ރާއްޖޭގައި އެކިއެކި ނަންނަމުގައި ގާއިމުވެ ތިބޭ އިންޑިއާ ސިފައިންގެ އަދަދާއި އެ މީހުންނަށް ދިވެހި ދައުލަތުން ކުރާ ޚަރަދުގެ ތަފުސީލު ހާމަނުކުރާން އިންފޮމޭޝަން ކޮމިޝަނަރުގެ އޮފީހުން ނިންމީ ގޯސްކޮށް ކަމަށް ހައިކޯޓުން މިއަދު ހުކުމް ކޮށްފިއެވެ.
"ދިޔަރެސް" ނޫހުގެ ނޫސްވެރިޔާ އަހުމަދު އަޒާން މަރުޒޫގް އެދިފައިވަނީ ރާއްޖޭގައި ގާއިމުވެ ތިބޭ އިންޑިއާ ސިފައިންގެ ޖުމުލަ އަދަދާއި އެ މީހުންނަށް ކުރާ ޚަރަދުގެ މައުލޫމާތު ދިނުމަށެވެ. އެކަމަކު، އިންފޮމޭޝަން ކޮމިޝަނަރުގެ އޮފީހުން ނިންމީ ގައުމީ ސަލާމަތަށް ނުރައްކާވާތީ، އެ މައުލޫމާތު ނުދިނުމަށެވެ.
އެހެންވެ، އަޒާންގެ ފަރާތުން ވަނީ އެ މައްސަލަ ހައިކޯޓުގައި އިސްތިއުނާފު ކޮށްފައެވެ.
އެ މައްސަލައިގައި މިއަދު ހައިކޯޓުގައި މި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރި ހުކުމުގައި ބުނީ، ސިފައިންގެ އަދަދު ހާމަނުކުރާން އިންފޮމޭޝަން ކޮމިޝަނަރު ނިންމި ސަބަބު އެކަށިގެންވާ މިންވަރަށް ސާބިތުކޮށްދީފައިނުވާ ކަމަށެވެ.
އެއީ، އެގޮތަށް ނިންމީ އެ މައްސަލައިގައި ހިމެނޭ "ސިއްރު އެއްބަސްވުމަކަށް" ރިއާޔަތްކޮށް ކަމަށްވާއިރު، އެއީ އޮތް އެއްބަސްވުމެއްތޯއާއި އެ އެއްބަސްވުމުގައި ހުރި ކަމަށް ބުނާ ކަންކަން އަސްލު ވެސް ހުރިތޯ ބަލަން އެކަށިގެންވާ މަސައްކަތެއް ކޮށްފައިވާކަން އެނގެން ނެތުމުން ކަމަށް ހުކުމުގައި ވަނީ ބުނެފައެވެ. އަދި، ކޮމިޝަނަރުގެ ނިންމުން ބިނާވެފައިވަނީ ހަމައެކަނި އެމްއެންޑީއެފުން ބުނާ ބަހެއްގެ މައްޗަށް ކަމަށް ހުކުމުގައި ވެއެވެ.
އަދި، އެ މައުލޫމާތު ހާމަކުރުމުން ގައުމީ ސަލާމަތަށް ލިބޭނެ ގެއްލުމެއް ސާފުކޮށް ބަޔާންކޮށްފައި އޮންނަން ޖެހޭނެ ކަމަށް ވެސް މިއަދު ކުރި ހުކުމުގައި ވެއެވެ.
އެހެންވެ، ހައިކޯޓުން ކުރި ހުކުމުގައި ވަނީ އިންފޮމޭޝަން ކޮމިޝަނަރުގެ އޮފީހުން އެ މައްސަލައިގައި އަލުން ގޮތެއް ކަނޑައަޅަން ޖެހޭ ކަމަށެވެ.
ހައިކޯޓުގައި މި މައްސަލަ ބެެއްލެވީ ހައި ކޯޓުން އެ މައްސަލަ ބެއްލެވީ އެ ކޯޓުގެ އިސް ފަނޑިޔާރު ހުސައިން ޝަހީދާއި ފަނޑިޔާރު ހަސަން ޝަފީއުގެ އިތުރުން ފަނޑިޔާރު ހުޒައިފާ މުހައްމަދެވެ. ބެންޗުގެ ރިޔާސަތު ބެލެހެއްޓެވީ އިސް ފަނޑިޔާރު ޝަހީދެވެ.