ފޮރިން މިނިސްޓްރީގެ އެމްބެސެޑަރު އެޓް ލާޖްކަމުގެ މަގާމަށް ކުރިން ވެސް ސަރުކާރުގައި އިސް މަގާމުތައް ފުރުއްވި، މުޙައްމަދު ހުސައިން ޝަރީފް (މުންދު) މިއަދު އައްޔަންކުރައްވައިފިއެވެ.
މުންދު އެ މަގާމަށް އައްޔަން ކުރައްވައި އޭނާއަށް ފަތްކޮޅު ހަވާލުކުރެއްވީ ރައީސް ޑރ. މުޙައްމަދު މުއިއްޒެވެ.
މުންދު ވަނީ ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ވެރިކަމުގައި ރައީސް އޮފީހުގެ މިނިސްޓަރުކަން ކުރައްވައިފައެވެ. އަދި ރާއްޖެއިން ލަންކާއަށް ކަނޑައަޅުއްވައިފައި ހުންނަވާ ސަފީރުގެ މަގާމު ވެސް މުންދުވަނީ ފުރުއްވައިފައެވެ.
ހަމައެއާއެކު މުންދުވަނީ ކުރީގެ ރައީސް ޑރ. މުޙައްމަދު ވަހީދުގެ ވެރިކަމުގައި ޔޫތު މިނިސްޓަރުކަން ވެސް ކުރައްވައިފައެވެ.
ރައީސް ޔާމީންގެ ވެރިކަން ނިމުމާއެެކު ވެސް މުންދު ގެންދެވީ އިދިކޮޅު ލީޑާޝިޕްގެ ތެރޭގައި ސިޔާސީ ގޮތުން އިސް ސަފުގައި މަސައްކަތް ކުރައްވަމުންނެވެ.
މީގެ އިތުރުން ވެސް ރައީސް ވަނީ، ފޮރިން މިނިސްޓްރީގެ އެމްބެސެޑަރު އެޓް ލާޖްގެ މަގާމަށް ޑރ. އަލީ ނަޞީރު މުޙައްމަދާއި، އެ މިނިސްޓްރީގެ ސްޓޭޓް މިނިސްޓަރުގެ މަގާމަށް މުޙައްމަދު ޝަހުދީ ހަމަޖައްސަވައިފައެވެ.