން 'ރައީސް ޔާމީން' ޖައްސަވާފައި ހުސް ގޮނޑިއެއް ބެހެއްޓިއެވެ. އެކަމަކު، އާ ސަރުކާރަށް ހަފުތާއެއްނުވެ ޔާމީނާ އެކު ގުޅުން ގޯސްވެ، އެ މަނިކުފާނު ވަނީ ޕީޕީއެމުން ވަކިވެވަޑައިގެންފައެވެ.
ހުރާއަށް މިއަދު ވަޑައިގަތް ޕީޕީއެމްގެ ވަފުދުގައި ދިފާއީ ވަޒީރު މުހައްމަދު ޣައްސާން މައުމޫން ވެސް ހިމެނެއެވެ.
އެ ރަށު ކައުންސިލްގެ މެންބަރު ހަސަން ފިރާޝް "ސަން"އަށް ވިދާޅުވީ، މިއަދު އެ ރަށަށް ޕީޕީއެމްގެ ބޭފުޅުން ވަޑައިގަތްއިރު، 'ރައީސް ޔާމީން' ޖައްސަވާފައި ހުރި ފިޔާތޮށި ކުލައިގެ ގޮނޑިއެއް ނެރެފައި ހުރި ކަމަށެވެ. އަދި، ޕީޕީއެމްގެ ވަފުދަށް އެ ގޮނޑި ވަނީ ދައްކައިފައެވެ.
މީސްމީޑިއާގައި މިހާރު ދައުރުވާ ވީޑިއޯއިން ފެންނަ ގޮތުގައި އެ ރަށަށް ޕީޕީއެމްގެ ވަފުދު ވަޑައިގަތުމުން ވަނީ 'ގޮނޑި މަތިން މިހާރު ހަނދާން ނެތުނީތޯ' ސުވާލުކޮށްފައެވެ.
ޕީޕީއެމް/ޕީއެންސީގެ ޖަލްސާއެއްގައި 'ޔާމީންގެ ހުސްގޮނޑި' -- ފޮޓޯ/ ޕީޕީއެމް
ރައީސް ޑރ. މުހައްމަދު މުއިއްޒު ހުވާ ކުރެއްވިތާ ހަފުތާއެއް ނުވަނީސް ޕީޕީއެމްގެ ތެރެއިން ޕާޓީ ހިންގެވުމަށް ގޮންޖެހުންތަކަކާ ކުރިމަތިވެ، ޔާމީން ވަނީ ޕާޓީގެ ރައީސްކަމުން އިސްތިއުފާ ދެއްވައިފައެވެ. އަދި، މިހާރު ގެންދަވަނީ އަމިއްލަފުޅު ޕާޓީއެއް އުފެއްދެވުމުގެ މަސައްކަތް ކުރައްވަމުންނެވެ.
މީސްމީޑިއާގައި އެ ވީޑިއޯ އާންމުވުމާ ގުޅިގެން ޔާމީންގެ އާ ޕާޓީ އުފެއްދެވުމުގައި އިސްކޮށް އުޅުއްވައި ކުރީގެ ސައެންސް މިނިސްޓަރު މުހައްމަދު މަލީހް ޖަމާލް ވިދާޅުވީ، ސަރުކާރަށް މަހެއް ނުވަނީސް މިފަދަ ގޮތަކަށް މަރުހަބާ ކިޔުމުން އެނގެނީ ވަރަށް ބޮޑު ގޯހެއް ހަދައިފިކަން ކަމަށެވެ.
އަދި، ޔާމީންގެ އިސް ގާނޫނީ ވަކީލު އަދި ކުރީގެ ނައިބު ރައީސް މުހައްމަދު ޖަމީލު އަހުމަދު ވެސް ވަނީ އެ ވީޑިއޯ ހިއްސާ ކުރައްވައި ސަރުކާރަށް ފާޑު ވިދާޅުވެފައެވެ.
"އެއްވެސް ރައްޔިތަކު ބޭއިންޞާފު ބަލައެއް ނުގަންނާނެ. ރައީސް ޔާމީނު މަތިން ރައްޔިތުން ހަނދާން ނުނެތޭ. އެ ގޮނޑިކޮޅުގެ މާތް ކަމާއެވެ،" ޖަމީލު އެކްސްގައި ކުރެއްވި ޕޯސްޓެއްގައި ވިދާޅުވިއެވެ.
ޕީޕީއެމުން ވަކިވެވަޑައިގަތުމަށް ފަހު ޔާމީން އުފައްދަވަން މަސައްކަތް ކުރައްވާ ޕީޕަލްސް ނެޝަނަލް ފްރަންޓް (ޕީއެންއެފް) އުފައްދަން ބޭނުންވާ 3،000 މެންބަރުން ހަމަކުރުމުގެ މަސައްކަތް ކުރަން އިލެކްޝަންސް ކޮމިޝަނުން މިހާރު ވަނީ ހުއްދަ ދީފައެވެ.