އިންތިޙާބީ ރައީސާއި ނައިބު ރައީސް ހުވާކުރަން ހަމަޖެހިފައިވާ އަންނަ ހުކުރު ދުވަހު، އިސްލާމީ މަރުކަޒުގެ ދެކުނު ފަޅި އާއި އިރުމަތީ ފަރާތް ބޭނުންކުރަން އިސްލާމިކް މިނިސްޓްރީން މިއަދު އެދެފިއެވެ.
އިންތިޙާބީ ރައީސް ޑރ. މުހައްމަދު މުއިއްޒާއީ އެ މަނިކުފާނުގެ ނައިބު ރައީސް ޙުސައިން މުހައްމަދު ލަތީފް ހުވާކުރައްވަން ހަމަޖެހިފައިވަނީ ހުކުރު ދުވަހުގެ 4:45 ގައި ޖުމްހުރީ މައިދާނުގައެވެ.
އެހެންވެ، އެ ދުވަހުގެ އަސުރު ނަމާދާއި މަޣްރިބު ނަމާދަށް އިސްލާމީ މަރުކަޒަށް ދާ މީހުން އެ މިސްކިތުގެ ދެކުނު ފަރާތް ބޭނުންކުރަން އިސްލާމިކް މިނިސްޓްރީން ވަނީ އެދިފައެވެ. އެގޮތުން، މިސްކިތަށް ވަންނަން މެދުޒިޔާރަތްމަގު، ކުރީގެ ދިރާގުގެ މައި އޮފީސް ހުރި ފަޅިއާއި އިރުމަތީ ފަރާތުން ނޭޝަނަލް އާޓް ގެލެރީ ހުންނަ ފަޅި ބޭނުންކުރަން މިނިސްޓްރީން ވަނީ އެދިފައެވެ.
އެ މަރުކަޒާ އިންވެގެން އޮންނަ އެ މައިދާނުގައި ރަސްމިއްޔާތު ބާއްވާތީ އެ ފަޅި ނަމާދު ކުރުމަށް ބޭނުން ނުކުރެވޭ ގޮތަށް ބަންދުވާނެއެވެ. އެ ސަރަހައްދު ބަންދު ކުރަނީ، ބޭރު ބައެއް ގައުމުތަކުގެ އިސް ވެރިން ވެސް ބައިވެރިވެވަޑައިގަންނަވާ ރަސްމިއްޔާތަކަށް ވުމުން ސަލާމަތީ ސަބަބުތަކަށް ޓަކައެވެ.
މިދިޔަ މަހު ބޭއްވި ރިޔާސީ އިންތިޚާބު ކާމިޔާބު ކުރެއްވި އިންތިޚާބީ ރައީސް މުއިއްޒުގެ ހުވާ ކުރެއްވުން އޮންނާނީ އާންމުންގެ ތެރެއިން 1،000 މީހުންނަށް ވެސް ބައިވެރިވެވޭ ގޮތަށެވެ.
އިންތިގާލީ މަރުހަލާގެ ތަރުޖަމާނު މީގެ ކުރިން ވިދާޅުވެފައިވާ ގޮތުގައި، އެ ޖަލްސާގައި ބައިވެރިވުމަށް މިހާރު ވަނީ ސަރަހައްދުގެ ގައުމުތަކުގެ ވެރިންނަށް ވެސް ދައުވަތު އަރުވައިފައެވެ.