ފަލަސްތީނުގެ ހަމާސް ޖަމާޢަތާ ދެކޮޅަށް ގާޒާގައި އިޒްރޭލު ސިފައިން ކުރަމުންދާ ހަނގުރާމައިގައި ކުށެއް ނެތް ފަލަސްތީނުގެ އެތައް ބަޔަކު މަރާލާފައި ވާތީ މިފަދަ ލާ އިންސާނީ ޢަމަލުތަކަކީ ބަލައިގަނެވޭނެ ޢަމަލުތަކެއް ނޫންކަމަށް ބޮލީވުޑްގެ ބަތަލާ ސޯނަމް ކަޕޫރު ބުނެފިއެވެ.
ސޯނަމް ކަޕޫރަކީ ބަތަލާ ސުވަރާ ބާސްކަރަށް ފަހު ފަލަސްތީނާ ދެކޮޅަށް އިޒްރޭލުން ހިންގަމުން އަންނަ ހައްދު ފަހަނަ އަޅާފައިވާ ހަމަލާތައް ކުށްވެރި ކުރި ހަމައެކަނި އިންޑިއާގެ ފިލްމީ ތަރިއެވެ.
ސޯނަމްގެ އަމިއްލަ އިންސްޓަގްރާމް ގައި ކުރި ދިގު ޕޯސްޓުގައި ބުނެފައި ވަނީ، ޣައްޒާގެ ދެބައިކުޅަ އެއްބައި މީހުންނަކީ ކުށެއް ނެތް މައުސޫމު ކުޑަކުދިން ކަމަށާއި އިޒްރޭލުގެ ކުޑަކުދިންނަށާއި އާއްމު ރައްޔިތުންނަށް އަމާން ދިރިއުޅުމެއް ހޯދައިދިނުމަށް މަސައްކަތް ކުރާ ބީދައިން ފަލަސްތީނުގެ ކުށެއް ނެތް ކުޑަކުދިންނާއި އާއްމު ރައްޔިތުންނަށް ހިމާޔަތް ހޯދައިދިނުމަށް މަސައްކަތް ކުރަންޖެހޭ ކަމަށެވެ.
އިންސާނީ ޙައްޤު ތަކުގެ ބުރަދަން އެއް މިންގަނޑަކަށް ބަލާ ކަމުގައި ވަންޏާ ފަލަސްތީނު ރައްޔިތުންގެ އިންސާނީ ޙައްޤުތަކުގެ ބުރަދަން ވެސް ހަމަ ހަމަ ވާންޖެހޭނެ ކަމަށް ބުނެ ސޯނަމް ވަނީ އިޒްރޭލާ ބާރު ދެމުން އަންނަ ފަރާތް ތަކަށް ވަރަށް ބޮޑަށް ފާޑު ކިޔާފައެވެ. އަދި ހަމަ އެކަނި އިޒްރޭލުގެ ރައްޔިތުންނަށް ހަމްދަރުދީވެ އެ މީހުންގެ ފުރާނައާ މެދު ވިސްނާ ފަލަސްތީނުގެ ރައްޔިތުންގެ ފުރާނައިގެ އަގެއް ނެތް ކަމުގެ ދެކެންޏާ އެފަދަ ފަރާތްތަކަށް އިންސާނުންގެ ނަމުން މުހާތަބު ކުރުމަކީ ބޭކާރު ކަމެއް ކަމަށް ސޯނަމް ވަނީ ބުނެފައެވެ.
ސޯނަމް ކަޕޫރުގެ އިންސްޓަގްރާމް މެސެޖު
ފަލަސްތީނުގެ ކުށެއް ނެތް އެތައް ރައްޔިތުންނެއް އަނިޔާވެރި ގޮތުގައި މަރާލުމާ ދެކޮޅަށް ސޯނަމް އަޑު އުފުލުމުން ވަރަށް ގިނަ ބަޔަކު ވަނީ ބަތަލާއަށް ތަޢުރީފު ކޮށްފައެވެ. ހަމަ އެއާއެކު ބޮލީވުޑްގެ މަޝްހޫރު ޚާން ތަކުގެ އަޑު މި މައްސަލައިގައި ފަނޑުވެފައި ވުމުން އެފަރާތް ތަކަށް ގިނަ ބައެއްގެ ނުރުހުން ވަނީ އަމާޒު ވެފައެވެ.
ބަތަލާ ސޯނަމް ކަޕޫރަކީ، އިންސާނީ ޙައްޤުތައް ޙިމާޔަތް ކުރުމަށް މަސައްކަތް ކުރާ ޖަމްޢިއްޔާ ތަކަށް ތާޢީދުކޮށް އެފަދަ ފަރާތް ތަކާ އެކު މަސައްކަތް ވެސް ކުރާ ބަތަލާ އެކެވެ.