އަލީ ރަމީޒު ހޯސްޓު ކުރާ، ޖަމިއްޔަތުއްސަލަފުގެ، "އިލްމީ ޚަޒާނާ" ގެ 500 ވަނަ ޕްރޮގްރާމް ގެނެސްދީ އެކަން ފާހަގަކޮށްފިއެވެ.
"އިލްމީ ޚަޒާނާ" އަކީ މީހުންގެ މެދުގައި ދީނީ ހޭލުންތެރިކަން އިތުރުކޮށް، އިސްލާމްދިނާއި ގުޅޭ ސައްޚަ މައުލޫމާތު މީހުންނަށް ފޯރުކޮށްދިނުމުގެ މަގުސަދުގައި ޖަމިއްޔަތުއްސަލަފުން މީގެ 14 އަހަރު ކުރިން އުފައްދާ، ގެނެސްދޭން ފެށި ޕްރޮގްރާމެކެވެ. އަދި މި ޕްރޮގްރާމަކީ ހުއްޓުމެއް ނެތި އެންމެ ދިގު މުއްދަތަކަށް ކުރިއަށް ގެންދެވޭ ދީނީ މައުލޫމާތު ފޯރުކޮށްދޭ ޕްރޮގްރާމްވެސް މެއެވެ.
މީގެ 14 އަހަރު ކުރިން އެންމެ ފުރަތަމަ މި ޕްރޮގްރާމް ގެނެސްދޭން ފެށީ ސަން އެފްއެމުންނެވެ. އަދި އެޔަށް ފަހު ސަންޓީވީން ވެސް މި ޕްރޮގްރާމް ދިގު މުއްދަތަކަށް ގެނެސްދީފައިވެއެވެ. މެދުނުކެނޑި ނުވަ އަހަރު ވަންދެން ސަން އެފްއެމްއާއި ސަން ޓީވީން ވަނީ މި ޕްރޮގްރާމް އާންމުންނާ ހަމައަށް ގެނެސްދީފައެވެ.
"އިލްމީ ޚަޒާނާ" ގެ ޕްރޮގްރާމެއްގެ ތެރެއިން--
އެއަށްފަހު ދެން އިލްމީ ޚަޒާނާ ޕްރޮގްރާމު ގެނެސްދީފައިވަނީ ވީޓީވީއިންނެވެ. ދެ އަހަރު ދުވަހު ވިޓީވީއިން މި ޕްރޮގްރާމް ވަނީ ކުރިއަށް ގެންގޮސްފައެވެ. އެއަށް ފަހު ކޮވިޑުގެ ބަލިމަޑުކަމާއިއެކު މި ޕްރޮގްރާމަށްވެސް ވަނީ ހުއްޓުމެއް އައިސްފައެވެ.
ދެން މި ޕްރޮގްރާމް ގެނެސްދޭން ފެށީ ޖަމިއްޔަތުއްސަލަފްގެ އަމިއްލަ ޗެނަލެއް ކަމަށްވާ ދާރެސްޓީވީއިންނެވެ. ޖަމިއްޔަތުއް ސަލަފުން ފާހަގަ ކުރާގޮތުގައި މިއީ އެ ޖަމިއްޔާއަށް ލިބުނު އެންމެ ބޮޑު ހިތްހަމަޖެހުމެވެ. ދާރެސް ޓީވީން މި ޕްރޮގްރާމް މިހާރު ވަނީ ކާމިޔާބު ކަމާއިއެކު އެއް އަހަރުދުވަހު ގެނެސްދީފައެވެ.
ޖަމިއްޔަތުއް ސަލަފުން ކުރިއަށް ގެންދާ "އިލްމީ ޚަޒާނާ"ގެ އަލީގައި ރައްޔިތުން ބޭނުންވެފައިވާ އެތައް ދީނީ ސުވާލެއްގެ ޖަވާބު ފަސޭހަކަމާއެކު ހޯދުމުގެ ފުރުސަތު ވަނީ ފަހިވެފައެވެ.
މީގެ 14 އަހަރު ކުރިން މި ޕްރޮގްރާމް ފުރަތަމަ ފެށިގެން އައީ ދީނާއި ގުޅޭ ސައްހަ އެތައް މައުލޫމާތެއް ހޯދަން ދިވެހިން ވަރަށް ބޭނުންވެފައިވާ ދަނޑިވަޅެއްގައެެވެ. މީޑިއާގެ މަދު ވަސީލަތްތަކެއް ހުރި ނަމަވެސް އެ ފުރުސަތު، އެންމެ ފަހިވެފައި ނެތް ދުވަސްވަރެއްގައެވެ. އެހެން ނަމަވެސް ރައްޔިތުންނަށް އިލްމީ ޚަޒާނާއިން ވަނީ ހިތުގައި އުފެދިފައިވާ ދީނީ ސުވާލުތަކަށް ޖަވާބު ހޯދުމުގެ ފުރުސަތު ފަހި ކޮށްދީފައެވެ.
"އިލްމީ ޚަޒާނާ" ގެ ޕްރޮގްރާމެއްގެ ތެރެއިން--
ސަލަފް ޖަމިއްޔާއިން ބުނީ މި ޕްރޮގްރާމް ގެނެސްދިނުމުގައި މެދުވެރިވި، ސަންއެފްއެމް، ސަން ޓީވީ އަދި ވީޓީވީގެ އިތުރުން ދާރެސްޓީވީން ވެސް ވަނީ ރައްޔިތުން ކުރާ ސުވާުތަކަށް އެއްވެސް ފޮރުވުމެއް އަދި އެއްވެސް ހިފެހެއްޓުމެއް ނެތި އިލްމުވެރިންނަށް ޖަވާބު ދިނުމުގެ ފުރުސަތު ފަހި ކޮށްދީފައިވާކަމަށެވެ.
މިހާތަނަށް މި ޕްރޮގްރާމުގެ 500 ވަނަ އެޕިސޯޑާ ހަމައަށް އައިއިރު ދީނީ މައުލޫމާތު ސާފު ކުރުމުގެ ގޮތުން އެތައް ހާސް ސުވާލެއް އާންމުން ކޮށްފައިވާކަމަށްވެސް އެ ޖަމިއްޔާއިން ބުނެއެވެ.
އެ ޖަމިއްޔާއިން ބުނީ މި ސިލްސިލާގެ ތެރެއިން ހޯދުނުު އެންމެ ބޮޑު ކާމިޔާބީއަކީ މި ޕްރޮގްރާމްތަކުގެ އޯޑިއޯ ސީޑީ ރައްޔިތުނެގެ އެދުމުގެ މަތިން ވިއްކަން ފެށުނު ކަމަށެވެ. އެކަމަށް ވަރަށް ބޮޑު ތަރުހީބެއް ލިބިގެން ދިޔަކަންވެސް އެ ޖަމިއްޔާއިން ވަނީ ފާހަގަ ކޮށްފައެވެ. އެގޮތުން މިހާރު އޭގެ އެތަކެއް ސީޑީއެއް ވިކިފައިވާ ކަމަށްވެސް އެ ޖަމިއްޔާއިން ބުނެއެވެ.
މި ޕްރޮގްރާމްގެ 500 ވަނަ އެޕިސޯޑު ފާހަގަކުރުމުގެ ތެރެއިން، ޖަމިއްޔަތުއް ސަލަފުން ވަނީ އެ ޕްރޮގްރާމް ކުރިއަށް ގެންދިއުމަށް އެހީތެރިވެދެއްވި ހުރިހާ ފަރާތަކަަށް ޝުކުރު އަދާ ކޮށްފައެވެ.