ފަލަސްތީނުގެ މިނިވަން މަސައްކަތްކުރާ ޖަމާއަތް، ހަމާސް އާއި ޔަހޫދީ އިސްރާއީލާއި ދެމެދު މިހާރު ކުރަމުންދާ ހަނގުރާމަ ހުއްޓާލުމަކީ ކުރެވޭނެ ކަމެއް ނޫން ކަމަށް އެމެރިކާގެ ކުރީގެ ސެކްރެކްޓަރީ އޮފް ސްޓޭޓް ހިލަރީ ކްލިންޓަން ވިދާޅުވެއްޖެއެވެ.
ހަނގުރާމަ ހުއްޓާލައިފިނަމަ އެ ވަގުތޮކޮޅު ހަމާސްއިން ބޭނުން ކުރާނީ އެ މީހުންގެ ހަމަލާތައް ވަރުގަދަކޮށް، ހަނގުރާމަވެރިން ތަމްރީން ކުރުމާ ހަތިޔާރު އިތުރު ކުރުމުގެ މަސައްކަތް ކަމަށްވެސް ހިލަރީ ވިދާޅުވިއެވެ.
މިޑްލް އީސްޓް އައި އިން ރިޕޯޓުކުރާ ގޮތުގައި ހިލަރީ މިހެން ވިދާޅުވީ ހުކުރު ދުވަހު ރައިސް ޔުނިވާސިޓީގެ ބެކާ އިންސްޓިޓިއުޓް ގާލާގައި ބޭއްވި ޕެނަލް ޑިސްކަޝަނެއްގައެވެ.
"ހަނގުރާމަ ހުއްޓާލުމަށް ގޮވާލާ މީހުންނަށް ހަމާސްއެއް ނޭނގޭ،" ހިލަރީ ވިދާޅުވިއެވެ.
ހިލަރީ މިހެން ވިދާޅުވެފައި ވަނީ ޣައްޒާގައި ޔަހޫދީން ހިންގަމުންދާ ލާއިންސާނީ އަމަލުތައް ކުށްވެރިކޮށް ހަނގުރާމަ ހުއްޓާލުމަށް އުރުދުން އިސްނަގައިގެން އދ ގެ އާންމު މަޖިލީހަށް ހުށަހެޅި ގަރާރު ފާސްކުރި ދުވަހުއެވެ. އެ ގަރާރާ އެއްކޮޅަށް 120 ގައުމަކުން ވޯޓު ދީފައިވާއިރު، އެމެރިކާ ހިމެނޭ ގޮތަށް 14 ގައުމަކުން ވަނީ ގަރާރާއި ދެކޮޅަށް ވޯޓު ދީފައެވެ.
ޣައްޒާގެ ވެރިކަން ކުރަމުން އަންނަ ހަމާސްއަށް އިސްރާއީލުން ހަމަލާ ދިނީ ފަލަސްތީނުގައި ދިރިއުޅޭ އާންމުންނަށް އިސްރާއީލުން ދޭ އެކި ކަހަލަ އަނިޔާތަކާހެދި އެކަމުން ފަލަސްތީނު މިނިވަން ކުރުމުގެ މަގްސަދުގައި މި މަހުގެ 7 ވަނަ ދުވަހު ހަމާސް އިން ޔަހޫދީންނަށް ދިން ހަމަލާއަކާ ގުޅިގެންނެވެ. މިހާރު ކުރަމުންދާ ހަނގުރާމައިގައި ޣައްޒާގެ އާންމުންނަށް އަމާޒުކޮށް ޔަހޫދީން ދޭ ހަމަލާތަކުގައި ޣައްޒާއިން މިހާތަނަށް ވަނީ 8000 ށް ވުރެ ގިނަ މީހުން ޝަހީދުވެފައެވެ. އޭގެތެރެއިން ގިނަ މީހުންނަކީ އަންހެނުން ކުޑަކުދިން ކަމުގައި ޣައްޒާގެ ސިއްހީ ވުޒާރާއާ ހަވާލާދީ މިޑްލް އީސްޓް އައި އިން ރިޕޯޓުކުރެއެވެ.
އަދި ތެޔޮ ހިމެނޭ ގޮތަށް ޣައްޒާއަށް އެހީ ފޯރުކޮށްދިނުމުގެ ހުއްދަ ދިނުމަކީ "އާ" އެކޭ ނުވަތަ "ނޫނެކޭ" ބުނެ ޖަވާބެއް ހޯދަން އުނދަގޫ ކަމެއް ކަމަށްވެސް ހިލަރީ ވިދާޅުވިއެވެ. ހަމާސް އިން އިސްރާއީލަށް ދިން ހަމަލާގެ ބަދަލު އިސްރާއީލުން ހިފަން ޖެހޭ ކަމަށްވެސް ހިލަރީ ވަނީ ވިދާޅުވެފައެވެ. އަދި ތެޔޮ ކޮންމެހެން ފޯރުކޮށްދޭން ޖެހޭ ތަންތަނަށް ފޯރުކޮށްދޭންޖެހޭ ކަމަށްވެސް ހިލަރީ ވިދާޅުވިއެވެ.
ހަނގުރާމައިގެ ސަބަބުން ނިކަމެތިވެފައިވާ ޣައްޒާގެ އާންމުންނަށް ބޭނުންވާ ފެނާއި ކާބޯތަކެތި އަދި ބޭސް ފަރުވާއަށް ބޭނުންވާ ސާމާނު ޣައްޒާއަށް ވެއްދުމުގެ ހުއްދަ ޔަހޫދީން ދީފައި އޮތް ނަމަވެސް ދުވާލަކު 12 ޓްރަކް ވެސް އެހީ ހިފައިގެން ޣައްޒާއަށް ނުވަދެވެއެވެ. މިހާތަނަށް ޖުމްލަ 37 އެހީގެ ޓްރަކް ޣައްޒާއަށް ވަދެފައިވާއިރު، މިއީ ޣައްޒާގެ އާންމުންނަށް ބޭނުންވަ ވަރަށް ވުރެ މާ ބޮޑަށްވެސް މަދު މިންވަރެއް ކަމަށް ކަމާބެހޭ ފަރާތްތަކުން ހާމަކުރެއެވެ.