ފޯރިގަދަ އަދި ވާދަވެރިމާއެކު ނިމިދިޔަ މަހު ބޭއްވި ދިރާގު މޯލްޑިވްސް ރޯޑްރޭސް ޚާއްސަ ވަނީ ހަމައެކަނި ބޮޑެތި މީހުންނަށް އެކަންޔެއްނޫނެވެ. މިއީ ސްކޫލް ކުދިންގެ ފަރާތުންވެސް ކޮންމެ އަހަރަކު އެންމެ ބޮޑު ތަރުހީބެއްލިބެމުންދާ އެއް ހަރަކާތެވެ.
ސްކޫލުތަކުން ލިބުނު ބޮޑު ތަރުހީބާއެކު، މި ފަހަރުގެ ރޭހުގައި 31 ސްކޫލަކުން ރެޖިސްޓާ ކުރިއިރު، މާލޭގެ 25 ސްކޫލަކުން 576 ދަރިވަރުން ވަނީ ބައިވެރިވެފައެވެ. އަދި އަތޮޅު ތެރެއިން ހަތް ސްކޫލުން ދަރިވަރުން ވަނީ ބައިވެރިވެ ވަނަ ހޯދާފައެވެ. މީއީ ހަމަ ޔަގީނުންވެސް ދިރާގުގެ މިދުވުމަށް ކުދިންގެ މެދުގައި އޮތް މަގުބޫލުކަން ދޭހަވާ ހެއްކެކެވެ.
މި ރޭހުގައި އަތޮޅުތެރެއިން ބައިވެރިވި ސްކޫލުތަކަކީ:
- ޏ. އަތޮޅު ތައުލީމީ މަރުކަޒު
- މުހައްމަދު ގާސިމް ޕްރީ ސްކޫލް
- މުހައްމަދު ޖަމާލުއްދީން ސްކޫލް
- އަފީފުއްދީން ސްކޫލް
- އައްޑޫ ހައި ސްކޫލް
- އިރުޝާދިއްޔާ ސްކޫލް
- މަރަދޫ ސްކޫލް
ސްކޫލު ދަރިވަރުންގެ ކެޓަގަރީގައި 5ކޭ އިން 13 އަހަރުން މަތި އަދި 13 އަހަރުން ދަށުގެ އަންހެން އަދި ފިރިހެން ކެޓަގަރީން ވެސް ވަނީ ވަނަ ހޮވާފައެވެ.
މި ރޭހަކީ ރާއްޖޭގައި ބޭއްވުނު ފުރަތަމަ ރޯޑް ރޭހަށްވާއިރު މިއީ ރާއްޖޭގައި ބާއްވަމުން އަންނަ ހަމައެކަނި ބައިނަލްއަޤުވާމީ ދުވުން ވެސް މެއެވެ. މިދިޔަ މަހުގެ 27 ވަނަ ދުވަހު ފަތިހު ފެށި މި ރޯޑް ރޭސް ކުރިއަށްދިޔައީ 4000 އަށް ވުރެން ގިނަ ދުވުންތެރިންނާއެކު ހުޅުމާލޭ ސެންޓްރަލް ޕާކުގައެވެ.
ދިރާގު ރޯޑް ރޭހަކީ ވޯލްޑް އެތްލެޓިކްސް ސާޓިފައިޑް ރޭސް ރޫޓަކާއި، އެސޯސިއޭޝަން އޮފް އިންޓަނޭޝަނަލް މެރެތަންސް އެންޑް ޑިސްޓެންސް ރޭސަސް ( އެއިމްސް) އިން ވޯލްޑް ރަނިން ކަލަންޑަރުގައި ލިސްޓު ކޮށްފައިވާ ދުވުމެކެވެ. އެހެންކަމުން ދުވުމުގެ ދާއިރާއިން ކުރިއަރަން ބޭނުންވާ ޕްރޮފެޝަނަލް އެތުލީޓުންނަށް އިންޓަނޭޝަނަލް ޓައިމިން އެއް ހޯދުމަށް މިއީ ކޮންމެ އަހަރަކުވެސް ލިބޭ ރަނުގެ ފުރުސަތެކެވެ.
ނިމިގެން ދިޔަ ދިރާގު ރޯޑު ރޭހުގައި ވަނީ މުޅިން އަލަށް ހާފް މެރެތަން ތައާރަފް ކޮށް ހާފް މެރެތަން އަށް ދުވުމުގެ ފުރުސަތު ދުވުން ތެރިންނަށް ފަހި ކޮށްދީފައެވެ. ހާފް މެރެތަންގެ އިތުރުން އެހެން އަހަރުތަކެކޭ އެއްފަދައިން، މި އަހަރުގެ ރޯޑް ރޭހުގައި ވެސް 5ކޭ އަދި 10 ކޭ އަށް ދުވުމުގެ ފުރުސަތު ވެސް ދުވުންތެރިންނަށް އޮތީ ހުޅުވައިލައިފައެވެ.
މި ރޯޑް ރޭހުގެ 14 ވަނަ އެޑިޝަނަކީވެސް ކުޑަކުދިންގެ ރައްކާތެރިކަމަށް ޚާއްސަ ކުރެވިފައިވާ ދުވުމެކެވެ. އެގޮތުން މި ރޭހުގައި، މި ފަދަ 12 އެންޖީއޯ އަކުން ބައިވެރިވެފައިވެއެވެ.
މި ރޭހުގައި ބައިވެރިވުމަށް ދުވުންތެރިން ގަތް ޚާއްސަ ރޭސް ކިޓުން ލިބޭ ފައިސާ ރޯޑް ރޭހުގެ އެންޑޯސްކޮށްފައިވާ ކުޑަކުދިންގެ ހައްގުގައި މަސައްކަތްކުރާ އެން.ޖީ.އޯތަކަށް ހަދިޔާ ކުރުމަށް ނިންމާފައިވެއެވެ. އަދި އެންމެ ގިނަ ދުވުންތެރިން ޚިޔާރު ކުރި ފަސް ޖަމިއްޔާއަކަށް މުޅި ޖުމްލަ ދެ ލައްކަ ރުފިޔާ ދިރާގުން ހަދިޔާ ކުރާނެ ކަމަށްވެސް އެ ކުންފުނިން ވަނީ ބުނެފައެވެ.