މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ރައީސްކަމުގެ މަގާމަށް ދެވަނަ ދައުރަކަށް މުހައްމަދު ސޮބާހް (ޗޭ) އިންތިހާބުކޮށްފިއެވެ.
ރައީސްކަމުގެ މަގާމަށް ސޮބާހު އިންތިހާބުކޮށްފައިވަނީ މިދިޔަ ހޮނިހިރު ދުވަހު ބޭއްވި ސާފިން އެސޯސިއޭޝަންގެ ހިންގާ ކޮމިޓީގެ އިންތިހާބުގައެވެ. އެ އިންތިހާބުގައި ހިންގާ ކޮމިޓީގެ ކޮންމެ މަގާމަކަށް ވެސް އެންމެ ފަރާތަކުން ކުރިމަތިލާފައިވުމުން ނަގާފައިވަނީ ފެންނަ ނުފެންނަ ވޯޓެކެވެ.
އެ އިންތިހާބުގައި ނައިބު ރައީސްކަމުގެ މަގާމަށް އިންތިހާބުކޮށްފައިވަނީ މީގެ ކުރިން ވެސް އެ މަގާމުގައި ހުންނެވި ޝާހިދު އަމީނެވެ. ޖެނެރަލް ސެކްރެޓަރީއަކަށް އަލީ އަހުސަން އިންތިބާހުކޮށްފައިވާ އިރު، މެންބަރުންގެ ގޮތުގައި އިންތިހާބުކޮށްފައިވަނީ ހުސައިން ސޮލާހާއި ޝާޒިއާ ސައީދެވެ.
ސޮބާހުގެ ރައީސްކަމުގައި މިދިޔަ ފަސް އަހަރުގެ ދައުރުގައި ވެސް ސާފިންއަށް ގިނަ ކުރިއެރުންތައް ހޯދުމަށް ގިނަ މަސައްކަތްތަކެއް ވަނީ ކޮށްފައެވެ. އެގޮތުން ރާއްޖޭގައި ފުރަތަމަ ފަހަރަށް އޭޝިއަން ސާފިން ޗެމްޕިއަންޝިޕް ބޭއްވުމާއި، ރާއްޖޭގައި ސާފިން ލީގެއް ފެށުން ހިމެނެއެވެ.
ސާފިންއަކީ ރާއްޖޭގައި އެންމެ ބާރަށް ކުރިއަރަމުން އަންނަ އެއް ކުޅިވަރެވެ. އެގޮތުން ބައިނަލްއަގުވާމީ މުބާރާތްތަކުގައި ވާދަކޮށް ވެސް ރާއްޖޭގެ އެތުލީޓުން ދަނީ ގިނަ ކުރިއެރުންތަކެއް ހޯދަމުންނެވެ.