މިދިޔަ މަހު ފެމިލީ ކޯޓުން 131 ކައިވެނި ކޮށްދިންއިރު، 97 ވަރި ކޮށްދީފައި ވާކަމަށް އެ ކޯޓުގެ ތަފާސްހިސާބުތަކުން ދައްކައިފިއެވެ.
ފެމިލީ ކޯޓުން މިއަދު އާންމުކުރި ތަފާސްހިސާބުތަކަށް ބަލާއިރު މިދިޔަ މަހު، ވަރި ކުރުމަށް އެދި 29 މައްސަލައެއް ހުށަހަޅާފައި ވެއެވެ. އަދި ކުރީމަހު ހުށަހެޅި 27 މައްސަލައެއް ނުނިމި ވާއިރު މިދިޔަ މަހު ވަނީ ވަރި ކުރުމަށް އެދި ހުށަހެޅި މައްސަލަތަކުގެ ތެރެއިން 20 މައްސަލައެއް ނިންމާފައެވެ. ނުނިމި ވަނީ 36 މައްސަލައެވެ.
ވަރިވުމަށް އެދި މިދިޔަ މަހު ފެމިލީ ކޯޓަށް 51 މައްސަލައެއް ހުށަހަޅާފައި ވެއެވެ. ކުރީމަހުގެ ނުނިމިވާ 117 މައްސަލައާއެކު މިމަހު ނިންމާފައި ވަނީ، 57 މައްސަލައެކެވެ. ވަރިވުމަށް އެދި ހުށަހެޅި މައްސަލަތަކުގެ ތެރެއިން 111 މައްސަލައެއް އަދިވެސް ނުނިމި އެބަވެއެވެ.
މީގެ އިތުރުން ފެމިލީ ކޯޓުގެ ތަފާސްހިސާބުތަކަށް ބަލާއިރު، ވަރި ސާބިތުކުރުމުގެ 37 މައްސަލައެއް ވެސް ފެމިލީ ކޯޓަށް މިދިޔަ މަހު ހުށަހަޅާފައި ވެއެވެ. އޭގެ ކުރީ މަހު ވަރިވުމަށް ހުށަހަޅާ ނުނިމި ހުރި މައްސަލަ ތަކުގެ އަދަދު މުޅި ޖުމްލަ 39އަކަށް އަރާއިރު ނިމިފައި ވަނީ 43 މައްސަލައެވެ. އަދި މިމަހު ނުނިމި ވަނީ، 33 މައްސަލައެކެވެ.
ނިމިދިޔަ އޮގަސްޓް މަހު ފެމިލީ ކޯޓުން ވަނީ 171 ކައިވެންޏާއި 132 ވަރި ކޮށްދީފައެވެ. ރާއްޖެއަކީ އާބާދީއާ އަޅާބަލާއިރު ނިސްބަތުން ވަރި އެންމެ ގިނަ އެއް ގައުމެވެ.