ލ. ގާދޫގައި ޓްރާސްޝިޕްމަންޓް ބަނދަރެއް އަޅައިފިނަމަ އެތަނުގެ ދިރުންތައް ނެތިދާނެ ކަމުގެ ބިރު ވަރަށް ބޮޑަށް އޮތް ކަމަށް އިކޯކެއާ މޯލްޑިވްސްއިން ބުނެފިއެވެ.
ތިމާވެށީގެ ހައްގުގައި ރާއްޖޭގައި މަސައްކަތް ކުރާ ޖަމިއްޔާއެއް ކަމަށްވާ އިކޯކެއާއިން އެ ކަންބޮޑުވުން ފާޅުކުރީ، ގާދޫގައި ބަންކަރިން ޚިދުމަތާއެކު ބަނދަރެއް ހެދުމުގެ މަސައްކަތްތައް، އިންތިޚާބީ ރައީސް ޑރ. މުޙައްމަދު މުއިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ފަށާނެ ކަމަށް ރޭ އިއުލާން ކުރުމާ ގުޅުވައިގެންނެވެ.
"ސަން"އާ ވާހަކަ ދައްކަވަމުން އިކޯކެއާގެ އެޑްވޮކަސީ ޑައިރެކްޓަރު މައީދު ޒާހިރު ވިދާޅުވީ ގާދޫއަކީ ދިރުންތަކުން މުއްސަނދިވެފައިވާ ސަރަހައްދެއްކަމަށް ކުރީގެ ބައެއް ދިރާސާތަކުން ދައްކާ ކަމަށެވެ.
މައީދު ވިދާޅުވީ، ގާދުއަކީ ރާއްޖޭގައި އެންމެ ގިނައިން ވެލާ ކަހަނބު ބިސްއަޅައި އާލާވަމުންދާ ރަށަށް ވާތީ، އެތަން ހިމާޔަތްކޮށް ރައްކާތެރިކުރުމަކީ ކޮންމެހެން ކުރަން ޖެހޭނެ ކަމެއް ކަމަށެވެ. ނަމަވެސް ބަނދަރެއް ގާއިމުކުރުމުން ދިރޭ ތަކެތީގެ ނަސްލަށް ގެއްލުންވާނެ ކަމަށް ބެލެވޭ ކަމަށް އޭނާ ވިދާޅުވިއެވެ.
އެގޮތުން، ހދ. ކުޅުދުއްފުށީގައި އޮންނަ ކުޅީގެ ބައެއް ހިއްކައިގެން އެއާޕޯޓެއް އެޅުމުން އެ ސަރަހައްދަށް ފުނުބެއްދޭ ވަރުގެ ބޮޑެތި ގެއްލުންތައް ލިބުނު ކަމަށް އޭނާ ވިދާޅުވިއެވެ.
"ހދ. ކުޅުދުއްފުށީގައިވެސް ހަމަ އެތަނުގެ ކުޅި ސަރަހައްދު ވަރަށް ބޮޑަށް ހަލާކުވި. އަދި ކުޅިއަށް ހިޖުރަކުރާ ދިރޭތަކެތި މަދުވިކަން ވެސް ފާހަގަކުރެވުނު،" މައީދު ވިދާޅުވިއެވެ.
ގާދޫއަކީ މޫދުވިނައާއި ވެލާ ކަހަނބު އަރާ މުހިންމު ސަރަހައްދަކަށް ވާއިރު އެފަދަ ދިރުންތައް ހިމާޔަތްކޮށް އާލާކުރުމުގެ ފުރުސަތު ކުޑަކޮށްވެސް އޮތީ ފަޅުރަށްރަށުގައި ކަމަށް އޭނާ ވިދާޅުވިއެވެ.
"މޫދު ވިނަ އޮންނަ ސަރަހައްދުގައި 91 ވައްތަރުގެ މަސް އުޅޭ. ފަރުގެ ދިރުންތަށް ވެސް އެ ސަރަހަައްދުގައި ވަރަށް ވަރުގަދަވާނެ،" މައީދު ވިދާޅުވިއެވެ.
ހަމައެއާއެކު ބަންކަރިންގެ ޚިދުމަތް އެރަށުގައި ފަށައިފިނަމަ ގާދޫގައި މިހާރު ދިރިއުޅެމުންދާ ގުދުރަތީ ދިރުންތަކަށް ބޮޑެތި ގެއްލުންތައް ލިބޭނެ ކަމަށް އޭނާ ވިދާޅުވިއެވެ.
ބަންކަރިން ޚިދުމަތަކީ ކަނޑު ބޯޓުތަކާއި އުޅަނދުތަކަށް ތެޔޮ ފޯރުކޮށްދިނުމެވެ. ބޯޓް ފަހަރު އާއްމުކޮށް ދަތުރުކުރާ ސަރަހައްދުތަކުގައި އެފަދަ ޚިދުމަތެއް ފެށިއްޖެ ނަމަ ބޯޓް ފަހަރު އެތަންތަނަށް މަޑުކޮށް ތެޔޮ އަޅައިހަދައެވެ. މިގޮތަށް ތެޔޮ ވިއްކުމަކީ ރަނގަޅު ފައިދާއެއް ލިބޭ ޚިދުމަތެކެވެ.
ގާދޫގެ ވެލާއަރާ ގޮނޑުދޮށަކީ 2021 ވަނަ އަހަރުގެ ޑިސެމްބަރު މަހު ލ. އަތޮޅުގެ ހަ ސަރަހައްދެއް ހިމާޔަތް ކުރަން ރައީސް އިބްރާހީމް މުޙައްމަދު ޞާލިޙް ނިންމެވިއިރު، އެ ލިސްޓުގައި ހިމެނުއްވި އެއް ތަނެވެ.