ސްރީލަންކާގެ ގައުމީ އެއާލައިން ވިއްކައިލަން މިއަދުން ފެށިގެން ބީލަމަށް ހުޅުވާލައިފިއެވެ.
ލަންކާގެ ނިސްވޭވަށް ދެއްވި އިންޓަވިއުއެއްގައި އެ ގައުމުގެ ޕޯޓްސް، ޝިޕިން އެންޑް އޭވިއޭޝަން މިނިސްޓަރު ނަމާލް ސިރިޕާލާ ޑި ސިލްވާ ވިދާޅުވީ، އިންވެސްޓަރުން ބީލަން ހުށަހަޅަން މިއަދުން ފެށިގެން 45 ދުވަހުގެ މުއްދަތެއް ދީފައިވާ ކަމަށެވެ.
ސްރީލަންކަން ވަނީ 1.2 ބިލިއަން ޑޮލަރުން ދަރައިފައެވެ.
އެ އެއާލައިން ވިއްކާލަނީ ކޮވިޑުގައި ލަންކާގެ އިގްތިސާދަށް ދިމާވި ގޮންޖެހުންތަކުގައި އެންމެ ބޮޑު ލޮޅުމެއް އައި ސްރީލަންކަން އެއާލައިންސް ރީސްޓްރަކްޗާ ކުރަން ފާއިތުވި އަށް މަހު ކުރަމުން އައި މަސައްކަތުގެ ތެރެއިންނެވެ.
އެ ގައުމުގެ ސަރުކާރުން ވަނީ ކުންފުނި ރީސްޓްރަކްޗާ ކުރަން ވޯލްޑް ބޭންކްގެ އިންޓަނޭޝަނަލް ފައިނޭންސް ކޯޕަރޭޝަން (އައިއެފްސީ)އާ ހަވާލުކޮށްފައެވެ.
މިނިސްޓަރު ވިދާޅުވީ، ސްރީލަންކަންގައި މަސައްކަތް ކުރާ އެ ގައުމުގެ މުވައްޒަފުންގެ ހައްގުތައް ރައްކާތެރިކޮށްދޭނެކަން ކަށަވަރު ކޮށްދޭ ކުންފުނިތަކަށް އިސްކަން ދެއްވާނެ ކަމަށެވެ.
މީގެ ކުރިން 1998 ވަނަ އަހަރުން ފެށިގެން ދިހަ އަހަރުގެ މުއްދަތަކަށް އެމިރޭޓްސްއިން ވެސް ސްރީލަންކަން އެއާލައިންސް ހިންގިއެވެ. އެކަމަކު، ފަހުން 2008 ވަނަ އަހަރު އެ ގައުމުގެ ސަރުކާރުން ވަނީ އެމިރޭޓްސްއަށް ވިއްކާލި ހިއްސާ އަނބުރާ ގަނެފައެވެ.